Inzira y’ubuzima bwa Tom Close nk’umuhanzi akaba n’umuganga

3

Muyombo Thomas umwe mu bahanzi bakunzwe cyane hano mu Rwanda.

Muyombo Thomas uzwi nka Tom Close, ni umugabo w’imyaka 29, akaba afite impano nyinshi zirimo iyo kuririmba, ni umwanditsi, umunyabugeni ndetse akabivanga n’umwuga we w’ubuganga.

Uyu muhanzi wavukiye mu gihugu cya Uganda, akaza mu Rwanda afite imyaka 7, yatangiye umuziki we mu mwaka wa 2004 kugeza kuri ubu akaba afatwa nk’umuhanzi ukunzwe mu njyana ya RNB.

Tom Close yavuze ko atigeze ahitamo gukora umuziki kuko byari impano ye.

Yagize ati: “ Sinigeze nicara ngo mpitemo kuba umunyamuziki, nabyiyumvagamo no mu gihe nari nkiri umwana, naririmbye muri korare zo mu rusengero nyuma naje kwisanga ndi muri studio ari na bwo muri 2004 natangiye gukora indirimbo yanjye ya mbere.”

Yakomeje avuga ko urugendo rwe rwa muzika rutari rworoshye dore ko kugera mu nzu itunganya umuziki byari bimugoye.

Yagize ati: “ Ntibyari byoroshye nk’ubu, kubona inzu itunganya umuziki nziza byari ingume, kubona ugutunganyiriza indirimbo byari bigoye gusa twagombaga kujya muri buri nzu itunganya umuziki ipfa kuba ifata amajwi.”

Yakomeje agira ati: "Ndibuka umunsi wa mbere njya gufata amajwi, namaze umunsi wose ntegereje, nageze ninjoro ntayafashe, byari imvune, sinari mfite amafaranga gusa urukundo nakundaga umuziki sinigeze mbibona nk’imbogamizi. Umushara nahembwe ndangije amashuri wari ibihumbi 30.000 nyamara gufata amajwi y’indirimbo byari ibihumbi 40.000 urumva ko nagombaga gutegereza amezi abiri.”

Ubumenyi ku gukora umuziki bwari buke ku buryo indirimbo yafataga igihe, aho yashoboraga gufata amezi ane ayitegereje gusa ngo yari afite umuvandimwe wifuzaga kuzatangiza inzu itunganya amajwi y’indirimbo akaba yaramusabye ko yamufasha.

Uko yaje kubona abafana

Kwigirira icyizere bivanzemo ijwi ryiza ni kimwe mu byatumye yigarurira imitima ya benshi. Mu mwaka wa 2008 ni bwo indirimbo ze zatangiye gukinwa ku maradiyo nk’umuhanzi wari ukunzwe aho twavuga nk’indirimbo ye Sibeza, Kuki, Mbwira, Sinarinkuzi yakoranye na mubyara we Mugisha Ben uzwi nka The Ben, ziri mu zatumye amenyekana cyane.

Uyu muhanzi ntiyamenyekanye biciye mu gukora cyane gusa ahubwo yagiye akoresha amwe mu mahirwe yari ahari nk’umuhanzi.

Yagize ati: “ Buri wese yifuzaga guteza imbere umuziki nyarwanda, abantu bakundaga ibyo bakoraga, amafaranga no kumenyekana ntibyari bihari gusa byari byoroshye kumenyekana ku muntu wari ufite ibintu byiza atanga. Kuri jye narabiharaniraga kandi nahoraga nshyira Imana imbere mu byo nakoraga byose , buri uko nanjyaga ku rubyiniro nafataga iminota yo gusenga ngasengera uburyo ngiye kuririmbamo.”

Uyu muhanzi avuga ko uko umuziki umeze kuri ubu bitandukanye na mbere bitewe n’uko amarushanwa yabaye menshi ari na bwo buryo bwiza bwo kwinjira mu ruganda rwa muzika nyarwanda bitagoranye.

Yagize ati: “ Buri wese abikundishwa n’uko harimo amarushanwa menshi, gusa njye nkunda ubu buryo, abahanzi benshi bamaze kwinjira muri muzika gusa inzira nyayo yo gutsinda ni ugukunda umuziki kurusha gukunda amafaranga. Icyo kwishimirwa ni uko umuziki w’u Rwanda ushimwa kandi bikaba byoroshye gufashwa.”

“ Zero distance” indirimbo ye ikunzwe

Tom close yagize ati: “Eddy Kenzo yazanye igitekerezo cy’uko twakorana indirimbo ubwo nari nagiye kuririmba muri Uganda muri 2013. Twaje gukora indirimbo duhitamo kuyishyira hanze umwaka ushize.”

Yakomeje agira ati: "Kenzo yabaye inshuti nziza, ni umugabo wiyoroshya utanywa inzoga cyangwa itabi kandi ni umuhanzi mwiza buri wese yafatiraho urugero ari na cyo cyatumye mwigiraho byinshi."

Tom Close umugabo wubatse


Tom Close n’umufasha we Tricia k’umunsi w’ubukwe bwabo

Uyu muhanzi yahisemo gukora ibyo abandi badakunze gukora atitaye ku myaka ye bituma ahindura uburyo bw’imibereho ye afata inshingano ari byo byatumye ashinga urugo rwe.

Ati: "Simfata ubuzima nk’akazi gusa, hari ubuzima ngomba kubamo kabone naho ntaba umuhanzi cyangwa umuganga, buri wese agira igihe cye cyo kubaka urugo, kuri njye kubaka urugo ni kimwe mu bice by’ubuzima ngomba kubamo."

Yakomeje agira ati: " Nkunda umuryango wanjye kandi mpora ngerageza kuba umubyeyi n’umugabo mwiza. Nzishima cyane nimbona umukobwa wanjye akoze umuziki mu gihe azaba akuze gusa bizaba mu gihe azaba abikunze kuko sinabimuhatira na none agomba kwihitiramo. »

Muyombo Thomas kuri ubu ni umuganga

Ni bake babasha kuvanga umurimo w’ubuganga n’umuziki gusa uyu muhanzi yabashije kubikora byombi kandi arabikunze.

Agira ati:"Nasezeranije mama wanjye kuzaba umuganga ninkura ubwo nari mfite imyaka 7, mama wanjye yahoraga ababazwa n’uburwayi najye nakundaga kumuba hafi bigatuma mererwa nabi ubwo namubonaga ababara, byatumye musezeranya ko nzaba umuganga kabone n’ubwo ntazavumbura umuti ariko numvaga nzamufasha agakira bituma nkura mbyiyumvamo."

Ibyo ateganya kugeraho

Uyu muhanzi ateganya gushaka impamyabumenyi yo mu cyiciro cya kabiri cya kaminuza n’ubwo atarahitamo ishami azigamo kandi ateganya gukora n’izindi ndirimbo nyinshi.

Tom Close avuga ko azareka umuziki mu gihe umwe mu bana be azinjirira mu muziki hanyuma akamufasha.

Mugemanyi Jean Paul

MAKURUKI.RW

Yisangize Inshuti.

Ibitekerezo 3

  1. Anxious Igitekerezo mama wawe c aracyariho? gusa courage nibyiza kdi ujye uharanira kuririmba indirimbo zigite msg ureke bimwe byababandi ngo umuriro watse shenge we umuriro watse nyabusa we ubwo c iyo ni msg yihe? Hhhhhhhh

Tanga Igitekerezo