Kubera iki Bibiliya iduhamagarira kurinda no gusigasira ibyagezweho?

Nehemiya 4:1-3 " Ariko Sanibalati na Tobiya n’Abarabu n’Abamoni hamwe n’Abanyashidodi , bumvise ko igikorwa cyo gusana urukuta rwa Yeruzalemu gitera imbere, kandi ko n’ibyuho byo muri rwo biri hafi gusibangana barushaho kurakara. Bose bahuza umugambi wo gutera i Yeruzalemu no kwangiza ibyaho. Nuko dusenga Imana yacu, maze dushyiraho abarinzi ku manywa na nijoro bo kubakoma imbere."

Mu gihe igihugu cya Isiraheli cyari cyarabaye umwirare n’inkike za Yerusalemu zarahindutse amatongo, Imana yahagurukije umuyobozi Nehemiya n’ubwoko bwose bwa Isiraheli kongera gusana igihugu no kukirinda. Bibiliya itugaragariza neza ko bafata umugambi wo gusana igihugu Baburoni yari yaragisenye byo kukirimbura ndetse n’abari bagituye harokotse mbarwa.

Igihugu cyose cyari cyarahindutse umwirare ndetse n’ingoro y’Imana irasenywa kuko Nebukadinezali yari azi ko imbaraga z’Abisiraheli zari ziri mu gusenga no kwegera Imana.

2 Ingoma 36:19-20 " Nuko Abanyababiloniya batwika Ingoro y’Imana, basenya urukuta ruzengurutse Yeruzalemu, batwika amazu yose n’ibikoresho by’agaciro byose barabitsemba. Abacitse ku icumu Nebukadinezari abajyana ho iminyago i Babuloni, abagira inkoreragahato zimukorera we n’abamukomokaho kugeza ku ngoma y’Abaperesi."

Mu mwaka 152 BC nibwo Nebukadinezali umwami w’Ibaburoni; yagose umurwa Yerusalemu arawusenya ; Amarembo yaho arayatwika n’inkike z’umurwa Yerusalemu azikubita hasi; abacitse ku icumu muri ako kaga gakomeye abatwaraho iminyago;no kuba inkorera gahato i Babutoni.

Mugihe Ubuperesi bwari butwaye isi bwategekaga ibihugu bigera 132; nibwo ubwoko bwa Isiraheli bwatahutse buva i Baburoni ariko Nehemiya asigara i Baburoni ahereza umwami Aritazeruzi ariwe wanaje kumuha uburenganzira bwo kujya gusana inkike z’Iyerusalemu amuha n’urwandiko rwo gutema ibiti ahagana mu mwaka 32 BC.

Nehemiya ageze i Yerusalemu ikintu gikomeye yabanje gukora ni ugusana ibyo mu nzu y’Imana byari byarangiritse asubiza ibintu byose byo mu nzu y’Imana mu mwanya wabyo; mbere yuko binjira mu gikorwa nyamukuru cyo gusana igihugu cyose cyari cyarasenyutse mu ngeri zitandukanye;nawe urabyumva ko nta byiringiro na bike byari mu bantu; nta n’ejo hazaza ku buzima bwabo babonaga.

Nehemiya 13:11 " Nuko ntonganya abatware b’Abayahudi ndababaza nti: “Ni iki cyatumye mwemera ko Ingoro y’Imana yandagara?” Nuko ngarura Abalevi n’abaririmbyi ku mirimo yabo."

Ab’Isirayeli bahagurutse kubaka Nibwo abanzi babo babahagurukiye batangira kubabibamo amagambo ababwira ko ibyo bakora ntacyo bimaze ko nta n’agaciro bifite ahubwo ko bizasenyuka mu gihe gito; Kandi ibyo rwose byari ibinyona n’impuha zidafite aho zishingiye dore ko izo nkuta n’amagingo nubu ziracyemye.

Umwanzi nta handi ajya akorera uretsa gushyira imitekerereze mibi mu bantu no kubazanamo impuha zibaca intege; ariko bene iyo myumvire ukwiye kuyirenga agakomeza intumbero ku buzima bwawe.

Nawe birashobokako ujya wakira amagambo y’urucantege akugeraho ava kubatifuza ko watera imbere; ubundi umwanzi Satani nawe ukumva akongorera akwereka ko ntacyo uzigezaho ndetse n’ibyo wagezeho akabitesha agaciro.

Subiramo imbaraga usobanukirwe ko ayo ari amajwi y’umwanzi udashaka ko ugera aheza Imana yaguteguriye; Komera kandi ushikame; Rwana intambara nziza yo kwizera kandi rwose ndakwizeza ko Imana iri kumwe nawe. iyo uri kumwe n’Imana nta kabuza uzagera kucyo yagusezeranyije.

Uko Nehemiya nubwoko bwa Isilaheli baje gutsinda urugamba; Nuko batesheje agaciro amagambo yabacaga intege kuko bari bazi intego bihaye naho barimo kwerekera; Basana umurwa Yerusalemu n’inkike zawo; Kandi uko bubakaga niko abarinzi b’inkike bakumiraga ibitero by’umwanzi babaga bari ku misozi baryamiye amajanja; Abubakaga nabo ukuboko kumwe kukubaka ukundi gufashe intwaro kwiteguye gutabarira igihugu.

Nehemiya 4:10-12,14 " Uhereye uwo munsi kimwe cya kabiri cy’abakozi banjye barakoraga, naho abandi bahoraga baryamiye amajanja bafite amacumu n’ingabo n’imiheto, bambaye n’amakoti y’ibyuma akingira igituza. Abasirikari bakuru bari barinze Abayahudi bose bubakaga urukuta. Abahereza babo bakoreshaga ukuboko kumwe, ukundi gufashe intwaro. Buri muntu wubakaga yabaga afite inkota ye mu rukenyerero. Uwari ushinzwe kuvuza impanda, yagumaga iruhande rwanjye, Nimujya mwumva impanda ivuze, mujye mudutabara muze aho ivugiye. Imana yacu na yo izaturwanirira."

Ntabwo abantu baba bakwiye guheranwa n’amateka; ahubwo buri wese afite inshingano zo kongera kubaka igihugu cye akirinda ingengabitekerezo zo mu buryo bwose zaba izabaduca intege ndetse n’amajwi ya Satani ajya adutera akatwongorera nka ya magambo y’ibicantege Abisirayeli bahuye nayo mugiye bari kubaka; Buri wese akwiye guharanira amahoro arambye no kwiteza imbere;hakabaho kurinda ubusugire bw’igihugu no gusigasira ibyiza tumaze kugeraho; Nkuko twakomeje kubibona mu gitabo cya Nehemiya.

Like facebook: Buroyumutima Richard

Like page: Gospel Tone

Umwigisha akaba n’umuvugabutumwa : Richard BUROYUMUTIMA From: Gethsemane Gospel Ministries

Ukeneye ibindi bisobanuro cyangwa gutanga ubwunganizi Contacts:0722356430 (Whatsapp);0781561919

Yisangize Inshuti.

Ibitekerezo

Tanga Igitekerezo