Christopher yamaze gusezera muri Kina Music

Christopher wamaze gusezera muri Kina Music

Umuhanzi Muneza Christopher yatangaje ko yamaze gutandukana n’inzu yamufashaga mu buhanzi (label) ya Kina Music.

Byakunze guhwihwiswa ko Christopher yaba yarasezeye muri Kina Music ariko yaba nyir’ubwite na Kina Music bakabihakana.

Kuri uyu wa Mbere abinyujije ku konti ye ya Instagram, Christopher yatangaje ko inyungu ze zitagicungwa na Kina Music ya Ishimwe Clement.

Yanditse ati “Nyuma y’ibiganiro hagati y’ubuyobozi bwa Kina Music na Christopher birebana n’ahazaza he, impande zombi zumvikanye guhagarika amasezerano zari zifitanye. Kuva ubu inyungu z’umuhanzi Christopher ntizigihagarariwe na Kina Music.”

Yashimiye kandi Ishimwe Clement avuga ko yamubereye ibuye ry’ifatizo mu muziki we.

Ati “Warakoze cyane ,Sinzigera nibagirwa ko ari wowe twubakanye Fondation y’Umuziki wanjye.”

Christoper asezeye nyuma y’iminsi mike Ishimwe Clement na Knowless Butera umwe mu bahanzi bakorera muri Kina Music bambikanye impeta.

Biravugwa ko Christopher yaba yasezeye nyuma yo kubona ko atazakomeza kwitabwaho uko bikwiye.

Muneza Christopher ukunzwe cyane mu ndirimbo z’urukundo wanabaye uwa kabiri muri Primus Guma Guma Superstar, yari amaze imyaka itanu muri Kina Music.

Iyo nzu yayibanagamo na Tom Close, Dream Boyz na Butera Knowless.

Yisangize Inshuti.

Ibitekerezo

Tanga Igitekerezo