EAC yunze mu rya AU mu kwitandukanya n’abaterankunga

Daniel Kidega, Perezida w’Inteko ishinga amategeko y’Umuryango wa Afurika y’Uburasirazuba

Perezida w’Inteko ishinga amategeko y’Umuryango wa Afurika y’Uburasirazuba Hon Daniel Kidega ubwo yasuraga Perezida wa Sena y’u Rwanda, Bernard Makuza, kuri uyu 08 Kanama 2016, yavuze ko ibihugu bigize uyu muryango bifite umugambi wo kwishakamo ubushobozi bakareka gokomeza kurandatwa n’inkunga z’abanyamahanga.

Gahunda yo kwishakamo ingengo y’imari mu bihugu bya Afurika iri kugenda icengera mu bihugu bya Afurika bikomeje kugenda bigaragaza ko inkunga z’abanyamahanga bihabwa ziza zigeretseho agasuzuguro dore ko ngo ibyo bihugu biba bishaka gutegeka abahawe inkunga uko bagomba kubaho.

U Rwanda ni kimwe mu bihugu byatangiye uyu mugambi mbere, kandi uyu mugambi ukaba uri mu myanzuro yafatiwe mu nama y’umuryango wa Afurika yunze Ubumwe iherutse kubera mu Rwanda kuva ku wa 10 kugera ku wa 18 Nyakanga 2016 aho amafaranga y’ingengo y’imari ya AU azajya atangwa na banki z’ibihugu, aho zizajya zitanga 0,2% by’amafaranga y’imisoro y’ibyinjira mu gihugu ,75% akajya mu bikorwa bya AU ndetse n’ibikorwa byo kubungabunga amahoro ku kigero cya 25%.

Daniel Kidega uyobora EALA nawe ashimangira ko igihe kigeze ngo Umuryango wa Afurika y’Uburasirazuba EAC, wishakemo ibisubizo badategereje inkunga z’abanyamahanga akaba ari kimwe mu by’ingenzi yaganiriye na Perezida wa Sena Bernard Makuza.

Yagize ati “Twavuze ku kwegeranya amafaranga ya EAC yose, ko dukwiye gukora ibishoboka byose tugashyiraho ingamba zo gutera inkunga imishinga yacu tudategereje abagira neza.”

Ibyo Daniel Kidega avuga abihuza na Perezida wa Sena y’u Rwanda Bernard Makuza wemeje ko igihe kigeze ngo Afurika yigire ireke kwiringira inkunga z’abanyamahanga ziza zigeretseho andi magambo yo gutegeka icyo umuntu agomba gukora n’ubundi ngo ugasanga biganisha mu nyungu zabo.

Yagize ati “Duhereye ku rugero rwiza, icyemezo gikomeye cy’ingirakamaro cyafashwe mu nama y’abakuru b’ibihugu ba Afurika yunze Ubumwe yo gushaka uburyo Afurika ubwayo yakwishakamo amafaranga, na komisiyo na EALA bikore dukoresheje atari ayo duhabwa n’abandi, akenshi ni uko bashobora kutuganisha mu byo bifuza, ibyo bikaba biri mu mugambi w’u Rwanda twese duhuriyeho.”

Nta gihe ntarengwa cyatangajwe uyu mugambi uzaba washyiriwe mu bikorwa ariko byumvikana ko ari ibizihutirwa nk’uko byagaragajwe.

Muri uyu mwaka w’ingengo y’imari wa 2016/2017, umuryango wa Afurika y’Uburasirazuba uzakoresha amadorali 101,374,589 mu gihe azatangwa n’abaterankunga angana na miliyoni 46.7 z’amadorali ya Amerika.

Yisangize Inshuti.

Ibitekerezo

Tanga Igitekerezo