Minisitiri Uwacu yasabye Indatabigwi guhiga bitari iby’umugenzo

Kuri uyu wa Gatatu tariki 12 Ukwakira 2016 mu muhango wo kuvuga amacumu (kugaragaza imihigo bazahigura) y’itorero ry’indatabigwi 2, Minisitiri w’Umuco na Siporo Uwacu Julienne yasabye ko iyo mihigo itaba umugenzo.

Umuhango witabiriwe n’abayobozi batandukanye mu nzego za leta harimo Minisiteri y’Umuco na Siporo,ibigo biyishamikiyeho, n’abafatanyabikorwa batandukanye.

Intore Tuyisenge umuyobozi w’ihuriro ry’abahanzi akaba n’umutoza yavuze ko iyi mihigo bizeye ko izagerwaho kuko babijeje kuzabafasha mu kuyesa.Yasabye abahanzi gukomeza kumva agaciro k’itorero.

D.r Vuningoma James, Umunyamabanga Nshingwabikorwa w’Inteko Nyarwanda y’Ururimi n’Umuco (RALC) wavuze imihigo y’itorero Indatabigwi icyiciro cya 2 yavuze ko abahanzi mu byiciro binyuranye biyemeje kuzakora byinshi biteza imbere igihugu n’umuco nyarwanda.

Yavuze ko MINISPOC n’ibigo biyishamikiyeho bazaba hafi y’abahanzi babagira inama, babashakira amahugurwa, abafatanyabikorwa, kubarinda abigana n’abigana ibihangano byabo.

Rucagu Boniface umuyobozi mukuru w’itorero ry’igihugu yashimiye abatekereje guhuza abahanzi ndetse ashimira abasoje itorero ry’indatabigwi 2 kuba barahize kuba abahanzi babereye u Rwanda.

Yasabye ko ibitaragenze neza byakosorwa ati: “Nabonye ibyiza byakozwe gusa sinabonye batubwira ibitaragenze neza ngo turebe uko twabikosora, dukwiye gushima tunagaragaza ibitaragenze neza bigakosorwa.”

Minisitiri w’umuco na Siporo Uwacu Julienne yashimiye abateguye itorero ry’indatabigwi, ashima imirimo yakozwe n’indatabigwi anabasaba ko ibyahizwe bitarangirira mu magambo.

Yagize ati: “ Ndasaba abatoza b’itorero n’indatabigwi ko tudasoje ahubwo imihigo ikomeje.. Igihugu kibategerejeho byinshi, Indatabigwi muri abarimu b’umuryango nyarwanda mushobora gufasha abanyarwanda binyuze muri iki cyiciro murimo. ibyo mwahize ntibizabe umugenzo”

Minisitiri Uwacu yabizeje ubufatanye bwa minisitere n’ibigo biyishamikiyeho hagamijwe guhindura ubuzima bw’indatabigwi n’igihugu binyuze mu buhanzi.

Itorero indatabigwi icyiciro cya 2 ryabaye kuva tariki 17-27 Nzeli 2016 ryitabirwa n’abahanzi bu byiciro bitandukanye.

JPEG - 181.1 kb
Abahanzi b’abatoza batandukanye bahagarariye abandi bari bitabiriye uyu muhango
JPEG - 112.9 kb
Minisitiri Uwacu, Rucagu Boniface na D.r Vuningoma James bashyira umukono ku mihigo y’intore
JPEG - 90.4 kb
Umukuru w’itorero ry’igihugu Bonniface Rucagu
JPEG - 118.7 kb
Abatoza bahagarariye abandi bahawe seritifika
JPEG - 118.2 kb
Habayeho n’akanya ko gusoma ku ntango
JPEG - 148.7 kb
Abitabiriye uyu muhango bafashe ifoto y’u Rwibutso
Yisangize Inshuti.

Ibitekerezo

Tanga Igitekerezo