Dj Pius ntiyemera ko indirimbo ye ari yo yagejeje Chameleone mu marushanwa ya AFRIMA

Umuhanzi Dj Pius aravuga ko kuba Chameleone yatoranyijwe mu bahanzi bahatanira ibihembo bya AFFRIMA Awards bitatewe n’indirimbo Agatako bafatanyije ahubwo ngo ni uko ariyo igezweho muri iyi minsi Chameleon yaririmbyemo.

Ibihembo bya AFRIMA bigiye gutangwa ku nshuro ya gatatu bikaba bihabwa abahanzi bitwaye neza mu bice bitandukanye bya Afurika ari na ho umuhanzi Chameleone yagaragaye mu cyiciro cy’umuhanzi wo muri Afurika y’Uburasirazuba witwaye neza ndetse ku ruhande rw’izina rye hakabaho indirimbo Agatako yakoranye na Dj Pius wo mu Rwanda.

Abantu batandukanye bakomeje kuvuga ko kuba Chameleone yageze mu bahatanira ibi bihembo abikesha indirimbo ya Dj Pius Agatako dore ko ari na yo imwanditseho.

Gusa nubwo benshi bavuga ibyo, mu kiganiro MAKURUKI yagiranye na DJ Pius yahakanye ko iyi ndirimbo Agatako ari yo yatumye Chameleone ahamagarwa mu bahatanira ibihembo bya AFRIMA ahubwo ngo byatewe nuko iyi ndirimbo ari yo igezweho mu zo Chameleone yaririmbyemo na ho kugirango umuntu atoranywe bareba kuri byinshi ntabwo bareba indirimbo imwe.

Yagize ati: “Kuvuga ngo ni yo yatumye bamutora ntabwo ari byo kuko bamufashe nk’umuhanzi ukora neza muri East Africa, iyo bagufashe bareba indirimbo yawe igezweho muri icyo gihe bakayikwandikaho ntabwo rero ari ukuvuga ngo ni yo iba yatumye ujyayo.”

Dj Pius yongeraho ko kuba indirimbo ye ari yo ihagarariye izindi mu zaririmbwe na Chameleone mu bihembo bya AFRIMA, byamushimishije ndetse ko byerekanye ko abahanzi nyarwanda na bo bafite agaciro.

Yagize ati: “ni byiza ahubwo ngize Imana yazamugeza n’ahandi kubera ko ni bwo azamenya n’agaciro ko kuba twarafatanyije.”

Muri ibi bihembo bya AFRIMA Chameleone ahanganye na Ali Kiba na Diamond bo muri Tanzaniya na Bebe Cool, Eddy Kenzo na Navio bo muri Uganda.

Indirimbo Agatako yarakunzwe cyane muri Uganda n’ahandi muri Afurika dore ko yaciye ku mateleviziyo mpuzamahanga atandukanye akora ibijyanye na muzika.

Yisangize Inshuti.

Ibitekerezo

Tanga Igitekerezo