Ntibisanzwe! Aitel Rwanda yazirikanye abakene n’abatagira kivurira

Ku nshuro ya mbere, sosiyete y’itumanaho ya Airtel Rwanda igiye gutangiza gahunda igamije kuzirikana abakene ndetse n’abatagira kivurira babayeho mu buzima bugoranye hagamijwe kubafasha, kubaremamo icyizere no kubaha amahirwe yo kwikura muri ubwo buzima bukomeye babayemo.

Iyi gahunda yiswe ’Touching lives’ bishatse kuvuga “Gukora k’ubuzima” ni gahunda izajya iba ngarukagihe aho Airtel izajya iha ubufasha bufatika (ibiribwa, amafaranga n’izindi serivisi) ndetse bakanabakorera ibikorwa bitandukanye byo kubaremamo ikizere cyo kubaho neza mu muryango Nyarwanda.

Kuri iki gikorwa, itsinda ry’abakozi ba Airtel ryatoranyije abantu 20 bazafashwa muri iki gikorwa cya ‘Touching Lives’.

Aba batoranyijwe, bazajya batanga ubuhamya bw’ubuzima babayemo ku bitangazamakuru bitandukanye nka Televiziyo y’igihugu (RTV) guhera kuri iki cyumweru tariki 24 Nyakanga saa moya n’igice no kuri TV1 kuwa kabiri tariki 26 Nyakanga saa kumi n’ebyiri n’iminota 10.

Umuyobozi wa Airtel Rwanda Michael Adjei Nii Boye yahamagariye abanyarwanda bose kureba iyi gahunda ku ma televiziyo kuko izaba ivuga ibintu by’ukuri.

Yagize ati: “Twishimiye gahunda ya ‘Touching Lives’ ije ku banyarwanda ku nshuro ya mbere, ibyo mwari mutegereje birashyize biraje, duhamagariye abantu bose bakunda kureba ibiganiro by’ukuri kuri za Televiziyo kureba agace ka mbere (episode 1) izatangazwa muri iki cyumweru ku cyumweru kuri TVR”.

Michael Adjei Nii Boye kandi yashimangiye ko uretse ugukora ubucuruzi, Airtel ishishikajwe no kuzamura abaturage ikorana na bo ari na yo mpamvu yatangije iyi gahunda ya ‘Touching Lives’.

Ibiganiro bizajya binyuzwa kuri Televisiyo muri gahunda ya Touching lives bizajya byibanda ku buzima bukomeye abantu banyuzemo, nk’inkuru z’abarokotse Jenoside, uburezi, ubuzima no kwihangira imirimo.

Ibi biganiro byibanda ku kuzamura ubuzima bw’abababaye bizamara ibyumweru 11, bikazatangira kunyuzwa kuri Tereviziyo guhera tariki 24 Nyakanga kuri Tereviziyo Rwanda (TVR).

Ibindi wamenya kuri sosiyete y’itumanaho ya Airtel

Bharti Airtel sosiyete y’itumanaho ikorera mu bihugu 20 biherereye muri Aziya na Afurika, icyicaro cyayo giherereye mu Buhindi mu mujyi wa New Delhi.

Iyi sosiyete iri muri sosiyete z’itumanaho 3 za mbere ku Isi zifite abakiriye benshi dore ko mu mpera za Gicurasi uyu mwaka yari igeze ku bakiriye bagera kuri miliyoni 361.

Mu Buhindi, iyi sosiyete niyo itanga uburyo bwo gukoresha interineti butandukanye bwaba ubukoresha 2G, 3G, na 4G.

Ushaka kumenya byinshi kuri sosiyete y’itumanaho ya Bharti Airtel wasura urubuga rwayo www.airtel.com

Yisangize Inshuti.

Ibitekerezo

Tanga Igitekerezo