Rutsiro: Inguzanyo bise “Umusheto” igiye kubamaraho imitungo

Ibiro by’umurenge wa Kivumu

Abaturage batuye mu Murenge wa Kivumu, Akarere ka Rutsiro baravugwaho kugira umuco wo kuguza amafaranga afite inyungu yikubye kabiri ariyo bita umusheto, uyu muco ngo ukaba umaze kubakenesha bitewe n’uko ubuze icyo yishyura bafatira bimwe mubyo atunze bihwanyije agaciro cyangwa se birusha agaciro amafaranga yagujije.

Bamwe mu baturage baganiriye na Makuruki bakomoka muri uyu Murenge wa batangaje ko ikibazo cy’Umusheto gikomeje kubakenesha kubera ko iyo babuze ayo kwishyura baza kugurisha ibyo baba bafasheho ingwate.

Umwe yagize ati: “ Tugiye gukenyuka rwose, iyo udafashe Umusheto, umugabo wawe arawufata, cyangwa umwana wawe akawufata kandi ikibazo iyo ubuze ayo kwishyura bahita bagurisha n’agahene wari ufite[…..] Nta kundi twagira ureba kwicara udafite icyo gukora ugapfa kwaka mugenzi wawe ako gafaranga[…..] hari igihe wunguka ariko kenshi turahomba.”

Undi yagize ati: “ Njye umusheto maze kuwufata kabiri gusa nahombye rimwe[….]Nari navuze ko nimpomba nzamuha ihene nari mfite kuko twayibariye dusanga byahura."

Benshi muri aba baturage kandi bavuga ko bahangayikishijwe n’uyu muco umaze gufata intera muri uyu murenge.

Uwizeyimana Josephine ahagarariye Inama y’Abagore mu Murenge wa Kivumu yavuze ko ikibazo cy’Umusheto gihari, icyakora ngo bari guharanira kubica binyuze mu bagore cyane ko ari bo bakunze gufata iyi misheto.

Yagize ati: “ Abagore bo mu Murenge wa Kivumu duhereye kuri buri Mudugudu twashyizeho amatsinda aribyo bita Ibimina. Buri mugore wo mu Mudugudu hari itsinda abarizwamo yagira ikibazo bakamuha amafaranga, aya matsinda agenda akura ashobora kuzavamo amakoperative akomeye. Ibi twabikoze kugira ngo duce umuco bagira wo kujya hanze bakaka umusheto[….]Umusheto ni kwa kundi umuntu agenda agafata amafaranga ahantu bajya ku mwaka inyungu bakamwaka inyungu yikubye kabiri.”

Umunyamabanga Nshingwabikorwa w’Umurenge wa Kivumu Bisangabagabo Sylivestre yagaragaje ko kwizigama, gutinyuka kugana ibigo by’imari iciriritse no guhanga imishinga bikiri ikibazo ku bagore aho abagore bageze kuri 55% naho abagabo bakaba bari kuri 70%.

Ubwo Minisiteri y’uburinganire n’iterambere ry’umugore (MIGEPROF) yasuraga uyu murenge wa Kivumu tariki 23 Nzeli 2016, Karekezi Alfred umukozi wa MIGEPROF yasabye aba baturage cyane cyane abagore kwitinyuka bagahanga imishinga cyane ko abagore baborohereje gufata inguzanyo bafashijwe n’ibigo by’imari nka BDF.

Mugemanyi Jean Paul

MAKURUKI.RW

Yisangize Inshuti.

Ibitekerezo

Tanga Igitekerezo