Amashirakinyoma ku byo wibaza ku isano hagati y’amadini ya gikirisitu, Islam n’amadini gakondo

Uhereye iburyo aba ni Sheikh Sindayigaya Musa, Senyenzi Appoloni Padiri wa diyosezi gaturika ya Butare, umunyamakuru Eduard Mubaraka (hagati),Pastor Margaret Murebwayire na Dusabimana Emmanuel uhagariye idini gakondo mu Rwanda barasobanura iby’imyizerere yabo n’abo bahagarariye

Mu Rwanda n’ahandi muri Afurika ndetse no ku Isi muri rusange, amadini yose ya gikirisitu avuga ko asenga Imana imwe yaremye Ijuru n’Isi n’ibirimo byose. Ibyo n’abasilamu na bo ni ko babyizera, ikiyongereyeho ni uko buri dini muri ayo rigira igitabo gitagatifu rishingiraho imyemerere yaryo, Ibi bishobora gutuma umuntu yibaza niba abasengera mu madini gakondo na bo bagira Imana bemera cyangwa igitabo gitagatifu bashingiraho imyemerere

Mu kiganiro Menya icyo wibaza gihita kuri TV 10 twabakurikiraniye uko washira amatsiko ku bibazo ushobora kuba wibaza ku isano cyangwa itandukaniro hagati y’ amadini gakondo n’andi madini ya gikirisitu cyangwa Islam.

Ubwo umunyamakuru ukora iki kiganiro yari yatumiye bamwe mu bayoboke n’abahagarariye amadini atandukanye ngo baganire ku ishingiro ry’imyemerere yabo, abakirisitu bavuze ko imyerere yabo ishingiye ku kwizera Imana imwe rukumbi yaremye Ijuru n’Isi n’inyanja n’amasooko nkuko byahamijwe n’abakirisitu bari batumiwe muri iki kiganiro.

Abasilamu na bo bavuga ko bemera Imana imwe nkuko n’abakirisitu babyemera. Ibi byasobanuwe muri iki kiganiro na Sheikh Sindayigaya Musa uhagarariye idini ya Islam mu mujyi wa Kigali.

Dore ibisubizo kuri byinshi wakibaza ku mikorere y’idini gakondo mu Rwanda

Ese abasengera mu madini gakondo na bo bagira Imana imwe bashigiraho imyizerere yabo?

Emmanuel Dusabimana uturuka mu gisekuru cy’iburagurabwami akaba ari na we uhagarariye idini gakondo mu Rwanda ndetse akaba ari na we wari uhagarariye idini rya Gakondo muri iki kiganiro, yavuze ko nta Mana imwe bagira kuko ngo basenga abakurambere (imandwa) kandi ngo baba ari benshi, ibyo bivuze ko batagira Imana imwe ahubwo ngo basenga imana nyinshi.

Ese imana (imandwa) z’abasengera mu madini gakondo ni izihe? Ni zingahe?

Ryangombe rya Babinga ba Nyundo wa Binego bya Kajumba ngo ni we mana yabimburiye imana z’abasengera mu madini ya gakondo, nyuma ngo hagiye habaho izindi mana nka Nyabingi Biheko ngo na we yakurikiyeho mu kinyejana cya 19 akaba ngo yari afite icyicaro mu ntara y’amajyaruguru.

Wari uzi ko abasengera mu madini gakondo na bo bafite ibyo basimbuza ibitabo bitagatifu?

Abasengera mu idini gakondo ngo bafite ibintu bafata nk’ibintu bitagatifu bibafasha mu kwambaza imana (imandwa) zabo.
Muri ibyo ngo harimo agacuma n’agaheha bya Kinyarwanda n’imbehe ya Kinyarwanda bagaburiraho izo mandwa zabo.


Ibi ni byo abasengera mu idini gakondo bafata nk’ibintu bitagatifu mu idini ryabo

Ese wari uzi ko abasengera mu idini gakondo na bo bagira isengesho?

Binyuze mu migenzo n’Imiziririzo, Guterekera, kuragura, kubandwa, gushika n’indi mihango, abasengera mu madini gakondo ngo hari amagambo bavuga bafata nk’amasengesho yabo.

Ngo iyo barimo gukora iyi mihango, basoma ku nzoga bagacira k’uruhimbi rw’imandwa bagiye kuramya bakagira bati: “ Ryangombe (cyangwa undi barimo kwambaza) singuhereye hasi turasangiye, uhe uwaguhaye wime uwakwimye, utsinde abanzi, utsinde abagome, utsinde abagambanyi” ubwo ngo bakaba barasenze.

Burya kandi ngo buri muntu mu basengera mu madini gakondo agira imandwa ye asenga bitewe n’imandwa nkuru iri mu mujyango akomokamo. Gusa ngo bose babanza kwiyambaza Ryangombe kuko ngo ari we mandwa nkuru iri mu ijuru bakabona gukurikizaho imandwa nto.

Wari uzi ko abasengera mu madini gakondo na bo bemera Roho?

