Ari ingengabihe y’abaromani n’iyabayuda, ni iyihe igaragaza ukuri ku rupfu rwa Yesu

1

"Matayo12:40 " Nk’uko Yonasi yamaze iminsi itatu n’amajoro atatu mu nda y’igifi, ni ko n’Umwana w’umuntu azamara iminsi itatu n’amajoro atatu mu nda y’isi."

Iyo ugendeye ku minsi Bibiliya igaragaza Yesu yagombaga kumara mu mva ariyo amajoro atatu n’amanywa atatu; Usanga bihabanye kure n’ingengabihe " Karendali " y’Abaroma yashyizweho na Papa Geregoli; Iyi ngengabihe ikaba imaze imyaka 2017 mugihe ingengabihe y’abayuda yo imaze imyaka 5777.

Ingengabihe ya Papa Geregoli y’Abaroma ariyo natwe dukoresha; igaragaza ko Yesu yaba yaratanze kuwa gatanu Mutagatifu ku isaha ya cyenda z’amanywa akazuka mu rukerera rwo ku Cyumweru cya Pasika; Ubaze usanga bihwanye n’amasaha 32h Yesu yaba yaramaze munda y’isi.

Urujijo rukomeye ruterwa n’uruhurirane rw’amasabato yari yahuriranye muri kiriya cy’umweru Yesu yatanzemo; Kuko Abayuda bari bizihijemo isabato ngarukamwaka " Aho barya imitsima idasembuye bibuka umunsi bavaga mu Misiri "; Iyo Sabato yahuriranye n’isabato isanzwe iba buri cyumweru ariyo Karindali y’abayuda ibara ihereyeho. Izo ngengabihe zombi zivuga ko Yesu yururukijwe ku musaraba isabato yenda gutangira.

Abayuda babara bagendeye ku isabato ngarukamwaka n’ubu bacyizihiza; naho Abaroma bakabara iminsi ya Pasika bagendeye ku isabato ngaruka Cyumweru, Ariyo ubara ugasanga Yesu yaba yaramaze iminsi mike mu nda y’isi kuyo Bibiliya ivuga " Amanywa atatu n’amajoro atatu".

Ni imibare yoroshye nawe wakora; Yesu abaye yaratanze kuwa Gatanu Mutagatifu saa cyenda akazuka mu rukerera rwo ku cyumweru; ntabwo yaba yaramaze mu nda y’isi amanywa atatu n’amajoro atatu!

Kuba ingengabihe y’Abaroma igabanya iminsi Yesu yagombaga kumara mumva; byakozwe na Papa Geregoli niho bamwe bahera babihuriza na Anti Kristo " Guhakana imbaraka; Urupfu n’umuzuko bya Yesu Kristo ".

Dore uko ingengabihe y’Abaroma ivuga ikanabara ibijyanye na Pasika

Uwa gatanu Mutagatifu ni umunsi abaKristo hafi ya hose ku isi bibukiraho gutotezwa bikomeye no kubambwa kwa Yesu ku musaraba i Karuvali ariho hanitwaga Gorogota cyangwa Nyabihanga . Uwa gatanu Mutagatifu uzwi cyane kandi nk’umunsi w’ikiruhuko hafi ya hose ku isi ku bemera bakizera Yesu Kristo.

Ubutumwa bwiza butugaragariza ko Yesu nyuma yo gusangira n’abigishwa be Pasika ya nyuma , mu iryo joro ryo kuwa Kane Mutagatifu saa cyenda z’urukerera ariho yatangiye gutotezwa bikomeye, arashinyagurirwa n’abayuda bene wabo.

Mu gitondo cyo kuwa Gatanu Mutagayifu nibwo yafashwe atwarwa ku mutambyi mukuru Ana; Ashijwa ko yiyita Umwana w’Imana nyamara Ana umutambyi we ntiyamubonaho igicumuro!

