Minisitiri w’intebe yaragije Imana u Rwanda n’abarutuye, anibutsa abakirisitu kujya bashima

Kuri iki cyumweru tariki 7 Kanama 2016 , Minisitiri w’Intebe Anastase Murekezi wari uhagarariye Perezida Kagame mu giterane ngarukamwaka gihuza imiryango n’amatorero ya gikirisitu yatuye Imana u Rwanda n’abarutuye ndetse anibutsa abakirisitu ko gushimira Imana ari ngombwa mu buzima.

Muri iki giterane cyiswe Rwanda Shima Imana cyitabiriwe n’abakirisitu baturutse mu matorero atandukanye abashumba b’amatorero ndetse n’abayobozi bakuru ku rwego rw’igihugu.

Muri iki giterane kandi hagaragayemo indirimbo zo guhimbaza no kuramya Imana n’inyigisho zitandukanye kimwe n’ubuhamya butandukanye bw’ibyagezweho n’abakirisitu bikaba byaranze iki giterane.

Bamwe mu bakirisitu bari bitabiriye iki giterane bavuze ko nyuma yo kubona ibyo Imana yagiye ibakorera nyuma ya Jenoside yakorewe abatutsi mu 1994 uyu ari umwanya mwiza wo gushima Imana.

Munsenyeri Birindabagabo Alexis Perezida wa Peace Plan ari nawo utegura iki giterane niwe wantanze inyigisho muri iki giterane, akaba yagarutse ku gushimira Imana anavuga ko aricyo iki giterane kiba kigamije muri rusange.

Muri uyu muhango Ministiri w’intebe Anastase Murekezi wari umushyitsi mukuru muri iki giterane mu ijambo rye yagiye agaruka ku magambo ashimira akubiye muri bibiliya maze abwira abari aho ko gushima ari ngombwa mu buzima bityo akaba yashimye aho Imana yakuye u Rwanda ndetse anongeraho ko mu gihe igikorwa nk’iki kiba kibaye biba ari umwanya mwiza wo kwibuka uburyo Imana yahaye abanyarwanda igihugu cyiza.

Yagize ati: "Gushimira Imana ni ingenzi mu buzima bwa muntu no mubuzima bw’igihugu muri rusange birakwiye ko duhora dushimira Imana ndetse tugashimira nabantu bagize akamaro kugira ngo tutazibagirwa aho Imana yadukuye[.....] igikorwa cya Rwanda shima Iman ni umwanya mwiza wo kwibuka uburyo Imana yahaye abanyarwanda igihugu kiza cy’u Rwanda igatanga n’intwari zagihanze zikomeje kukirinda no kugiteza imbere."

Minisitiri Murekezi kandi yafashe umwanya maze aragiza Imana u Rwanda n’abarutuye ndetse ashima Imana kuba yarahaye u Rwanda Perezida wa Repubulika Paul Kagame ngo aruyobore.

Ministiri w’intebe yasoje ashimira abateguye iki giterane ndetse abizeza ubufatanye n’inkunga zose biturutse kuri Perezida wa Repubuka y’u Rwanda Paul Kagame bityo anasaba amatorero n’amadini gukomeza kurushaho kugira uruhare muri gahunda zose zigamije guteza imbere abaturage b’u Rwanda bubakira ku ndangagaciroz’umuco nyarwanda.

Yisangize Inshuti.

Ibitekerezo

Tanga Igitekerezo