Eddy Kenzo yavuze ko yariganyijwe igihembo muri MTV Africa Music Awards

Umuhanzi Eddy Kenzo yatangaje ko mu gutanga ibihembo bya MTV Africa Music Awards byatangiwe muri Afurika y’Epfo hajemo uburiganya kuko uwatwaye igihembo mu cyiciro yahatanagamo atari yamurushije amajwi.

Kuwa Gatandatu w’icyumweru dusoje nibwo mu mujyi wa Johannesburg muri Afurika y’Epfo habereye umuhango wo gutanga ibihembo ku bahanzi b’Abanyafurika bitwaye neza muri uyu mwaka wa 2016.

Eddy Kenzo wo muri Uganda wari mu cyiciro cya “Best Live Act” ntiyabashije kwegukana iki gihembo kuko cyatwawe n’Umunyafurika y’Epfo Cassper Nyovest ariko Eddy Kenzo yagaragaje ko atabyishimiye.

Eddy Kenzo yavuze ko ari we wari ufite amajwi menshi nk’uko byagaragaraga ku mbuga zatorerwagaho, ariko agatungurwa no kubona ari we uhawe ibihembo.

Byongeye kandi ngo yarakoze cyane muri uyu mwaka, ngo ibi asanga byaratewe nuko yamamariza sosiyete y’itumanaho ya Airtel mu gihe uwahawe igihembo yamamariza MTN kandi ari yo itera inkunga iki gikorwa.

Yagize ati “ Namamariza Airtel, MTN ni umuterankunga mukuru wa MAMAS kandi uwatsinze mu cyiciro nari ndimo yamamariza MTN muri Africa y’Epfo, ubwo hari icyo mutumva! Nataramiye mu bihugu 35 kandi 10 muri byo sitade zaruzuye, ikindi ni iki? Batubwiye gutora abafana banjye barabikora, nari uwa mbere Stonboy ari uwa kabiri, Flavour ari uwa gatatu, Caspa ari uwa kane.”

Eddy Kenzo yashimiye abakunzi be bamutoye n’ubwo atabashije kuba yakwegukana igihembo kubwe yumva ko yari akwiriye gutwara.

Abagande nka Bebe Cool na Sheebah Karungi, Umutanzaniya Diamond Platinamuz nabo batashye amarasa masa, cyo kimwe n’Umunyarwanda Meddy wari mu cyiciro cya Listeners Choice.

Sauti Sol yo muri Kenya yatwaye igihembo cy’itsinda ryitwaye neza muri Afurika.

Yisangize Inshuti.

Ibitekerezo

Tanga Igitekerezo