Anne Kansiime na Arthur basekeje abantu bataha bafatiriye imbavu (Amafoto)

Kuri iki cyumweru tariki 24 Nyakanga 2016, ni bwo habaye igitaramo cyo gusetsa cyahuje Anne Kansiime na Arthur Nkusi basanzwe bamenyerewe mu gusetsa abantu, bakaba basekeje benshi bari baje kubareba batashye bigaragara ko bakinyotewe.

Iki gitaramo cyabimburiwe n’abaririmbyi bo mu Rwanda barimo Yvan Bravan washimishije abantu mu ndirimbo ye Malayika na Urwo Ngukunda; aho yakurikiwe na Dj Pius ndetse na Charly na Nina.

Abahanzi bakimara kuririmba umunyarwenya Chipkizy wo muri Kenya yagiye ku rubyiniro maze asetsa abantu mu gihe cy’iminota 30 maze ahamagara Arthur nyir’igitaramo wari utegerejwe n’abantu benshi.

Arthur yageze ku rubyiniro abantu bose barahaguruka bamuha icyubahiro, ubundi aratangira akora mu gaseke k’inzenya ze zivuga ku ngingo zitandukanye kuva kuri politiki, iyobokamana, siporo, abahanzi ndetse no ku babyeyi yaboneyeho gushimira uburyo bamufashije kugera aho ageze ubu.

N’ubwo inyinshi mu nzenya Arthur yateraga zari ziganjemo izo asanzwe avuga mu bitaramo ajya akora ndetse no kuri radiyo abantu bamwishimiye cyane.

Arthur akimara kuvaho hagombaga gukurikiraho umushyitsi mukuru Anne Kansiime wari waturutse muri Uganda, ariko yabanjirijwe na mugenzi we witwa Clotilda na we wo muri Uganda n’ubwo atari azwi n’abantu benshi, gusa nawe inzenya yateye zashimishije abantu.

Anne Kansiime yashyize araza yambye agakanzu k’igitenge kakorewe mu Rwanda maze asetsa abantu karahava mu mbyino ze zisekeje no mu gusetsa abantu bigaragara ko amaze kubizobera kuko mu nzenya nyinshi yateraga yazikomoraga mu bantu baje kumureba.

Ubwo Anne Kansiime yari ku rubyiniro cyari igihe cy’imbeho ikabije ndetse n’imvura yagwaga ariko abantu ntacyo byari bibabwiye kuko kubasetsa kwe kwa hato na hato ntikwari gutuma bumva imbeho.

Anne Kansiime yaherukaga gutarimira mu Rwanda mu mwaka ushize ubwo yari kumwe n’umurundi Kigingi.


Arthur yinjiye ku rubyiniro yiyoberanije


Arthur yashimiye nyina umubyara


Kansiime yabanje akuramo inkweto ndende yari yambaye


Kansiime yatangiye abyina


Kansiime abyininana na Clotilda


Chipkizy wo muri Kenya


Sandrine Isheja n’umugabo we basetse bajya hasi

Yisangize Inshuti.

Ibitekerezo

Tanga Igitekerezo