Muri kiriya gihe isi yari iyobowe n’ubwami bw’Abaromani; muri Isirayeli ku buyobozi hejuru habaga Guverineli uhagarariye Abaroma " Roman Empire ";Batwaraga ibihugu byose hamwe bigera 132; Uwo guverineli agakorana n’ubuyobozi busanzwe bwa Isirayeli; aribwo : Umwami gakondo " Herode"; Urukiko rw’ikirenga, Sanedili yabaga igizwe n’Abafarisayo bavanze n’abasadukayo bose hamwe bakaba 70 hakiyongeraho umutambyi mukuru " Ana" bose hamwe bakaba 71; mu gihe cya Yesu Herode ni we wari umwami muri Isirayeli.

Muri bya bihugu 132;buri gihugu cyagiraga ubuyobozi bwacyo ariko hakaba hejuru guverineli wari uhagarariye ubwami bwa Roma;ni we watangaga amakuru i Roma; Akaba ari na we wari ufite ijambo rya nyuma kuri buri gihugu ayoboye gikoronijwe na Roma kuko yakoranaga bya hafi n’ingabo z’Abaroma zari ziyoboye isi kandi z’ifite imbaraga zikomeye.

Guvelineli Pilato uhagarariye ubwami bwa Roma muri Isiraheli yabuze ikosa kuri Yesu;Amwohereza ku Mutambyi mukuru Ana niwe warukuriye urukiko rukuru rw’Abayuda Sanedili; Umutambyi mukuru Ana nawe amubuzeho icyaha yongeye amwohereza kwa Guvelineli Posiyo Pilato; Pilato abuze icyo yakorera Yesu dore ko yabaga ashorewe na rubanda bamukomera basheje ngo abambwe bahagarariwe n’abatambyi ndetse n’abafarisayo;Pilato yahise amwohereza kandi kwa Helode; Pilato asaba Abayuda n’umwami wabo Helode ko aribo bamucira urubanza bakurukije imihanga ya Kiyuda; Kuko Pilato we yasanze ntategeko ry’Abaromani narimwe yishe.

Pilato amaze kumwoherereza umwami w’Abayuda Helode nawe yahise yongera amugarura kwa Pilato; kuko Herode nk’Umwami w’abayuda nawe nta cyaha cyangwa ikosa yamubonyeho; Igitangaje nuko Helode yikuyemwo ikanzu yari yambaye y’ubwami arayimwambika Yesu; kuko yiyitaga umwami w’abayuda; Bigaragara ko Helode yashimangiye ko Yesu ari umwami koko.

Pilato yagaragaje imbere y’imbaga ko Yesu ari umwere niko gukaraba kugirango ashimangire ko we kubwe ntakibi amwifuriza kandi ko ntakosa yamubonyeho narimwe.Ategeka ko ku musaraba we bandikaho Yesu Umwami wa Bayuda; Byababaje abayuda; Ndetse basaba Pilato kubikosora arabasubiza ati " Ibyo nanditse namaze kubyandika " Bamubamba nk’Umwami w’abayuda n’ikamba ry’’amahwa.Amen

Mu rukerera rwo kuwa Gatanu mutagatifu nibwo yakubiswe bikomeye; Nyuma yikorezwa umusaraba agana i Goligota bigaragara ko yari yababajwe bikomeye nta mbaraga agifite kuko uburyo yakubiswemwo bwari uburyo bwindenga kamere; Mu mbaraga nke yari afite yagwanye umusaraba inshuro eshatu; Aza kumanikwa ku musaraba aho yatanze ku isaha ya cyenda zo kuwa Gatanu akazuka murukerera rwo ku Cyumweru; Ariho hagaragarira urujijo rwuko ku iyi ngengabihe y’Abaroma Yesu yaba atarakwije amajoro atatu n’amanywa atatu yagombaga kumara mumva.

UKURI KWA PASIKA KU NGENGABIHE " KARINDALI " Y’ABAYUDA

Karindali y’Abayahudi ibara bitandukanye n’iyo dukoresha. Abayuda bo babara bagendeye ku manywa n’ijoro; Ni nako Imana yabaraga mu kurema; Iyo ubaze iminsi Yesu yagombaga kumara mu mva nkuko Bibiliya ibivuga; usanga Yesu yaragombaga kumaramo amasaha 72, ahwanye n’amanywa atatu n’amajoro atatu. Wabara ku ngengabihe y’Abaroma ugasanga Yesu yaba yaramazemo amasaha 32.

