Kidumu yaciriwe amarenga ko ashobora kwicirwa i Burundi

Umuhanzi wo mu Burundi Kidumu aravuga ko hari abantu biyitirira ko barwanya Leta y’u Burundi bumubwiye ko bazamwica umunsi azaba yagiye gukorera igitaramo mu Burundi mu kwezi gutaha kwa Nzeri.

Mu butumwa burebure Kidumu yanyujije ku rubuga rwe rwa Facebook, yavuze ko hari abantu bamuteye ubwoba binyuze kuri Facebook bamubwira ko naramuka aje mu Burundi mu gitaramo ategerejwemo tariki 01 Nzeri 2016 i Bujumbura bazamwica.

Kidumu wagaragaje ko yarakajwe bikomeye n’abamuteye ubwoba, yavuze ko nta bwoba na buke atewe ko kuzajya mu gihugu cye cy’u Burundi, ngo ikibyimbye kizameneke ndetse ngo byaba ari n’amahire aguye mu gihugu cy’abakurambere be.

Yagize ati “Nzagera I Bujumbura tariki ya 01 Nzeri, urategura uko uzamesa (kwica) kuko nzaza mu gihugu cy’amavuko, uzaba umfashije kuko nzaba nguye mu gihugu cya sogokuru wanjye.”

Kidumu yakomeje avuga ko abo bamutera ubwoba ko bazamwica biyitirira abatavuga rumwe n’ubutegetsi bw’u Burundi atari bo kuko yabavumbuye kandi ko ntaho ahuriye n’ibibazo bya politiki biri mu Burundi kuko atari umunyapolitiki ahubwo ari umuhanzi.

Yagize ati “Bitegure neza ubikore kuko amayeri yo kwiyita amazina y’abarwanya Leta mukanyitiranya n’abari mu barwanya Leta nayamenye kera. Jyewe si ndi muri ayo mashyaka ya politiki, ntunzwe no kuririmba gusa nta kindi kintunze.”

Ubwo Kidimu yari mu Rwanda mu kwezi kwa Nyakanga 2016, yagaragaje ko ababajwe n’ibibazo by’umutekano muke biri mu Burundi n’ubwo yavuze ko atari umunyapolitiki.

Ibibazo by’umutekano muke mu Burundi bituruka kuri manda ya gatatu ya Perezida Nkurunziza itaremewe n’abatavuga rumwe n’ubutegetsi bwe.

Yisangize Inshuti.

Ibitekerezo

Tanga Igitekerezo