Abadepite babajije Rwanda Revenue icyabuze ngo igaruze miliyari 21 zimaze imyaka ine

Amafaranga y’u Rwanda agera kuri Miliyari 21 ni yo yagaragajwe muri raporo y’umugenzuzi mukuru w’imari ya Leta yo muri 2015/2016 ikigo cy’igihugu gishinzwe imisoro n’amahoro cyananiwe kugaruza mu basoreshwa batandukanye.

Kuri uyu wa 05 Ukwakira 2016 abakozi b’ikigo cy’igihugu cy’imisoro n’amahoro (RRA) cyitabye abadepite bagize komisiyo ishinzwe kugenzura ikoreshwa ry’imari n’umutungo wa Leta (PAC) ngo batange ibisobanuro ku makosa yagaragajwe n’umugenzuzi w’imari ya Leta mu ngengo y’imari y’umwaka wa 2015/2016.

Ibibazo byinshi bigaragara muri iyi raporo ngo bikomoka ku bushobozi bukwe bw’abakozi b’ikigo cy’imisoro n’amahoro RRA.

Visi Perezida wa PAC Hon Karenzi Theoneste yagaragaje ko RRA yagize intege nke mu kugaruza akayabo k’amafaranga arenga Miliyari 21 amaze imyaka ine yaramenyakanishijwe n’abasora ariko ntakurikiranwe ngo azanwe mu isanduku ya Leta.

Muri izi Miriyari 21, harimo agera kuri miliyari 3 na miliyoni 800 zimaze imyaka 10 zitarishyuzwa abasoreshwa.

Yakomeje avuga ko bitumvikana ukuntu hari urutonde rw’abasora bazwi bamenyekanishije imisoro nyamara RRA ntibashe kubakurikirana ngo ikusanye iyo misoro, ibintu Karenzi afata nko kugaragaza ubushobozi bucye mu bakozi.

Yagize ati “ikindi kibazo ni ikijyanye n’intege nke mu gukurikirana imenyekanishamisoro. Hari abantu bamenyekanisha imisoro ariko ntimukurikirane kubishyuza imisoro, hano hari abasora 104 n’amazina yabo arahari barazwi banamenyekanishije imisoro, kuki badakurikiranwa ngo bishyure?”

Komiseri mukuru wa RRA Richard Tusabe yemeye ko habayeho intege nke za RRA mu kwishyuza iyo misoro avuga ko ahanini byari byaratewe n’abakozi bake gusa ngo iki cyamamaze gukemura dore ko ngo abari bashinzwe kwishyuza imisoro bongerewe ho abakozi 10 bakaba kuri ubu ari 15.

Izindi mpamvu Tusabe yagaragaje ko zatumye RRA itabasha kugaruza ayo mafaranga ngo ni ukuba batabasha guteza mu cyamunara imitungo y’usora wananiwe kwishyura imisoro, ibintu bibasaba kujya mu nkiko kandi na byo bitwara igihe kinini kuko abo baburana batitaba.

Ikindi gikomeye RRA yagaragaje nk’igituma imisoro idakusanyirizwa igihe ngo ibihano biremereye bihabwa abasora igihe batinze gutanga imisoro bikaba bituma abasora bareka ubucuruzi bakoraga bagatangiza ubundi.

Yagize ati: “mu by’ukuri iyo umuntu akererewe kumenyakanisha umusoro umunsi umwe harimo impamvu nyinshi, comptable ashobora kurwara, mudasobwa ishobora kugira ikibazo, iyo umuciye rero 60% ku munsi umwe usanga mu by’ukuri atari ibintu biteza imbere busness (ubucuruzi)."

Yongeyeho ati “icya kabiri ni uko imyishyurire y’ibirarane itegeko rivuga ko uyu umunsi uwishyura ibirarane abanza kwishyura ibihano yarangiza akishyura inyungu mbere y’uko yishyura umusoro nyir’izina, icyo bivuze ni iki, za nyungu zihora zivuka ugasanga umuntu waciye umusoro wa miliyoni 100 umuciye miliyoni 600.”

Hon Depite Nkusi Juvenal yasabye ko ibi bihano byagabanywa nk’uko byagabanyijwe ku bihano bihabwa abakoresheje nabi akamashini gatanga inyemeza buguzi kazwi nka EBM, abayobozi ba RRA bemeza ko biri gukorwa.

Iyi raporo y’umugenzuzi w’imari kandi yagaragaje ko hari abantu bacuruza bagera ku bihumbi 7 bakora ubucuruzi ariko batanditswe na RRA ndetse n’abandi bacuruzi bagera ku bihumbi 2 bakabaye bakoresha EBM ariko batazikoresha. Muri abo harimo ama banki, ibigo by’itumanaho na sitasiyo z’ibikomoka kuri peteroli.

Komiseri mukuru wa RRA yavuze ko icyatumye ibi bigo by’ubucuruzi bidahabwa EBM ari uko ikoranabuhanga rikoreshwa muri ibyo bigo ritabashaga guhura neza n’iry’akamashini gatanga inyemezabuguzi ka EBM.

Abadepite basabye ko RRA yazajya kwigira mu bindi bihugu aho iryo koranabuhanga ryashobotse maze bigatangira gushyira mu bikorwa.

Abadepite bagize PAC bumva ibisobanura bya RRA

Yisangize Inshuti.

Ibitekerezo

Tanga Igitekerezo