Abayuda bo bavuga ko Yesu yasangiye Pasika ya nyuma n’intumwa ze ari kuwa kabiri; Murukerera rwaho ahagana muma saa cyenda niho intumwa ye Yuda yaje ikamusoma ari kumwe n’igitero cyari kije kumufata. Petero nibwo yafataga inkota aca ugutwi kumwe mubari baje gufata Yesu ariko Yesu aragutora agusubizaho.

Yesu baramutwaye mu icyo gitondo bagana i Karuvari; Yarababajwe bikomeye kuburyo umubabaro yagize ntawundi muntu ku isi uzahura nawo; itotezwa yakorewe ntiwabona uko wabisobanura.

Kuwo wa Gatatu ku mugoroba nibwo bari kwizihiza isabato yabo ngarukamwaka; Aterwa imisumaniri mu maguru n’ibiganza amanikwa ku musaraba atanga kuri uwo wa Gatatu saa cyenda ku itariki ya 14 ya nisani ariyo kwezi kwa kane kungebihe y’Abayahudi.

Umurambo wa Yesu wururukijwe ikubagahu banga ko isabato yamusanga ku musaraba kuko cyaziraga mu mihango y’Abayuda.Iyo sabato yari isabato ngaruka mwaka; kuko bwagombaga gucya haba umunsi w’imitsima idasembuye wamaraga iminsi irindwi; Bibuka kuva mu Misiri; Bigaragara ko iki cyumweru cyahuriranyemo amasabato abiri, Isabato ngaruka mwaka n’isabato ngaruka cyumweru isanzwe.

Mu minsi irindwi y’imitsima idasembuye Abisirayeli bayimara barya ibitagira umusemburo n’imboga zitagira ikintu na kimwe; Aho baba bikingiranye mu mazu yabo baririmba indirimbo bita "HAGADAH" Ni indirimbo baririmbye igihe basohokaga mu Misiri; iyo ndirimbo imara umunsi wose; Yashira bakongera bakayitangira.

Muri Isiraheli iyi Pasika twe twizihiza yo kuzuka kwa Yesu; Isa n’aho itazwi kuko yizihizwa na bake;Aba Kristo ni 10%; Abasilamu 11%; Abandi bose bakagendera ku mategeko ya Musa; Abayuda benshi bategereje kuza kwa Yesu; Bizerako Mesiya wabi ataraza.

Igitangaje n’uko ubukerarugendo bwabo igice kinini kigizwe n’ibiranga amateka ya Yesu!Abisirayeli ubu bakaba ari umwaka 4000 bavuye mu Misiri " Egiputa "

Ukurikije ingengabihe y’Abayuda, Yesu yaje kuzuka mu rukerera rwo Ku cyumweru aribwo ubara ugasanga yamajoro atatu n’amaywa atatu yari yuzuye.

Mu byukuri ikibazo nticyakabaye iminsi nibyo abantu bavuga cyangwa uko babibara; Igikomeye n’uguhora iteka abantu bazirikana igikorwa Yesu yakoze ku musaraba n’igitambo gikomeye yatambye rimwe risa kitagira inenge ku musaraba kikaba impongano yabari mu isi bose; Umu Kristo wukuri yagakwiye guhora yibuka umunsi ku munsi urupfu n’izuka bya Yesu " Pasika ".

Like facebook: Buroyumutima Richard

Like page: Gospel Tone

Umwigisha akaba n’umuvugabutumwa : Richard BUROYUMUTIMA
From: Gethsemane Gospel Ministries

Ukeneye ibindi bisobanuro cyangwa gutanga ubwunganizi
Contacts:0722356430 (Whatsapp);0781561919

Yisangize Inshuti.

Ibitekerezo 1

  1. 75.4% Jewish, 16.9% Muslims,2.9% Christian according to statistics 2011, ukosore, ikindi Jewish ni abantu bahakanye, ntago bakurikiza amategeko 10 yahawe Mussa

Tanga Igitekerezo