Dr Donald Kaberuka yasabwe ubufasha na Perezida Magufuli

Perezida Magufuli yasabye Dr Kaberuka gufasha Tanzaniya mu kuzamura ubukungu bwayo

Dr Donald Kaberuka wahoze ayobora Banki Nyafurika itsura Amajyambere (BAD), kuri uyu wa Gatanu tariki 19 Knama 2016, yagiranye ibiganiro na Perezida Joseph Magufuli wa Tanzania mu mujyi wa Dar es Salaam, ibiganiro byibanze ku bukungu bw’iki gihugu.

Perezida Magufuli yashimiye Kaberuka umuhate n’ubushishozi yayoboranye BAD, anaboneraho kumusaba gukomeza kugira inama Tanzania mu by’ubukungu.

Mu itangazo ryasohowe na Perezidansi ya Tanzaniya, Magufuli yagize ati “Tanzania izakomeza gukorana nawe, kandi twizera ko ufite umutima wo kutugira inama mu mishinga yacu itandukanye y’iterambere, nko kutugira inama uko twakungukirwa n’umutungo kamere dufite nk’amabuye y’agaciro, gaze karemano, ubutaka bunini, amatungo nk’inka, ibiyaga n’inyanja ndetse na pariki.”

Dr Kaberuka ni umwe mu nararibonye zigize akanama kashyizweho na Minisiteri y’igenamigambi muri Tanzania, kagenzura imikoranire ya Leta ya Tanzania n’abafatanyabikorwa bayo mu by’iterambere.

Dr Kaberuka yashimiye Magufuli ingamba yafashe zigamije guteza imbere Tanzania, zirimo kurwanya ruswa, uburyo bwo gukusanya imisoro, ndetse n’uburyo bwo gukoresha neza umutungo igihugu gifite.

Avuga ko nta kabuza ibyo nibikomeza gutyo Tanzania izaba iri mu nzira nziza z’iterambere.

Perezida Magufuli na Dr Kaberuka kandi baganiriye ku bukungu bwa Afurika n’isi muri rusange.

Dr Kaberuka w’imyaka 61, ni umuhanga mu bijyanye n’ibaruramari. Yabaye Perezida wa BAD kuva muri 2005 kugeza muri 2015.

Ashimirwa kuba yarabashije kuzamura ubukungu bw’iyo banki kandi ikaba kimwe mu bigo bikomeye by’ishoramari ku mugabane wa Afurika.

Ni umwe kandi mu bakandida bahabwa amahirwe yo kuyobora Komisiyo y’umuryango wa Afurika yunze ubumwe (AU), dore ko uwo muryango ukeneye umuyobozi uzabasha kuwushakira uburyo bwo kugabanya inkunga z’amahanga zigera kuri 76 % zigize ingengo y’imari ukoresha, hagashakwa ubundi buryo bwo kwishakamo ibisubizo ku bihugu biwugize.

Kuba yarabashije guteza imbere BAD, Dr Kaberuka afitiwe icyizere cyinshi nubwo bitaratangazwa niba azemera kwiyamamaza mu matora ateganyijwe muri Mutarama umwaka utaha.

Muri Nyakanga mu nama ya AU yabereye i Kigali, abakuru b’ibihugu na za guverinoma basoje batabashije kubona usimbura Dr Dlamini Zuma wayoboraga komisiyo y’uyu muryango, kuko mu biyamamazaga bose nta n’umwe wabashije kubona bibiri bya gatatu by’ibihugu 54 bigize AU.

Ikinyamakuru Africapedia giherutse gukora isuzuma kuri interineti kigaragaza ko Kaberuka afite amahirwe 57 % yo kuba yayobora AU, mu bantu 15 bagereranywaga.

Dr Specioza Wandira Kazibwe wahoze ari Visi Perezida wa Uganda, Dr Pelonomi Venson-Moitoi wo muri Botswana na Minisitiri w’Ububanyi n’Amahanga wa Guinée Equatorial Agapito Mba Mokuy nibo bahataniraga kuyobora AU.

Nyuma yo kubura utorwa, hemejwe ko hashakwa abandi bakandida babiri biyongera kuri abo batatu, amatora akazasubukurwa muri Mutarama 2017.


Donald Kaberuka (ibumoso) na Perezida Magufuli

Yisangize Inshuti.

Ibitekerezo

Tanga Igitekerezo