Ese koko Imana isubiza uyisaba? Ni kuki se hari amasengesho adasubizwa?

1

Ni iby’ ukuri koko Imana isubiza amasengesho y’ abakiranutsi. Ijambo ry’ Imana ni iry’ ukuri kandi ntiribeshya ni yo mpamvu n’ Imana itabeshya kandi ntikiranirwa ngo yibagirwe. Iyo usomye muri Yakobo 5:16 uhasanga ijambo rigira riti" Gusenga k’ umukiranutsi kugira umumaro mwinshi, iyo asenganye umwete."

Ibisubizo by ’amasengesho bishobora kuboneka vuba cyangwa bigatinda kuko Imana umugenga wa byose yabonye ko ari byo byiza kandi bigukwiriye kandi ikabiguha mu gihe nyacyo yagennye.

Icyo Imana ishaka ku bantu bayo ni ugukiranuka , kwihangana no gusenga cyane ubudasiba. Icyakora hari impamvu zishobora gutuma amasengesho atagera ku Mana cyangwa ntiyumvwe ngo ibyifuzo bisubizwe.

Iyo ukomeje gusoma muri iki gitabo cya Yakobo 4:2,3 hari amagambo agira ati: " Murararikira, ariko ntacyo mubona : murica , kandi mugira ishyari , ariko ntimushobora kunguka ......murasaba ntimuhabwe kuko musaba nabi, mushaka kubyayisha (biva ku Kwaya) irari ryanyu ribi."

Nkuko aya magambo yasomwe haruguru abyerekana, kwifuza ikibi hamwe n’ ibindi byaha, biri ku isonga y’ ibishobora kubuza amasengesho y’ umuntu kugera ku Mana .

Igihe cyose dusaba ibihuye n’ ubushake bw’ Imana , turasubizwa ibidukwiriye kandi mu gihe nyacyo kuko iba itwishimiye. Iri ni isezerano Imana yagiranye n’ abantu bayubaha kandi bagakora ibyo gukiranuka, nta gishobora gutuma itabemera. Yesu Kristo ubwe niwe wivugiye ko abantu nibasaba bazahabwa.

Birashoboka ko abantu basaba ntibahabwe kuko hari ikizira hagati yabo n’ Imana bikaba bisaba umuntu kwisuzuma mbere yo kuganira n’ Imana. Ariko n’ubwo abantu batasubizwa ibyo basabye byose ntabwo bikwiye ko biganyira kuko Imana ariyo imenya igikwiriye umuntu.

Gusenga ni intwaro ikomeye cyane ku muntu wese wizera kandi akemera ko ibyo yabwiwe n’ Umwami Imana bizasohora.

Yisangize Inshuti.

Ibitekerezo 1

Tanga Igitekerezo