U Rwanda ntirukora ku nyanja ariko rukora ku kirere -Minisitiri Kanimba

1

Ku mugoroba wo kuri uyu wa 19 Nzeli, Minisitiri w’ubucuruzi n’inganda mu Rwanda Francis Kanimba yakiriye mu biro bye abashoramari b’abanya-Suede baje kureba amahirwe ahari y’ubucuruzi.

Minisitiri Kanimba yabwiye aba banya-Suede ko u Rwanda ari igihugu gifite amahirwe atangaje mu bucuruzi ndetse ko ari igihugu cyorohereza abashoramari kugishoramo imari yabo.

Yavuze ko nubwo u Rwanda ari igihugu kidakora ku nyanja ariko ngo gishobora gukoresha uburyo bw’ikirere n’itumanaho mu korohereza abashoramari bifuza gushora imari yabo mu Rwanda.

Minisitiri Kanimba yagize ati: "U Rwanda ni igihugu kidakora ku Nyanja, ariko intego yacu ni ukugihindura igihugu cy’amahirwe, ntirukora ku Nyanja ariko rukora ku kirere kandi turimo guhanga amahirwe mu bucuruzi n’itumanaho"

Yavuzeko u Rwanda rwakoze ibishoboka byose mu guteza imbere ibikorwa remezo bifasha ba mukerarugendo kugubwa neza igihe basuye u Rwanda

Ati: " Mu rwego rw’ubukerarugendo u Rwanda rwashoye imari mu bikorwa remezo byinshi biremereye nka Kigali Convention Center"

Yavuze kandi ko Rwanda rwungukiye mu kwihuza n’ibihugu byo mu muhora wa ruguru n’ibyo mu muhora wo hagati.

Minisitiri Kanimba yibukije aba bashoramari ko kuri ubu kugenda mu bihugu by’umuryango wa Afurika y’iburasirazuba (EAC) bidasaba kujya kwaka Viza muri buri gihugu ahubwo ko ujya muri kimwe mu bihugu bya EAC kikaguha Viza ukabasha gutembere mu bihugu byose bigize EAC.

Yababwiye ko Leta y’U Rwanda igiye gushyiraho uburyo bworohereza abashoramari kubona ubutaka bakoreraho batabuguze kugirango baborohereze kubona aho bashyira inganda zabo.

U Rwanda rumaze kwandika izina ryiza mu korohereza abashoramari mu buryo butandukanye burimo ko kuborohereza kubona aho bakorera, kwandikiha ubucuruzi bwabo mu gihe gito no kuba u Rwanda ari igihugu gitekanye bigatuma abacuruzi bizera umutekano w’ibicuruzwa byabo.


Minisitiri Kanimba n’itsinda ry’abashoramari b’abanya - Suede

Yisangize Inshuti.

Ibitekerezo 1

  1. NTAGO TWASOBANUKIWE NIBYO MINISTER KANIMBA YAVUZE NGO URWANDA RUKORERA MUKIRERE?UBWOSE AZI GUKORERA MUKIRERE ICYO BISOBANUYE??

Tanga Igitekerezo