Inzira y’inzitane umuhanzi Diamond Platnumz yanyuzemo mu muziki we

10

Nkuko buri muntu wese aho ava akagera agira ibiranga ubuzima yaciyemo kuva avutse kugeza aho Imana iba ikimutirije ubuzima, ni na ko umuhanzi w’icyamamare muri muzika ya Tanzaniya Diamond Platnumz hari byinshi byamuranze kuva avutse kugera magingo aya.

Amavu n’amavuko ye

Amazina ye nyakuri yitwa Nasibu Abdul Juma umugabo w’imyaka 26, avuka kuri Kasimu na Sanura Kasimu. Yavutse tariki 2 Ukwakira 1989, avukira Tandale, Dar es Salaam muri Tanzaniya.

Yakuriye ahitwa Tandale abana na mama we na Nyirakuru. Yakuze atabana na se kuko ababyeyi be bari baratandukanye bitewe n’amakimbirane bari barananiwe gukemura.

Yarangiye kwiga mu ishuri ry’ibitambambuga mu 1995, mu kigo cyitwa Tandale Magharibi Primary School ahitwa i Kigoma anahakomereza amashuri abanza.

Yaje gukomereza ayisumbuye mu mujyi wa Mwanza mu gihugu cya Tanzaniya ayasoza muri 2006.

Nyuma yo kurangiza amashuri yisumbuye yasise akabya inzo ze yinjira mu muziki yari yararose kera.

Inzira y’inzitane yanyuzemo kugirango agere ku nzozi ze

Kuva akigera mu mwaka wa 5 w’amashuri abanza, Diamond yatangiye kugaragaza impano ye y’ubuhanzi, aho yajyaga akunda kuririmba indirimbo z’abandi bahanzi akanigana uko bitwara k’urubyiniro.

Ibi byaje kumwokama maze akajya yitabira ibirori bito bito akigana indirimbo z’abahanzi bo muri Tanzaniya n’ab’abandi mpuzamahanga bikamufasha gushimisha abantu na we ubwe akishima kuko yakundaga kuririmba cyane.

Mama we yamuguriye imizingo y’indirimbo akunda ndetse zimwe akazimwandikira kugirango bimworohere kuziririmba.

Mama we yatangiye kujya amujyana ahabereye amarushanwa n’ibitaramo bitandukanye nubwo umuryango we utabishakaga kuko ngo babonaga umuziki atari umwuga watunga umuntu.

Inzira ye y’ubuhanzi ntiyamworoheye kuko muri 2007 ni bwo yatangiye kureba uko yajya muri sitidiyo gukoresha indirimbo ye ya mbere kandi nta mafaranga na make yari afite dore ko yari akirangiza amashuri ari n’umushomeri.

Ibi byatumye atangira gucuruza imyenda yambawe ibyo mu Rwanda twita ubuzunguzayi, ndetse n’utundi tuntu twamuhesha amafaranga.

Amafaranga yakomeje kuyabura agera aho ajya no mu rusimbi kugirango abone amafaranga yo gukoresha indirimbo ye ya mbere ariko nubundi kuyagwiza bikomeza kumubera ingume.

Ibi byatumye ahitamo kugurisha umukufi wa nyina wa zahabu awumwibye rwihishwa bituma abona amafaranga yo gukora indirimbo ye ya mbere.

Indirimbo yakoze bwa mbere ntiyamenyekanye kuko na we yari ataramenyekana ariko ngo yamufunguriye amarembo yo kwinjira mu muziki kuko yahise anabona umujyanama (Manager) Chizo Mapene wiyemeje kufasha ku buntu.

Bahise bemeranya gukorana kugeza akoze umuzingo (lbum) ariko biza kwanga bitewe no kubura amafaranga batandukana umuzingo atawukoze ariko hari indirimbo yari amaze gukora ariko icyo gihe asubira inyuma ndetse n’umukobwa bakundanaga ahita amwanga.

Muri 2009, ni bwo Diamond yahuye na Msafiri Peter bakunze kwita Papaa Misifa amwemerera ubufasha bwose bw’amafaranga maze ahita ashyira hanze indirimbo yakunzwe cyane yitwa “Nenda Kamwambie" mu kinyarwanda bivuze ngo Genda umubwire.

Iyi ndirimbo yayihimbye acyurira umukobwa wari waramwangiye ko akennye ndetse ni na yo ndirimbo yamufunguriye amarembo akomeza umuziki we agera aho ageze ubu.

Ubuzima bwe amaze gufatisha

Diamond yakunze kurangwa n’inkundo za hato na hato kugeza ubwo yakundanye n’umukobwa bakaza no kuryama nyuma aza gusanga ari mushiki we imiryango ikemeza ko batandukana ndetse ko batagomba kubana.

Nyuma gato yo gutandukana na Wema Sepetu, yahise yifatira icyemezo cyo gukundana na Zari wiyita The Lady Boss kuri ubu bafitanye umwana w’umukobwa witwa Princess Tiffah

Diamond yamenyekanye cyane mu njyana ya afropop mu ndirimbo nka Lala salama, Moyo wangu, Kesho, Number one n’izindi nyinshi.

Kuri ubu uyu muhanzi abarizwa mu nzu itunganya umuziki izwi ku izina rya WCB (Wasafi Classic Baby) akaba ari na we ibarurwaho nk’umutungo we bwite.

Diamond kandi azi gucuranga ibicurangisho by’umuziki bitandukanye birimo piyano, gitari n’ingoma.

Azwiho kandi kuba yarakoranye n’abahanzi benshi batandukanye bo mu karere ndetse no ku rwego mpuzamahanga. Aha twavuga nk’umuhanzi Mico the Best w’umunyarwanda, Davido, Iyanya, Flavour, Psquare, Papa Wemba n’abandi.

Yaranzwe kandi no kuzamura abahanzi bakorera mu nzu ye itunganya umuziki. Mu bazwi yakoranye na bo twavuga nka Homonize, Rich Mavoko,Rayvanny n’abandi.

Diamond kandi azwiho kuba yaritabiriye amarushanwa menshi atandukanye nka Tanzania music awards, BET Awards, Channel music video awards, MTV awards ,Tanzania People’s Choise Music Awards n’andi menshi.

Kuva uyu muhanzi yatangira umuziki yavuzweho byinshi bibi nko kwiba indirimbo z’abandi bahanzi, gukorana n’imyuka ya sekibi, gucuruza ibiyobya bwenge ndetse no gukoresha amarozi cyane cyane ku bakobwa ngo bamukunde, gusa ibi byose we arabihakana akemeza ko byose ari Rurema ubimushoboza.

Si umuziki gusa uyu muhanzi Diamond azwiho kuko anazwiho kuba ari umucuruzi w’imyenda wo ku rwego rwo hejuru aho acuruza imyenda y’abanyamideli aho ngo akura amafaranga atari make.

Kuri ubu, Diamond Platnumz ahugiye mu mishinga y’indirimbo nshya afitanye n’umuhanzi w’umunyamerika Neyo bise "Marry you"aho iri gutunganyirizwa amashusho.

Kanda hano urebe ifatwa ryaya mashusho yindirimbo "Marry you"

Yisangize Inshuti.

Ibitekerezo 10

  1. Sha nukuri urakoze nari nkeneye amakuru yuyu musitari iyi nkuru wayitondeye urumuhannga pe

Tanga Igitekerezo