Korali Il est Vivant yashimangiye umubano na Bressed Maria ikomoka Tanzania mu gitaramo kidasanzwe

1

Abaririmbyi ba Korali Bressed Maria Theresa Ledochowska bishimiye indirimbo za Il est Vivant.

Korale Il est Vivant yo muri Paroisse Regina Pacis Remera yakoze igitaramo cyo gushimangira umubano ifitanye na korari Bressed Maria Theresa Ledochowska yo mumujyi wa Dodoma muri Tanzania biyemeza umubano uhoraho.

Iki gitaramo cyabaye kuri uyu wa 25 Kamena 2017, kibera mu Centre Socio-Culturel Urumuri iri i Remera mu mujyi wa Kigali.

Ni igitaramo cyagaragayemo ibyishimo bidasanzwe ku mpande z’amakorari yombi n’abakirisitu bacyitabiriye. Cyaranzwe n’indirimbo zisingiza Imana abaririmbyi bacinya akadiho mu muco w’ibihugu byombi.

Mukashema Marie Brigitte uyobora Korali Il est Vivant imaze hafi imyaka 30 ibwiriza ubutumwa mu ndirimbo, yavuze ko intego nyamukuru y’iki gitaramo yari ugushimangira umubano hagati y’aya makorari yombi mu rwego rw’iyogezabutumwa.

Mukashema yagize ati: "Muri gahunda yo kuvuga ubutumwa, tugira intego yo kubaka ubucuti n’andi makorali yaba ayo muri paroisse yacu no hanze yayo ari mu Rwanda ndetse no mu mahanga, dufite ingingo eshatu tugenderaho ari zo ubuvandimwe, gusingiza Imana no kuvuga ubutumwa ko Yezu ari muzima. Ibyo byose rero bituma tugira umuco wo guhura n’abandi tukagirana ubucuti. Aba bavandimwe rero bo muri Dodoma dufitanye ubuvandimwe bushingiye ku iyogezabutumwa."

Umubano w’aya makorari yombi uragenda ushinga imizi kuko umaze umwaka urenga ndetse kuba iyi korali yaraturutse Tanzania izanwe no gusura Il est Vivant bigaragaza ko bafitanye igihango gikomeye mu murimo w’Imana. Gusa ngo biteguye gukomeza gushimangira umubano uzahoraho kuko ngo Il est Vivant nabo bafite gahunda yo kujya muri Tanzania gukorerayo igitaramo muri Mutarama umwaka utaha.

Korari Bressed Maria Theresa Ledochowska yageze i Kigali kuri uyu wa gatandatu isura urwibutso rwa Jenoside yakorewe Abatutsi ruri i Kigali ku Gisozi aho umuyobozi wayo Paul avuga ko bahigiye amateka azatuma bavuga ubutumwa bushishikariza abantu gukundana no kwirinda amacakubiri.

Ati: "Ku rwibutso rwa Jenoside twabashije kwiga amateka y’amacakubiri ashingiye ku moko n’urwango byaranze amateka y’abanyarwanda, twize ko tudashobora kwidagadura ngo twemerere abantu kurema urwango mu mitima yabo kuko bibyara amakimbirane yerekeza ku bibi bikomeye."

Yavuze ko korali ayoboye yiteguye kwakira korali Il est Vivant ndetse ngo bazajyana n’indirimbo zayo z’ikinyarwanda bazajya baririmba bakibuka ibihe bagize bari mu Rwanda dore ko ngo aho batuye hari abantu bumva neza ikinyarwanda bazabafasha kuzimenya.

Avuga ko yishimiye umubano yagiranye na Il est Vivant ku buryo nagaruka mu Rwanda mu bikorwa bye atazongera kurushywa no gushaka hoteri yo kuraramo ahubwo ngo azahita yitabaza abaririmbyi b’iyi Korali bamucumbikire ku buntu.

Iyi Korali ikomoka Dodoma, ni korali ikomeye ku rwego rw’igihugu ku buryo korali Il est Vivant asanga umubano bafitanye uzatuma bayigiraho byinshi bizabamenyekanisha ku rwego mpuzamahanga.


Korali Il est Vivant yishimiye kwakira Korali Bressed Maria Theresa Ledochowska yaturutse Dodoma


Korali Bressed Maria Theresa Ledochowska bacinye akadiho mu ndirimbo za Korali Ile est Vivant


Abayobozi b’amakorari yombi Brigitte na Paul biyemeje kubanisha amakorali neza.


Abacuranzi baryoheje igitaramo

Yisangize Inshuti.

Ibitekerezo 1

  1. Najye natunguwe kubireba bukomeye nishimye birenze kuko byatangiye ndi mugahinda birangira nkavuyemo.

    Nukuri Imana ikomeze iduhe kogeza ubutumwa bwiza buturuka kuriyo. kd nari umwe mubaririmbyi bagize IL est Vivant chorale hhh.

    Mumfashe rwose dushimire Imana

Tanga Igitekerezo