Active ntizuyaza kwishyuza abakunzi babo mu bitaramo babatumiramo

Miss Vanessa umukunzi wa Olvis uririmba mu itsinda rya Active, aravuga ko mu gihe baba bateguye igitaramo na mugenzi we Sandra Teta na we ufite umukunzi muri iri tsinda, ngo ibyo urukundo baba babishyize ku ruhande kuko babishyura nk’abandi bantu bose baba bahawe ibiraka muri icyo gitaramo.

Hashize iminsi itari myinshi itsinda rya Active (Olvis, Derek na Tizzo) bose barekanye abakunzi babo ndetse by’umwihariko babaye aba Miss mu byiciro bitandukanye n’ubwo bitateye kabiri Tizzo akivanamo akemeza ko nta mukunzi agira.

Miss Sandra Teta na Miss Vanessa Uwase bakunze gutegura ibirori bitandukanye ndetse muri ibyo birori ntihajya haburamo abahanzi bo mu itsinda Active bafitemo abakunzi.

Mu Kiganiro Makuruki.rw yagiranye na Vanessa nyuma y’ibirori bya Industry Night, yadutangarije ko kuba Active igaragara muri buri birori bateguye atari ukwanga gukoresha amafaranga menshi ahubwo batumirwa kuko ari abahanzi beza ndetse bakishyurwa kimwe nk’abandi.

Yagize ati “kuba dutumira Active ni uko ari abahanzi beza kandi iyo twakoze igitaramo baba ari nk’abandi bose twakoresheje n’ubu twabishyuye.”

Vanessa yongeyeho ko baramutse batabishyura Tizzo udakundana n’umwe muri aba bakobwa yaba abihomberamo kuko urukundo rwabo rudashobora kwica akazi ka buri umwe.

Nyuma ya Clement na Knowless baherutse kwemeza ko bazabana mu gihe cya vuba, urukundo rwa Sandra Teta, Miss Vanessa Uwase n’abasore bo muri Active ni rwo rukunze kuvugwa cyane dore ko bakunze kuba bari kumwe ahantu henshi ndetse badahwema no guterana imitoma babinyujije ku mbuga nkoranyambaga.

Yisangize Inshuti.

Ibitekerezo

Tanga Igitekerezo