Ibitaramo by’I Kigali n’I Goma byakije umuriro muri P Square

Peter Okoye umwe mu bagize itsinda P Square yatangaje ko ataje kuririmbira I Kigali no muri Kongo kubera ikibazo yari afitanye n’abateguye ibyo bitaramo byombi ndetse ko yiteguye kubajyana mu nkiko ku bwo gukoresha izina rye nta burenganzira yabahaye.

Tariki ya 08 Nyakanga 2016 ni bwo Umuhanzi Paul Okoye wo mu Itsinda rya P Square yakoreye igitaramo mu mujyi wa Goma muri Repubulika iharanira Demukalasi ya Kongo ariko akaba atari kumwe n’impanga ye Peter Okoye wari wasigaye muri Nigeriya.

Byari biteganijwe kandi ko babanza gutaramira mu Rwanda nyuma bakajya muri Kongo ariko Paul Okoye yageze I Kigali ari wenyine bivugwa ko impanga ye itaje ku mpamvu zo kubura indege.

Abinyujije ku rubuga rwe rwa Instagram, Peter Okoye yavuze ko impamvu ataje kuririmba mu Rwanda ndetse no muri Kongo ngo byatewe n’uko mu masezerano bari kugirana n’abateguraga ibyo bitaramo hari ibyo batumvikanagaho, bityo we ko atagombaga kugaragara mu gitaramo ndetse n’izina rye ngo ntiryagombaga kwamamazwa muri ibyo bitaramo.

Yagize ati “Sinigeze nemeza ikoreshwa ry’izina ryanjye kuko mu masezerano hari ibyari bimbagamiye kuko mu masezerano hari ibitari byiza kuri njye, bityo si ndi mu gitaramo cyafashwe n’uwahoze ari umujyana wacu Jude kandi mbikuyeku mutima nitandukanyije n’ikoreshwa ritemwe ry’izina dufatanyije (P Square) ku kumenyekanisha ubucuruzi nta ruhushya rwatanzwe.”

Peter yavuze ko kuba byaravuzwe ko yabuze indege ndetse ko yaba anarwaye ari ibinyoma byambaye ubusa kuko ari muzima ndetse ko ateganya kujya mu nkiko akarega abakoresheje izina rye mu buryo butemewe n’amategeko.

Yagize ati “ Ibinyoma bagiye bavuga ko ntitabiriye igitaramo kubera ko ndwaye kandi nabuze indege intwarana n’abandi dufatanyije, ndashaka ko kuvuga ko ndi muzima 101%. Nzajyana mu mategeko mu minsi iza abamamaje ndetse n’abateye inkunga iki gikorwa.”

Nta gihe kinini cyari gishize izi mpanga zigize P Square zitangaje ko zitandukanye ariko nyuma zikiyunga, gusa ubwumvikane buke bukunze kubaranga buturuka ku mafaranga ariko na none bugaturuka no kutumvikana ku mujyanama wabo Jude Okoye ukundana cyana na Paul Okoye akaba azirana na Peter Okoye.

Yisangize Inshuti.

Ibitekerezo

Tanga Igitekerezo