Ese koko Bibiliya ni inyanja ngari, iyobora ikanayobya abantu?

1

Bibiliya ni ibyanditswe byera byahumetswe n’Imana.Imana ikaba yarahaye Bibiliya abo yaremye kugirango ibamurikire ibamenyeshe ukuri kose; ntabwo Imana yaroha abantu nkuko abavuga ko ari inyanja babivuga cyangwa ngo ibayobye; Kuko iyo Imana iza kubona ko Bibiliya ifite bimwe bivuguruzanya byateza urujijo cyangwa byatuma abo Imana yaremye badasobanukirwa umugambi wayo; ntabwo Imana yari kubaha Bibiliya nk’igitabo cyayo Gitagatifu.

" 2Timoteyo 3:16 BIR " Ibyo Byanditswe byose byahumetswe n’Imana, kandi bifite akamaro ko kwigisha umuntu ukuri no kwamagana ibibi, gukosora umuntu no kumumenyereza gutunganira Imana."

Bibiliya ni igitabo kidasanzwe kandi cyahinduye ubuzima bwa benshi; aho usanga abari abajura; Abasambanyi; Abicanyi; Ababaye imbata z’ubusinzi n’ibindi.

Izo ngeri zose zitanga ubuhamya mugihe bari barafunzwe imyaka myinshi; bagakubitwa; bagahabwa ibihano biremereye byo kureba ko bagororoka bagahinduka nyamara bikanga; Ariko bamurikirwa n’umucyo w’ijambo ry’Imana ubu bakaba barahindutse ibyaremwe bishya; Ibyo bagenderagamo kera bikaba bisigaye ari ubuhamya buhindura benshi.

Abefeso 4:17 " Ni cyo gituma mvuga ibi, nkabihamya mu Mwami yuko mutakigenda nk’uko abapagani bagenda, bakurikiza ibitagira umumaro byo mu mitima yabo ."

Ni wuhe mwihariko wa Bibiliya

Ijambo Bibiliya rikomoka ku ijambo ry’iritirano "Biblioteque" Risobanura ihuriro cyangwa inzu y’ibitabo. Impamvu Bibiliya yitwa ihuriro ry’ibitabo n’uko nubwo Bibiliya tuyibona nk’igitabo kimwe igizwe n’ibitabo 66 bikomatanyirijwe hamwe.

Nubwo Bibiliya igizwe n’ibitabo 66, iyo uyisomye kuva mu Itangiriro ukageza ku gitabo gisoza cy’Ibyahishuriwe Yohana; wumva ari inkuru imwe igikomeza; Bityo nubwo ari abitabo byinshi bibumbiye hamwe nta n’uwashidikanya kuvuga ko Bibiliya ubwayo ari igitabo kimwe tubikomoye kuko kuzuzanya no gukurikirana ku mujyo w’ibyo bitabo bitandukanye biyigize.

Kugeza ubu Bibiliya yose ifite isezerano rya Kera n’Irishya ikaba imaze gushyirwa ( Gusemurwa ) mu ndimi zirenga 636; Naho Bibiliya ifite isezerano rishya gusa yo ikaba imaze gushyirwa mu ndimi zirenga 1442.

Bibiliya kandi ikomeje gushyirwa no mu zindi ndimi umunsi ku munsi; Bigaragara ko mugihe gito izaba yamaze gushyirwa hafi mu ndimi zose zikoreshwa ku isi.

Bibiliya nicyo gitabo cyamamaye kurusha ibindi byose ku isi; ikaba isomwa mu ndimi zose amoko yose ndetse n’ingeri zose z’abantu; Yaba abategetsi; Ibyamamare; abakire; Abize cyane ndetse n’abatarize; Aboroheje......

Tubona ko igice cy’isezerano rya Kera kigizwe n’umubare w’ibitabo 39; naho igice cy’isezerano Rishya kigizwe n’umubare w’ibitabo 27; Ayo masezerano yombi akaba ahuriza hamwe; Bibiliya tubona amasezerano yombi agizwe n’imbube y’ibitabo 66.

Kuki Bibiliya ifite amasezerano abiri kandi yose akaba ari igitabo kimwe?

