Jack B yemeye ko yandaritse umugore we ku karubanda abisabira imbabazi

Umuhanzi Rugamba Jacque uzwi nka Jack B yasabye imbabazi umugore we nyuma y’aho avuze ko batandukanye kubera ko ari umusinzi kandi akaba amuca inyuma.

Kuri uyu wa 12 Nzeli, nibwo Jack B abinyujije ku rukuta rwe rwa Facebook yanditse amagambo yuzuye umujinya aho yavugaga ko asenze umugore we ku mugaragaro bitewe n’uko atakimwubaha, ahubwo yibera mu tubari arya iraha n’abandi bagabo yise “ibisaza”.

Binyuze ku mbuga nkoranyamabaga abantu benshi berekanye ko batishimiye uburyo Jack B yashyize amabanga y’urugo rwe ku karubanda ndetse bamwe bakemeza ko ari uburyo bwo gushaka kuvugwa cyane.

Nyuma y’igihe gito Jack B yongeye gushyira kuri Facebook amagambo agaragaza ukwicisha bugufi no gusaba imbabazi avuga ko ibyo yakoze yahubutse ndetse umugore we ari umwere ibyavuzwe byose byari ukumuharabika.

Yagize ati: “Umugore wanjye ni umwere imbere y’Imana n’imbere yanjye. Ngusabye imbabazi kuba nahubutse nkavuga ibitari byo nanjye sinari ngambiriye kukubeshyera gusa byabaye umbabarire ndi umuntu, nakosheje cyane. Mbishyize aha nubundi kuko ari ho nabinyujije nkubeshyera. Abankunda n’abankurikirana mumbabarire, itangazamakuru naryo ndisabye imbabazi kuba natumye rikwirakwiza ibitari byo. Umuryango wanjye by’umwihariko ababyeyi n’abavandimwe ba Gisele hamwe n’abana banjye na bo mbasabye imbabazi.”

Kugeza ubu ntiharamenyekana ukuri ku cyateye Jack B guharabika umugore we ako kageni ndetse niba koko umugore we yemeye kumuha imbabazi.

Kugeza ubu Jack B afitanye n’umugore we Dr Juru Gisele abana babiri, umukuru bakaba baramubyaye muri 2013, ari nabwo biyemeje kubana bishyingiye, nyuma muri 2015 barasezerana. Kuri ubu bakaba bakibana nubwo Jack Bwe yari yavuze ko batandukanye.

Yisangize Inshuti.

Ibitekerezo

Tanga Igitekerezo