Minisitiri Kanimba, Uwacu na Gashumba berekanye ubuhanga mu kubyina muri FESPAD [AMAFOTO]

Kuri uyu 01 Kanama 2016 ni bwo hatangijwe iserukiramuco Nyafurika ry’Imbyino (FESPAD) ku nshuro yaryo ya 9, aho ryaranzwe no gusabana byo ku rwego rwo hejuru hagati y’abayobozi bakuru b’igihugu ndetse n’abaryitabiriye mu mbyino zitandukanye.

Iserukiramuco Nyafurika ry’Imbyino (FESPAD) ryabimburiwe n’umutambagiro wa tangiriye kuri Club Rafiki I Nyamirambo uca mu duce twa Nyabugogo, Kicukiro Sonatube, banyura mu giporoso, usorezwa kuri Stade Amahoro aho abanyarwanda n’abanyasenegali bagendaga biyerekana.

Itsinda ry’abanyarwanda ryari rigizwe n’abasore bakora ubufindo bo mu Gatenga (Acrobate) aho bahuruje abantu ku mihanda ya Kigali kubera abagabo babiri bagenderaga ku biti byabagize barebare ku buryo uwareberaga kure yagiraga ngo ni abantu bo muri bibiliya bapimaga metero 6.

Umutambagiro wakurikiwe n’imurikabikorwa aho abantu batandukanye bamuritse ibyo bakora ariko bifite aho bihuriye no gusigasira umuco nyarwanda.

Igihe cyageze maze iserukiramuco riratangira abahanzi baririmba indirimbo zigezweho nka Jay Polly, Tonzi, itsinda ririmba injyana ya Lumba ryaturutse muri Kongo, bose basusurutsa abari aho.

Uretse aba bahanzi bavuzwe haruguru, hagaragaye n’abandi babyinaga imbyino zo mu muco nyarwanda nk’itorero Indatirwabahizi ry’umujyi wa Kigali, Iterero ry’Igihugu Urukerereza, itorero ryaturutse muri Senegal ndetse n’abaturutse ku kirwa cya Nkombo, bose bashimishije abanyakigali kubera imbyino zabo zitamenyerwe ariko nziza.

Aba babyinnyi bo ku Nkombo bageze aho bahagurutsa abayobozi bakuru bari bahari nka Minisitiri w’Umuco na Siporo, Uwacu Julienne, Minisitiri Francois Kanimba, Minisitiri Diane Gashuma, Minisitiri Judith Uwizeye, PS wa MINISPOC Lt Col Patrice Rugambwa, Vice Mayor w’Umujyi wa Kigali Busangizwa Parfait maze barabyina karahava, cyane cyane Minisitiri Kanimba wagaragaje ko ari umubyinnyi ukomeye.

FESPAD irakomereza mu karere ka Musanze kuri uyu 02 Kanama 2013, bukeye bwaho ibere mu turere twa Rusizi na Kayonza, ikazasorezwa I Nyanza ku wa 04 Kanama bucya hizihizwa umunsi mukuru w’umuganura nyir’izina.


Minisitiri Uwacu Julienne nawe yacinye akadiho


Minisitiri Diane Gashumba nawe yakaraze umubyimba


Min Kanimba yerekanye ko ari umubyinnyi ukomeye


Aba bagasore batangaje abantu


Buri wese yifuzaga gucyura agafoto kabo


Abanyasenegali mu mutambagiro


Abamurika ibikorwa binyuranye basobanurira Min Uwacu Julienne ibyo bamurika


Berekanye ko ku munsi w’umuganura ibyo kurya bitazabura


Ababyinnyi bo ku Nkombo


Abo ku Nkombo bashimishije abantu


Ababyinnyi baturutse muri Senegal babyinnye karahava

Arsene MUVUNYI

MAKURUKI.RW

Yisangize Inshuti.

Ibitekerezo

Tanga Igitekerezo