Burya ngo abasengera mu madini ya gakondo na bo bemera ko iyo umuntu apfuye ngo hahambwa umubiri ariko roho ye igasigara, ibi hari n’andi madini ga gikirisitu abyizera gutya.

Wari uzi ko imandwa zijya zigira umwanya wo kuza gusura abazisenga?

Burya ngo imandwa (abazimu) zijya zigira igihe zikaza kubaza ibyo zakundaga mu bayoboke bazo, icyo gihe rero ngo abazisenga bakora umuhango witwa guterekera abazimu maze bakabaha ibyo bashaka bagasubirayo.

Wari uzi ko abasengera mu madini gakondo na bo bambaza imana(imndwa) zabo kandi zigakora ibitangaza?

Burya ngo abasengera mu madini ya gakondo, ngo bemera ko imana zabo zikora ibitangaza nko gukiza abarwayi. Dusabimana uhagarariye idini gakondo mu Rwanda yasobanmuye ko ngo hari ubwo babazanira abantu barwaye cyane bakambaza imana zabo ngo zikabakiza.

Aha Dusabimana yatanze urugero rw’abantu baba barozwe, abo bateje amahembe, abo babuye (kwabura), n’abandi ngo barabagana kandi bakiyambaza imandwa zabo bakazibaza umuti bakoresha kandi ngo imandwa zabo zibarangira imiti ikiza indwara.

Wari uzi ko abasengira mu madini gakondo na bo batura amaturo n’ibitambo?

Buraya ngo abasengera mu idini gakondo bagira amaturo n’ibitambo, nkuko uwari uhagarariye idini gakondo muri iki kiganiro yabisobanuye neza, ngo bagira umwanya wo gufata ibyo kurya no kunywa bagashyira imana zabo (abakurambere).

Bimwe mu byo baha izo mandwa zabo ngo harimo inyama, inzoga, umutsima w’amasaka, amata n’ibindi. Ngo iyo nbagiye gutura izoma mandwa zabo kandi ngo ntibapfa kuziha ibyo babonye ahubwo ngo bagendera ku cyo iyo mandwa (umukurambere) yakundaga


Dusabimana (uwambaye ingofero) ngo ntiyasigana n’ibikoresho bye yita bitagatifu mu myemerere y’idini gakondo

Ese ko imandwa z’abasenga mu madini gakondo ari abantu baba barapfuye, ibyo baziha ni nde ubirya cyanga ubinywa?

Dusabimana yasobanuye ko iyo bajyanye ibyo kunywa cyangwa ibyo kurya ku ruhimbi rw’imandwa iyo bukeye ngo basanga ntabihari, bityo ngo bo bizera ko izo mandwa zabo ari zo zibirya.

Wari uzi ko mu mana z’abanyamadini gakondo harimo inkuru n’into?

Burya ngo imandwa zambazwa n’abasengera mu idini gakondo ngo ntizingana, ngo habamo inkuru n’into. Dusabimana yavuze ko Ryangombe ari we mandwa nkuru, kuko ngo yakoraga ibitangaza bikomeye birimo kumanura ibicu, gukubitisha inkuba nta mvura ihari, kumanura imiriro mu ijuru n’ibindi. Ibi ngo bituma uyu Ryangombe yitwa imandwa nkuru izisumba zose.

Wari uzi ko abasengera mu idini gakondo bemera ko imana yabo nkuru na yo iri mu Ijuru?

Dusabimana yavuze ko mu myemerere yabo ngo bemera ko Ryangombe (imandwa nkuru) nyuma yo gupfa ngo yagiye mu ijuru. Bityo ngo iyo basenga babanza mbere na mbere kumwiyambaza kuko ngo ari we mana yabo nkuru iri mu Ijuru bagakurikizaho abandi bakurambere bakuru bo mu miryango.

Wari uzi ko buri mana yose mu z’abasengera mu madini gakondo igira aho isengerwa hihariye?

Burya ngo abasengera mu madini gakondo iyo umukurambere wabo apfuye bamwubakira inzu bagashyiramo uruhimbi maze ngo bakajya bamushyira ibyo kunywa n’ibyo kurya bazi ko yakundaga kurusha ibindi. Ngo kirazira mu idini gakondo kuramiriza imanwa ebyiri k’uruhimbi rumwe, ibi ngo babifata nk’icyaha.

Ushaka kumenya byinshi ku nkomoko n’intego z’ibintu ufitiye amatsiko mu Rwanda n’ahandi ku Isi wakurikirana ikiganiro Menya icyo wibaza gihita kuri TV10 buri wagatandatu saa munani no kucyumweru saa cyenda cyangwa ukabishakisha ku rubuga nkoranyambaga rwa Youtube ushaka izina ry’ikiganiro (Menya icyo wibaza)


Kurikirana ikiganiro menya icyo wibaza usobanukirwe byinshi wibaza kuri iyi si.

Jean Paul NIYITANGA

MAKURUKI.RW

Yisangize Inshuti.

Ibitekerezo

Tanga Igitekerezo