Gukoresha nabi igihe mu nsengero ntibikwiye kwitirirwa Umwuka wera

Abefeso 5:15-26 " Muzirikane rero imigenzereze yanyu mutagenza nk’injiji, ahubwo mugenze nk’abanyabwenge, mukoresha neza igihe mufite kuko iyi minsi ari mibi."

Iyo winjiye mu nsengero zitwa iz’Umwuka cyane muri Afurika; Usanga nta gahunda habe no kubahiriza igihe; aho usanga nta saha yo gutangiriraho no kurangiza; Gahunda z’urudaca , ugasanga abantu babura uko bubahiriza izindi gahunda zibareba kubera baba bafatiriwe n’insengero zabo.

Abagira uruhare muri ako kavuyo dusanga mu nsengero bo bavuga ko ariko Umwuka aba yashatse ko bigenda " Niko Umwuka aba yayoboye; Ugasanga hakoreshwa nabi igihe kandi mu bintu bitari ngombwa kuko ntawe uba yita ku gihe kandi mu ihuriro ry’abantu benshi haba.harimo abantu bafite izindi gahunda bateguye cyane ko baba bazi ko hari igihe runaka cyagenewe icyo gikorwa barimo.

Mugihe tugezemo ntaho itorero ryageza abo riyoboye mu gihe nta murongo ngenderwaho n’imikoreshereze myiza y’igihe rifite. Uzasanga uyoboye amateraniro avuga ibintu mu gihe kitari ngombwa .Niba uyoboye gahunda, ukwiye kumenya inshingano zawe; Uko uzikora kandi mu gihe cyawe.

Usanga hari ubwo uyoboye gahunda akora mu mwanya w’abaririmbyi; Agatanga ubuhamya; Agakoresha inama; Agatanga impuguro zitandukanye; Akabwiriza: Ibyo byose ni byiza ariko biba byiza iyo bikozwe mu gihe cyabyo.

Umubwiriza 3:1 " Buri kintu kigira igihe cyacyo, ku isi buri gikorwa kigira umwanya wacyo."

Iteraniro kimwe n’ibindi bikorwa byose by’insengero; bikwiye kugira isaha izwi yo gutangiriraho n’igihe ntakuka cyo gusorezaho kuko ijambo ry’Imana rivuga ko tugomba gucyaha bene data bica gahunda.

Nubwo twemera ko Umwuka Wera akora ariko dukwiye kumenya ko Umwuka Wera ari ubutatu bw’Imana. Twavuga ko ari bumwe mu buryo Imana itwihishuriramo cyangwa ikorana natwe; Ntabwo Imana ariy’imivurungano ngo ibe yaza ngo izane akavuyo mubyo abantu bateguye; bityo iteraniro n’izindi gahunda bikwiye gupangwa neza; buri kintu mu mwanya wacyo kandi abantu bagatozwa bakanigishwa gukoresha neza igihe.
Abakorosayi 4:5 " Murajye mwitondera uko mwifata ku batazi Kristo, mukoreshe neza igihe mufite ngo mubabwire ibye."

Bibiliya igaragaza ko umwuka w’Umuhanuzi ugengwa na nyirawo; bityo ntabakwiye gukoresha impano uko bidakwiye ngo babyitirire Imana; Aho usanga umuntu ahagurutse bari kwigisha ijambo ry’Imana agasakuza akenshi rwose bigaragara ko ibyo akoze bikozwe mu gihe kitari cyo; nyamara wamubaza akavuga ko ari Umwuka Wera uri kubikora; ko we ntacyo yabikoraho! Kuki atakwihangana uwo Imana yahisemo guhanurira iteraniro mu ijambo akabanza agasoza; cyangwa agaca ku muyobozi wa gahunda ko aricyo aba yashyiriweho kuyobora gahunda, akabisabira umwanya akavuga icyo Imana imubwiye mu gihe kiri ngombwa ko aribwo n’ubwo butumwa bwakirwa bukanumvikana neza.

Abayoboye insengero mukwiye gutoza abo muyoboye kuko byose bigaruka kuri mwe kuko uwabasuye agenda abayitirira itorero ryose ko nta gahunda rigira.

Gukoreshwa n’Imana ntibivuze kubura ubwenge;dore ko hari abigira nk’abatagifite ubwenge ngo bakunde bagaragaze ko ari Imana iri gukora; Ese Imana iramutse ikoresheje iterabwoba n’Imbaraga zayo ni nde wayegera; Mwibuke ubwo yasabaga Abisiraheli ngo baze bavugane nayo?

Hari abantu benshi twirukana ku Mana kubera ibyo baba babona mu nsengero no muri gahunda z’abasenga; Iyo utabasha kubahiriza igihe; usanga bikumira abantu baba bagira inshingano nyinshi bibasaba kubahiriza igihe ( Gahunda ); Bityo bakirinda kuza mu nsengero kubera ka kavuyo ko kwica igihe no kuvanga vanga ibintu.

Dukwiye kuba ibyitegererezo by’abatazi Imana; mu ngeso no mu myifatire bityo abatubona batazi Imana bagahera ko bagahimbaza Data wo mu ijuru; Niba uburyo insengero zikoresha igihe n’ibyo dukora tubiburamo ubwenge bigakumira bamwe mu nzu y’Imana , byaba ari ikibazo kuko Imana ishaka ko bose bakizwa bakamenya ukuri.

Ni ryari tuzumva ko igihe gikwiye kubahwa no kubahirizwa yaba icyo gutangira n’icyo gusorezaho?

Zimwe mu nsengero ziba zigomba gutangira saa tatu zigasoza saa sita n’igice; ubwo kandi n’iteraniro rimwe; inyinshi muri izo nsengero uhura nabo saa kumi aribwo bari kwigorora basohoka mu nsengero zabo bavuga bati " Umwuka yakoze cyane ! "

Mbega imyumvire itariyo!; Kandi ubwo harimo ababyeyi basize abana; Abandi ibyo bari bateguye gukora bikangirika; Hari n’ababa bari bujye mu mirimo itandukanye bagasiba cyangwa bagakererwa abenshi bikabagiraho ingaruka!

Kugirango haboneke impinduka muri gahunda no kubaha igihe birasaba uruhare rwa buri wese no kurushaho kubyigishanya; Cyane ko tugeze mu bihe igihe cyihuta kandi tuba tugomba kugikoramo byinshi.

Like facebook: Buroyumutima Richard

Like page: Gospel Tone

Umwigisha akaba n’umuvugabutumwa : Richard BUROYUMUTIMA

From: Gethsemane Gospel Ministries

Ukeneye ibindi bisobanuro cyangwa gutanga ubwunganizi
Contacts:0722356430 (Whatsapp);0781561919

Yisangize Inshuti.

Ibitekerezo

Tanga Igitekerezo