Abakiriya ba Airtel bazajya bakira amafaranga yoherejwe na Western Union ku buntu

Sosiyete y’itumanaho ya Airtel Rwanda yasinyanye amasezerano na kompanyi ya Western Union, imwe mu makompanyi azwiho gutanga serivisi zo guhererekanya amafaranga, aya masezerano azajya yemerera abanyarwanda bakoresha ifatabuguzi rya Airtel kwakira amafaranga yoherejwe kuri Western Union aturutse aho ari ho hose ku Isi k’ubuntu bakoresheje Airtel Money.

Kuri ubu, abakiriye ba Airtel mu Rwanda bakoresha Airtel money bashobora kwakira amafaranga bohererejwe n’uwo ari we wese kuri Western Union aho yaba ari hose ku Isi k’umu ajenti (agent) wese wa Airtel Money nkuko bakoresha icyuma gikoresha ikoranabuhanga mu kubitsa no kubikuza (ATM Machine) mu masaha 24 kuri 24.

Mu minsi yashize, kugirango wakire amafaranga yoherezwa hakoreshejwe Western Union byasabaga umuntu kujya gutonda imirongo kuri Banki cyangwa ugakora urugendo ushaka aba Agents ba Western Union bigatwara igihe kinini kandi bikanabasaba ikiguzi.

Ibi ni byo Airtel yoroheje kuko ubu umuntu azajya ayabikuriza kuri konti ye ya Airtel Money kuba Agent bayo. Ibi Mr. Michael Adjei ushinzwe umutungo muri Airtel Rwanda abifata nk’impinduka ikomeye.

Michael yagize ati: “iri ni iterambere rizanye impinduka mpuzamahanga muri serivise zo guhererekanya amafaranga kuko bizabafasha kuzigama igihe n’amafaranga”

Molla Shea ushinzwe ikoranabuhanga muri Airtel yavuze ko ubufatanye bwa Airtel na Western Union ari amahirwe ku bakiriye ba Airtel kuko bagiye kujya bakira amafaranga yabo ku buryo bubahendukiye, bubanogeye kandi bwizewe.

Muri ubu bufatanye, ngo umukiriye azajya abasha gufata amafaranga yohererjwe ayashyire kuri konti ye ya Airtel money abe yayagendana aho ashaka hose ndetse yemererwe no kuyabikuza uko ashatse n’igihe ashakiye.

Ibi bizanafasha abantu kuruhuka umutwaro wo kugenda batwaye imizingo y’inoti cyangwa imirundo y’ibiceri kuko bazajya bayatwara kuri konti zabo za Airtel Money bakayabikuriza igihe bashakiye.

Ibindi wamenya kuri sosiyete ya Bharti Airtel

Bharti Airtel ni sosiyete y’itumanaho ikorera mu bihugu 20 biherereye muri Aziya na Afurika, icyicaro cyayo giherereye mu Buhindi mu mujyi wa New Delhi.

Iyi sosiyete iri muri sosiyete z’itumanaho 3 za mbere ku Isi zifite abakiriye benshi dore ko mu mpera za Gicurasi uyu mwaka yari igeze ku bakiriye bagera kuri miliyoni 361.

Mu Buhindi, iyi sosiyete ni yo itanga uburyo bwo gukoresha interineti butandukanye bwaba ubukoresha 2G, 3G, cyangwa 4G.

Ushaka kumenya byinshi kuri sosiyete ya Airtel wasura urubuga rwayo ari rwo: www.airtel.com

Yisangize Inshuti.

Ibitekerezo

Tanga Igitekerezo