Nyampinga mushya wa Tanzaniya yakirijwe ibihuha

Diana Edward Loy, nyampinga wa Tanzaniya watowe mu mpera z’icyumweru gishize yatunguwe no kubona amakuru acicikana kuri interineti avuga amazina ye, imyaka ndetse n’andi makuru amwerekeye atari yo .

Kuwa gatandatu w’icyumweru dusoje ni bwo muri Tanzaniya hongeye kuba igikorwa cyo gutora nyampinga nyuma y’imyaka 2 iki gikorwa cyitaba.

Uyu nyampinga mushya wa Tanzaniya akimara gutorwa ku mbuga nkoranyambaga hakwirakwijwe amakuru avuga ko yitwa Diana Edwards Lukumai, ko afite imyaka 18 ndetse yarangije kwiga kaminuza, ibintu byasobanuraga ko yaba yaratangiye amashuri abanza afite imyaka 2 gusa.

Umuvugizi wa nyaminga wa Tanzaniya Charles William yahakanye aya makuru yivuye inyuma maze atangaza ukuri kuri nyampinga wa Tanzaniya Diana Edward Loy.

Yagize ati “ Nyampinga wa Tanzaniya 2016/2017 wambikiwe ikamba mu mujyi wa Mwanza yitwa Diana Edward Loy si Diana Lukumai, yarangije umwaka wa kane muri 2015 mu ishuri ryisumbuye rya Arusha Day ntabwo ari muri 2011, Diana ntabwo ariga muri kaminuza n’imwe muri Tanzaniya no ku isi hose ariko ateganya gutangira muri uyu mwaka muri kaminuza ya IFM."

Umuvugizi wa Nyampinga wa Tanzaniya yasabye abanya-Tanzaniya bose gukoresha neza imbuga nkoranyambaga birinda gutangaza ibihuha.

Yisangize Inshuti.

Ibitekerezo

Tanga Igitekerezo