Ijambo isezerano mu ndimi z’amahanga bisobanuye "Contract" iri rikaba ari ijambo natwe tujya dutira mu rurimi rwacu. Mu isezerano rya mbere ( Old Contract ) Imana yakoranaga n’abantu bayo ikoresheje amategeko " Laws "; Imana ubwayo niyo yaje kubona ko amategeko atigeze acungura abantu ahubwo ko abantu bakomeje kurushaho kugoma no kuyicumuraho; Imana ifata umugambi wo gukorana n’abantu bayo irindi sezerano rishya ( New contract ) ariryo gucungurwa n’ubuntu "Grace".

Abahanga mu by’amategeko ( Law of contracts ); Badufasha kurushaho gusobanukirwa neza uburyo iyo hakozwe amasezerano mashya uburyo aya mbere aba atakiboshye abagiranye amasezerano mbere.

Isezerano rya kera ryari igicucu cy’isezerano rishya; Kuko ibyo tubona mu isezerano rya kera byose byashushanyaga Kristo; Isezerano rya kera wakwibaza niba bikiri ngombwa ko tukiritunga muri Bibiliya?

Yego; Kuko ritwigisha rikatugarahariza urukundo rukomeye n’ubuntu Imana yatugiriye; Uko yagendanye n’abasogokuruza; Rikadusubizamo kandi imbaraga n’ibyiringo kuko Imana yacu ari Imana idahinduka; Tukizera ko uko yabanye na ba sogokuruza ariko izabana natwe; bityo isezerano rya Kera ridufitiye umumaro ukomeye cyane ariko amategeko yo muri icyo gihe twavuga nko gutamba ibitambo by’amasekurume; intama n’andi mategeko byasohoreye mu isezerano rishya; Nyuma y’igitambo cyatambwe rimwe gusa kikemerwa n’Imana iteka ryose; ariyo maraso ya Yesu yamenetse. bityo isezerano rishya rirusha irya mbere gukomere kandi ntitukiri imbata y’amategeko ya mbere ( Old Contract ).

Bibiliya yanditswe n’abanditsi mirongo ine (40) bataziranye mu gihe gitandukanye; kuko yanditswe mu gihe kingana n’imyaka 1600; Mu ndimi eshatu arizo Ikigiliki " Greek "; igiheburayo " Hebrew "n’icya Aromaya " Aramaic ".

Igitangaje cya Bibiliya kandi gishimangira ko Bibiliya yahumetswe n’Imana; Nuko abo bantu bose banditse Bibiliya usanga abenshi batari baziranye; mu iyo myaka myinshi itandukanye usanga baragiye bandika inkuru zuzuzanya kandi zifite umujyo umwe nkaho abanditse bari kumwe cyangwa baziranye kubyo bandika; dore ko abashakashatsi mu kumenya amateka " Biblical archaeology " bagiye bakura inzandiko ahantu hatandukanye; Zikaza guhurizwa hamwe n’abanditsi ba biBiriya "

Abakusanyije Bibiliya nabo batangajwe no kubona abanditse bose barahuje mubyo bagiye bandika; Batari hamwe batanaziranye iryo rikaba ari ibanga rikomeye ryo guhumekwa kwa Bibiliya.

Zaburi 119:105 " Ijambo ryawe ni itabaza ry’ibirenge byanjye, Ni umucyo umurikira inzira yanjye. "

Tewolojiya ntabwo ari imihango cyangwa ikindi ahubwo n’ amashuri yigisha Bibiliya nkuko habaho ayigisha imibare;indimi....; Usanga benshi bashaka kuvuga no gusobanura Bibiliya mu bujiji uko bo babyumva bakitwaza ko bayisomye mu Mwuka; bagera aho batezwe cyangwa badasobanukiwe bakavuga ko yivuguruza cyangwa idasobonura neza ibintu bakarangiza bavuga ko ari inyanja yaroha umuntu.

