Warning: imagejpeg(local/cache-vignettes/L463xH309/arton11627-4fd1e.jpg.tmp): failed to open stream: Disk quota exceeded in /home/makuruki/public_html/ecrire/inc/filtres_images_lib_mini.php on line 435
Abasora barashinja abakozi ba Rwanda Revenue kuvogera konti zabo .|. Makuruki.rw | Amakuru Asesenguye!

Abasora barashinja abakozi ba Rwanda Revenue kuvogera konti zabo

2

Bamwe mu basora bakuru bo mu ntara y’Uburengerazuba baravuga ko hari abakozi b’ikigo cy’igihugu gishinzwe imisoro n’amahoro bavogera konti zabo bagafatira amafaranga yabo ndetse banakabamenera amabanga ya konti zabo binyuranije n’amategeko bikaba byarasubije abatari bake ku isuka.

Kuri uyu wa 27 Nyakanga 2017, Ikigo cy’Igihugu gishiznwe kwinjiza imisoro n’amahoro, cyifatanyije n’abasora bo mu ntara y’Uburengerazuba mu munsi mukuru wo gushimira abasora bo muri iyi ntara ari na ho abasora bakuru bagaragarije ko bafite ikibazo cy’Ubugenzuzi bukorwa na Rwanda Revenue ariko bakaba babikora mu buryo bubangamiye.

Umucuruzi witwa Hitayezu Dirigeant wo mu karere ka Rubavu yavuze ko hari abacuruzi bo mu karere akoreramo bahahamuwe n’uburyo abakozi ba Rwanda Revenue babakorera Ubugenzuzi bikagera n’aho bafatira ama konti yabo , bigatuma batabasha kubona amafaranga mu gihe baba bakeneye kwishura imyenda ya banki.

Yakomeje avuga ko ngo hari n’abandi bakozi bagenda bavuga uko konti z’abacuruzi zihagaze kandi ubundi biba ari ibanga rya nyirayo.

Yagize ati “hari igihe Rwanda revenue yibasira ama konti yacu, ugasanga hari na bamwe batakijya kuri banki kubitsa, tukaba tubona bizaba imbogamizi no ku ma banki igihe wasabye nk’ideni kandi banki ishaka versement ikazibura, hari n’ubwo bagukorera igenzura ugasanga abacuruzi bose bamenye konti yawe, amadeni ufite ngo uriya nta kigenda yarashize ubwo bizaba kubufatanye bwacu namwe ku buryo amakonti yacu atavogerwa.

Hitayezu kandi yongeyeho ko bamwe mu bacuruzi bakorewe isuzuma bagasanga bafiteibirarane byinshi by’imisoro bahunze abandi bagafunga ubucuruzi bwabo akaba yabasabiye ko byibuze bababarirwa bakagaruka mu bucuruzi bwabo bakisubiraho bakajya bishyura.

Komiseri mukuru wungirije w’Ikigo gishinzwe Imisoro n’amahoro Ruganintwali Pascal yavuze ko bajya gufatira imitungo y’umuntu mu gihe babanje kugoragoza ugomba kwishyura imisoro ariko akaninarana.

Yagize ati “turafatira ariko buriya gufatira biza nyuma y’ibindi byose bituma dukangurira ufite umwenda gusora. Turabanza tukamuhamagara tukamubaza niba nta bushobozi bwo kwishyura afite akishyura mu byiciro, iyo abyemeye ntiturenza amezi 12; agirana amasezerano na Rwanda Revenue agatanga ingwate, iyo rero yananiranye ntitureba konti gusa tureba n’imitungo ye itimukanwa takayigurisha asigaye akayasubizwa.”


Komiseri mukuru wungirije wa Rwanda revenue Authority Ruganintwali Pascal

Komiseri mukuru wungrije wa Rwanda Revenue kandi ntiyirengagiza ko hari bamwe mu bakozi babo bihugikana abacuruzi bakabatera ubwoba babaka ruswa ariko ngo iki kibazo baragihagurukiye ndetse bakaba basaba abacuruzi gukanguka bakamenya amategeko aberengera.

Yagize ati: “tumaze kubona abakozi babikora bakajya gutera ubwoba abacuruzi bakanasaba ruswa, tukaba dusaba abacuruzi kujya bihutira kuza kubitubwira kugira ngo dufatanye na bo dukumire aba bakozi kuko na bo barahari bitwara nabi.”

Rwanda Revenue Authority kandi yahaye ibihembo abasora batandukanye bo mu ntara y’Uburengerazuba basoze menshi, bagasora ku gihe ndetse bagakoresha neza akamashini gatanga inyemezabuguzi (EBM.)

Ikigo cy’igihugu gishinzwe imisoro n’amahoro kiri mu rugamba rwo gukangurira abasora gutanga imisoro ku bushake mu rwego rwo kongera ingano y’amafaranga aturuka mu misoro ajya mu ngengo y’imari ya Leta nk’imwe mu nkingi yo kwigira.

Mu ntara y’uburengerazuba habarurwa abasora bagomba gukoresha akamashini gatanga inyemezabuzi 1489 ariko abagera kuri 903 bakaba ari bo bazikoresha gusa.

Mu mwaka w’ingengo y’imari ya 2015/2016 abasora bo mu ntara y’Uburengerazuba batanze imisoro ingana na miliyari 16.3 mu gihe bari bariyemeje miliyari 13.9.


Bamwe mu bacuruzi basoze neza bahawe ibihembo

Yisangize Inshuti.

Ibitekerezo 2

  1. Aya namakosa akomeye bakora njye nkibimenya nahise nanga bnk kbs ntakubahiriza uburenganzira bwumunu ayo batwiba ntabahagije bajyanye ayo

  2. konti yumuntu nibiyiriho byose nibanga kuri bene yo ndetse na bank kumena ibanga birahanirwa umukozi babisangaho azahanwe kugirango aba bagwizatunga bacu bizere amabanki nabakozi.

Tanga Igitekerezo