Kuba Amerika yivanye mu masezerano ya Paris, si ishyano ryaguye-Minisitiri Biruta


- Ntabwo twagiye mu masezerano kuko Amerika izaduha amafaranga

- Kuvamo si ishyano ryaguye

Amasezerano ya Paris yasinywe mu Ukuboza 2015, agamije kurwanya ibyuka byoherezwa mu kirere, hagamijwe ko nibura ibwiyongere bw’ubushyuhe bw’isi butarenga dogere selisiusi 2.

Agamije kandi kugeza isi muri 2050 nibura ibyuka byoherezwa mu kirere byagabanyutseho hagati ya hagati ya 40-70 % , no kuba byarangiye burundu mu mwaka wa 2100.

Icyakora kuri uyu wa Kane Perezida Donald Trump wa Amerika yatunguye isi, atangaza ko igihugu cye cyikuye muri ayo masezerano, ngo kuko abogamye, agamije kwambura abanyamerika akazi ndetse no gutuma batanga ubutunzi bwabo bwose mu bijyanye no kurengera ibidukikije ibindi bihugu byigaramiye.

Abayobozi batandukanye ku isi bamaganye icyo cyemezo, bagaragaza ko ari ikigamije kuroha isi.

Amerika ni umwe mu baterankunga b’Imena b’ikigega gishinzwe kurengera ibidukikije ku isi.

Mu kiganiro yagiranye na Makuruki, Minisitiri w’Umutungo Kamere mu Rwanda, Dr Vincent Biruta yavuze ko kuba Amerika yivanye mu masezerano bidakanganye cyane, ngo kuko ibindi bihugu byo byumva impamvu.

Yagize ati “..ikibyerekana nuko ibindi bihugu byose byamaze kuvuga ngo ntibizasubira inyuma kandi nibiba ngombwa tuzagira ibindi dukora kugirango intego twiyemeje tuyigereho, kandi ibyo byo tugomba kubyiyemeza.Nta nubwo amasezerano twayagiyemo kuko Amerika izazanamo amafaranga, twayagiyemo natwe dufite ibyo twiyemeje kuzakora.Tuzafatanya n’ibindi bihugu by’isi, kuba rero Amerika yaba ivuyemo ntiyongere gitanga amafaranga, ibyo bishobora kugira icyo bicumbagizaho ariko turacyategereje”

Minisitiri Biruta yavuze ko icyemezo cy’Amerika ntacyo kirahindura kubyo bari bariyemeje, ngo nibinaba ngombwa ibihugu birafatanya bizibe icyuho.

Ati “Bibaye na ngombwa abantu bavuga bati twongereho, kandi Amerika hari ababibona kuriya hari n’abandi babibona ukundi. Ntabwo twavuga ngo ishyano ryaguye.”

Itangazo ryasohowe n’Ubushinwa ndetse n’Umuryango w’Ubumwe bw’Uburayi kuri uyu wa Gatanu, ryagaragaje ko ibyo bihugu byiyemeje kuziba icyuho cy’amafaranga kizaterwa no kwikura mu masezerano kwa Amerika.

Imijyi minini yo muri Amerika yavuze ko nubwo Trump yavanye igihugu muri ayo masezerano, yo izayajyamo ku giti cyayo.

Ibihugu 195 nibyo byari byariyemeje gufatanya kurwanya imihindagurikire y’ibihe, kugeza muri Kamena uyu mwaka ibihugu 148 bimaze gusinya ayo masezerano.

Kugeza ubu Amerika ni igihugu cya kabiri ku isi cyohereza imyuka myinshi ihumanya ikirere.

Umushinga Global Carbon Project uvuga ko nibura buri segonda ku isi, mu kirere hoherezwa umwuka mubi (Co2) ungana na toni 1200.

Ishami ry’Umuryango w’abibumbye ryita ku buzima (OMS) rigaragza ko impfu zingana na miliyoni eshatu buri mwaka ziterwa n’umwuka wanduye.

Amazi y’inyanja akomeje kurenga inkombe, bikaba bikekwa ko hari n’imijyi izazimira kubera imihindagurikire y’ikirere.

Amategeko avuga ko igihugu kinyamuryango kivana mu masezerano nibura nyuma y’imyaka itatu gisinye kandi nyuma y’umwaka kibimenyesheje, bivuze ko Amerika izabasha kuvamo mu 2020 kuko itari yakamazemo imyaka itatu isabwa.

Nubwo impungenge z’amafaranga icyo gihugu cyatangaga mu kigega cyo kurengera ibidukikije agiye kubura, igiteye impungenge cyane n’imyuka inganda za Amerika zigiye kujya zohereza mu kirere nta nkomyi.

Yisangize Inshuti.

Ibitekerezo

Tanga Igitekerezo