Mu by’ukuri iyo ukuri kutaragaragara ikinyoma gikomeza gufata intebe ariko ukuri nuko nta kintu na kimwe cyanditswe muri Bibiliya kidasobanutse; icyo udasobanukiwe gerageza kwegera abagize icyo bagusumbyeho ku bumenyi bwa Bibiliya bagufashe; Niyo mpamvu usanga hari abafite ubumenyi bw’ikirenga mu mashuri ya Bibiliya.

Umwuka wera yatwigisha nibyo ariko hari aho bigera Bibiliya nk’andi ma Sciences yose bikadusaba ubumenyi runaka kugirango tugire ibyo dusobanukirwa neza; Bityo dukeneye kuyiga no kuyikoraho ubucukumbuzi bwimbitse; tubifashijwe kandi tukabiyoborwamo n’imbaraga z’Umwuka Wera.

Zaburi 119:103 BIR " Mbega ukuntu ibyo wavuze bindyohera! Bindyohera kurusha ubuki. "

Abenshi mu gusoma Bibiliya usanga babishyize mu Mwuka gusa; ariko nkuko ibindi bitabo dusoma tugerageza guhuza ibyanditsemwo tugakoresha ubwenge mu gusesengura; Niko n’igihe dusoma Bibiliya bikenewe kuyisomana ubwenge n’ubushishozi tutagambiriye gushyira hejuru ubwenge bwacu ahubwo tugirango turusheho kumenya no gusobanukirwa; Bidakuyeho wa mwanya w’Umwuka Wera nkuko twabibonye hejuru.

Bibiliya ni igitabo gifite ubuzima; Usoma kikakuvugisha; Hari ingero za benshi bahinduwe nayo; Bakihana kandi nta wundi muntu wari uhari wo kubigisha; ubu bakaba ari abakozi b’Imana bakomeye; Ariko nyuma baba bakeneye kwiga n’ubumenyi bwisumbuyeho ( Inyigisho za Bibiliya; Imyiherero; Kugana amashuri ya Bibiliya...).

Kuba mu iyi minsi ya none turi kumva ubuyobe bukomeye mu bantu no mu matorero; ipfundo rya byose n’uko abantu badashaka gusona no kwiga Bibiliya; Buri wese akayisobanura uko abishaka nuko abyumva agamije icyo ashaka kugeraho ( Inyungu bwite ).

Ntiwaterura umurongo umwe muri Bibiliya ngo umenye icyo Imana ishaka kuvugana nawe; N’amabaruwa abantu batwandikira usomye umurongo umwe cyangwa igice cyibaruwa; Ntiwamenya icyo uwakwandiye yashatse kukubwira; niba rero dushaka kurwanya ubuyobe tukaba twifuza kumenya ukuri, nidufate umwanya wo gusoma no kwiga Bibiliya.

Bityo tuzarushaho kuvugana n’Imana kandi ibyo twibwiraga ko ari amayobera; tuzasanga ari ukuri kwambaye ubusa; Kandi biturinde guteraganwa n’imiyaga n’ubuyobe buri gukwirakwiza muri iyi minsi ya none n’abiyita abakozi b’Imana nyamara bamwe ari intumwa zuwo bakorera twe tutazi; Imana iduhumure kandi iduhe ubwenge kugirango tumenye ukuri ( Ijambo ry’Imana niko kuri ).

Hoseya 4:6 BY “Ubwoko bwanjye burimbuwe buzize kutagira ubwenge. Ubwo uretse ubwenge, nanjye nzakureka we kumbera umutambyi. Ubwo wibagiwe amategeko y’Imana yawe, nanjye nzibagirwa abana bawe."

Amen!

Like facebook: Buroyumutima Richard
Like page: Gospel Tone

Umwigisha w’Ijambo ry’Imana : Richard BUROYUMUTIMA
From: Gethsemane Gospel Ministries

Ukeneye ibindi bisobanuro cyangwa gutanga ubwunganizi Contacts:0722356430 (Whatsapp);0781561919

Yisangize Inshuti.

Ibitekerezo 1

  1. Nimukomeze muhe abantu amagambo yubwenjye rwose, bizatuma Imana ikomeresha umwuka wayo umwuga wanyu nkitangazamakuru. Munabigiriremo umugisha. Amahoro@

Tanga Igitekerezo