Abayisilamu dufite uburenganzira bwo kugaragaza imyemerere yacu – Sheikh Hitimana

Mufuti w’u Rwanda Sheikh Hitimana Salim arashimira Leta y’u Rwanda kuko yahaye agaciro gakwiye idini ya Islam bikaba byarahaye umuyisilamu uburenganzira n’ubwisanzure bwo kugaragaza imyerere ye aho ari hose mu gihugu ntawe umuhutaje.

Ibi Sheikh Hitimana yabitangaje kuri uyu wa 2 Nyakanga 2017, mu muhango wo gusoza amarushanwa mpuzamahanga yo gusoma no gufata mu mutwe Quraan, igitabo gitagatifu cy’idini ya Islam.

Umuyobozi w’Abayisilamu mu Rwanda Sheikh Hitimana yavuze ko mu gusoza aya marushanwa atabura gushimira Leta y’u Rwanda ku byiza yagejeje ku banyarwanda birimo no guha amadini yose uburenganzira n’ubwisanzure bwo kugaragaza imyemerere yabo.

Ati: “Nkuko mubizi, ubu idini ya Islam mu Rwanda yahawe agaciro ikwiye, ubu abayisilamu dufite uburenganzira n’ubwisanzure bwo kugaragaza imyemerere yacu ya Islam, ibi rero ni ibigaragaza ko ihame ry’imiyoborere myiza mu gihugu cyacu rimaze kuba ubukombe bikaba aribyo bituma nshimira Leta kuko udashimira abantu ntabwo yashimira Imana.”

Yakomeje agira ati: “Dufashe uyu mwanya kugirango dushime ibyiza abanyarwanda twagezeho dukesha imiyoborere myiza ya Perezida Paul Kagame, tunasaba abayisilamu gukomeza gusigasira ibi byiza twagezeho no kuzagira uruhare mu migendekere myiza y’amatora y’umukuru w’igihugu ateganyijwe mu kwezi kwa Munani.”

Meya w’akarere ka Nyarugenge Kaisiime Nzaramba yavuze ko iki gikorwa ari cyiza kuko gihuza u Rwanda n’amahanga bikanongerera abana b’abanyarwanda ubunararibonye mu guhatanira gutsinda amarushanwa mpuzamahanga kandi bakitwaraneza.

Yasabye abana bafashe Quraan mu mutwe gushyira mu bikorwa ibyo bafashe. Ati: “Uyu munsi mwahembwe ariko ntibigarukire aho, icyo dusaba ni ukugirango mubishyire mu bikorwa murusheho kubigeza no kubandi kandi murusheho kuba ba nkore neza bandebereho.”

Aya marushanwa yasojwe uyu munsi yari abereye mu Rwanda ku nshuro yayo ya gatandatu. Yitabiriwe n’ibihugu 11 birimo u Rwanda rwayateguye rukanayakira, Uganda, Tanzania, RDC, Burundi, Kenya, Sudani y’Epfo, Ethiopie, Zanzibar, Malawi na Mozambique.

Ibigenderwaho mu gukosora harimo kuba umwana yarafashe mu mutwe neza Quraan akayivuga mu mutwe adategwa, Kunoza imisomere y’ururimi rw’icyarabu iba yanditsemo no kurangurura neza ijwi mu buryo buryoheye amatwi y’abamwumva.

Umunya-Uganda ni we wegukanye igihembo cy’umuntu witwaye neza kurusha abandi mu gufata mu mutwe Quraan yose ahembwa Miliyoni y’amanyarwanda, uwa kabiri aba umwana waturutse muri Zanzibar, umunya-Kenya yabaye uwa gatatu na ho umunya-Ethiopie aba uwa kane.

Umwana waturutse muri Kenya n’umunya-Tanzania ni bo babaye aba mbere mu cyiciro cyo gufata mu mutwe ibice 20 bya Quraan bahembwa ibihumbi 500, bakurikirwa n’abanyarwanda babiri bahembwe ibihumbi 200.

Ibyiciro byo gufata mu mutwe ibice 15, 10 na 5 bya Quraan byari byahataniwe n’abanyarwanda gusa, muri bo 7 bitwara neza bahawe ibihembo bitandukanye biri hagati y’ibihumbi 50 na 100 by’amafaranga y’u Rwanda.

Sheikh Hitimana yavuze ko mu Rwanda hari abana basaga 100 bamaze gufata Quraan yose mu mutwe ndetse ngo kuva muri 2010 hari n’abajya bitabira amarushanwa mpuzamahanga y’inzobere mu gufata mu mutwe Quraan abera mu bihugu bitandukanye nka Misiri, Arabie Saudite, Dubai, Tanzania na Zanzibar kandi ngo bitwaraneza.

Igihugu cya Arabie Saudite nicyo gitera inkunga aya marushanwa ndetse kikanatera inkunga gahunda zitandukanye zokwigisha iki gitabo gitagatifu ku bayisilamu bose ku isi.

Aya marushanwa yadsorejwe kuri sitade ya Kigali i Nyamirambo yari amaze iminsi abera mu karere ka Gicumbi mu Ntara y’Amajyaruguru ndetse n’andi atanu yayabanjirije ni ho baberaga.


Bamwe mu bakosozi bari bari baturutse muri Arabie Saudite




Iki gikorwa cyari cyitabiriwe n’abayisilamu benshi

Yisangize Inshuti.

Ibitekerezo

Tanga Igitekerezo