Ni iki cyihishe inyuma y’ihomba ry’igitaramo cya Jay Polly na Ama G The Black?

3

Uko iminsi igenda ihita, ni ko umubare w’abantu bitabira ibitaramo by’abahanzi mu Rwanda ugenda ugabanuka, ibi bituma abantu bakomeza kwibaza impamvu ibitaramo bititabirwa kandi nyamara tuvuga ko muzika nyarwanda igenda itera imbere uko u Rwanda na rwo rugenda rutera imbere.

Benshi mu bagerageza kwerekana impamvu zo kutitabirwa kw’ibitaramo, bagaruka ku ngingo zitandukanye zirimo imitegurire idahwitse, abandi bati amafaranga yarabuze mu bafana.

Kuwa gatanu tariki 26 Kanama 2016 ni bwo kuri Petit stade i Remera habereye igitaramo cyo kumurika umuzingo (Album) Jay Pally afatanyije na Ama G bise " Ubuzima bwanjye".

Iki gitaramo cyarabaye ariko abantu bakitabiriye ari bake ku buryo bugaragarira ijisho rya buri wese dore ko ugereranyije batarenganga abantu 120, ibintu bitagaragaye neza mu ruhando rwa muzika nyarwanda.

Ibi byatumye benshi babyibazaho dore ko aba bahanzi ari bamwe mu byamamare u Rwanda rufite mu njyana ya Hip Hop. Abafana bitabiriye iki gitaramo na bo batashye bavuga ko cyapfubye.

Ese kuba igitaramo cya Jay Polly na Ama G The Black cyaritabiriwe n’abantu mbarwa byaba byaratewe n’iki?

Hari ibintu bitatu abantu bakomeje kugarukaho byaba byaratumye iki gitaramo kititabirwa uko bikwiye.

Kimwe mu bivugwa harimo kuba iki gitaramo kitaramamajwe uko bikwiye kuko hari bamwe mu bakunzi ba muzika nyarwanda bamenye iby’iki gitaramo babibwiwe n’abakivuyemo banenga ubwitabire abandi bakakibwirwa n’inkuru zacyanditsweho zigaruka ku bwitabire buke..

Ikindi abantu bakomojeho ni ibijyanye n’imyitwarire ya Jay Polly itari myiza yari imaze iminsi imurangwaho mu itangazamakuru ndetse no kuba aba basore barashwanye n’uhagarariye inyungu zabo muri ikigitaramo (manager) uzwi nka Bosco mbere gato y’uko igitaramo kiba.

Ubukererwe bukabije na bwo bushobora kuba imwe mu mpamvu kuko igitaramo cyari giteganyijwe gutangira i saa 18h30’ cyatangiye i saa 21h30’, aha ntawatinya kuvuga ko hari n’abaje bakisubirirayo bigatuma umubare w’abitabiriye ugabanuka cyane.

Aba bahanzi bombi bamaze kwandika izina mu njyana ya hip hop dore ko umwe muri bo (Jay Polly) yanatwaye irushanwa rya Primus Guma Guma Supar Star ya 4 akaba yaherukaga gushyira hanze indirimbo yitwa "Ubuzima bwanjye" yakoranye na Ama G The Black ari na yo bitiriye Album yabo bamuritse kuwa 26 Kanama 2016.

Dore uko ubwitabire bwari bwifashe kumunsi wigitaramo mu mafoto

Aha ni muri ya myanya y’icyubahiro hari hambaye ubusa


Abari bitabiriye igitaramo bari bake cyane


Jay Polly na Ama G The Black kurubyiniro



Bosco ( i bumoso) wari uhagarariye imitegurirwe y’iki gitaramo

Yisangize Inshuti.

Ibitekerezo 3

Tanga Igitekerezo