Miliyari zisaga esheshatu zimaze kunyerezwa hakoreshejwe EBM, hari abafashwe

Ikigo cy’igihugu gishinzwe gukusanya imisoro n’amahoro mu Rwanda (RRA) cyaburiye abacuruzi bakorana na sosiyete 25 zicura inyemezabuguzi za EBM zifasha abacuruzi kunyereza imisoro ku nyongeragaciro ko ibikorwa byabo by’uburiganya byamaze kumenyekana kandi ko inzego z’ubutabera ziri kubakurikirana."

Komiseri mukuru wungirije w’ikigo cy’igihugu cy’imisoro n’amahoro (Rwanda Revenue Authority, RRA) Bizimana Ruganintwali Pascal yavuze ko hari abantu benshi badakoresha neza imashini zitanga inyemeza buguzi hakaba n’abazikoresha bagamije kunyereza imisoro bikagira ingaruka kubijyanye no gukusanya umusoro ku nyongeragaciro.

RRA iravuga ko yavumbuye amasosiyete atanga inyemezabuguzi za EBM z’impimbano, akaziha abacuruzi (na bo bazwi) zigaragaza ko hari ibicuruzwa byacurujwe cyangwa byaguzwe kandi bitigeze bibaho bagamije gukwepa imisoro ku nyongeragaciro (TVA).

Asobanura imikorere y’aya masosiyete, komiseri Ruganintwali yagize ati: “Kugeza ubu tumaze kubona abantu cyangwa sosiyete zigera kuri 25 tubona bagenda bagaragaraho ibikorwa bigayitse bifite ingaruka zikomeye ku bijyanye no gukusanya imisoro kuko babikora bagamije kwiba umusoro kandi bakabikorana n’abacuruzi na bo bazwi bagamije gukwepa umusoro.

Yakomeje agira ati: “Ni abantu baguze utumashini twa EBM ariko akazi kabo ari ukwandika inyemezabuguzi z’impimbano, we agasohora ibyo atacuruje akazisohorera abacuruzi avuga ko yabacurujeho ibintu [….] Babikora ku buryo bahimba izo fagitire ku bwinshi hamwe bagaragaza ko baguze ahandi bagaragaza ko bacuruje bigatuma amafaranga bagombye kwishyura atajya mu isanduku ya Leta akaba aranyerejwe.”

Abantu bashinze aya masosiyete bo ngo nta kintu bacuruza, ariko ngo bagaragara nk’amasosiyete yujuje ibyangombwa kuko bahawe ibyemezo byo kuyashinga hakoreshejwe ikoranabuhanga ariko bakaba nta hantu bakorera hagaragara. Bo akazi kabo ni ugufasha abandi kurigisa umusoro.

Abacuruzi bajya gucurisha inyemezabuguzi muri izi sosiyete ni abiyandikishije ku musoro ku nyongeragaciro (TVA) baba bagamije kugaragaza ko TVA batanze barangura ingana n’iyo bakiriye bacuruza, cyangwa se bakagaragaza ko TVA bakiriye bagurisha yabaye nke kugira ngo RRA ibasubize ayo barengeho.

Komiseri w’imisoro y’imbere mu gihugu, Kayigi Aimable yavuze ko aba bantu ngo bamaze gutanga inyemezabuguzi zifite agaciro ka Miliyali 38 (38,000,000,000 Frw) bikaba byaratumye imisoro ingana na 6,800,000,000 z’amafaranga y’u Rwanda anyerezwa.

Izi nyemeza buguzi ngo bamaze kuziha abantu bagera kuri 700. Abagera kuri 248 muri bo bakaba baratangiye gukurikiranwa n’ubutabera.

Kugira ngo RRA ibashe kuvumbura ko izi sosiyete zitanga inyemezabuguzi za baringa kandi nta cyo bacuruje, ni uko yagiye ibona hari abantu bavuga ko baguze ibintu runaka ariko yasubira inyuma igasanga aho bavuga ko babiguze batarigeze bamenyekanisha umusoro.

Kugeza ubu imashini za EBM zirimo gukoreshwa mu gihugu hose zingana na 13,867, muri zo imashini 25 ni zo zikoreshwa mu gukora izo nyemezabuguzi z’impimbano.

Ikindi kibazo RRA igaragaza mu gutanga imisoro, ni abantu bagabanya agaciro k’ibicuruzwa bakandika ku nyemezabuguzi amafaranga make ugereranyije n’ayo bagurishije bagamije kunyereza umusoro ku nyongeragaciro.

Ruganintwali yasabye abakorana n’abo bantu kubireka kuko ibyo bakora byavumbuwe ndetse ko n’izo nyemezabuguzi zabo zitazigera zemerwa muri RRA.

Avuga kandi ko hari ibindi bihano bibateganyirijwe mu rwego rw’ubucuruzi ndetse bakanakurikiranwa n’inzego z’ubutabera nk’abantu bafite umugambi wo kurigisa umutungo igihugu.

Reba urutonde hano

Yisangize Inshuti.

Ibitekerezo

Tanga Igitekerezo