Ibihugu 197 byemereje i Kigali ikurwaho rya hydrofluorocarbons ikoreshwa n’ibyuma bikonjesha

1

Minisitiri Vicent Biruta, niwe wemeje ku mugaragaro ivugururwa ry’aya masezerano

Abahagarariye ibihugu 197 byashyize umukono ku masezerano ya Montreal binyuze mu inama ya 28 y’ibi bihugu bemeje ivugururwa ry’ayo masezerano rya Kigali riteganya gukuraho ikoreshwa rya gaze ya hydrofluorocarbons ikoreshwa mu byuma bikonjesha n’ibitanga umuyaga mu nzu ariko ikangiza akayunguruzo k’izuba .

Nyuma y’iri vugururwa ryakorewe i Kigali, aya masezerano ateganya gukuraho ikoreshwa rya gaze yitwa hydrofluorocarbons (HFC) ikoreshwa n’ibyuma bitanga umuyaga ndetse n’ibikonjesha bitewe n’ingaruka iyo gaze igira ku kayunguruzo k’isi.

Gukuraho ikoreshwa ry’iyi gaze ngo bizagabanya ubushyuhe bw’isi ku kigero cya dogere 0.5 (0.5°C) mu myaka ijana iri imbere, kandi muri 2050 ngo bizaba bimaze kugabanya toni ziri hagati ya Miliyali 100 na 200 z’imyuka ihumanya ikirere izwi nka carbon dioxide

Kuva hasinywa amasezerano y’i Pari (Paris Agreement) ajyanye no kurengera ibidukikije hagamijwe guhangana n’imihindagurikire y’ikirere, ivugururwa ry’aya masezerano ryabereye i Kigali ni ryo ntabwe y’ingenzi Isi iteye mu guhangana n’ingaruka ziterwa n’imihindagurikire y’ikirere.


Abahagarariye ibihugu byasinye amasezerano ya Montreal banejwejwe n’ivugururwa ryayo rya Kigali

Aya masezerano y’amateka aratanga icyizere ko n’imiryango mpuzamahanga ishobora guhangana n’imihindagurikire y’ikirere ndetse no guhagarika izamuka ry’ubushyuhe ku isi binyuze mu kurinda akayunguruzo k’imirasire y’izuba (Ozone).

Mu ijambo Minisitiri w’umutungo kamere mu Rwanda ari na we wayoboye inama y’ivugururwa ry’aya masezerano, Dr Vicent Biruta yagize ati: “gukorera Ivugururwa ry’aya masezerano i Kigali ni insinzi, birereka isi yose ko ibikorwa bifatika mu guhangana n’ihindagurika ry’ikirere bishoboka kandi ko tugifite amahirwe yo kugabanya ubushyuye bw’isi ku kigero cya dogere 1.5 (1.5°C). Dukoze amateka uyu munsi kandi twese tugomba guterwa ishema na byo”

Ivugururwa ry’aya masezerano ribaye nyuma y’imyaka irindwi ibihugu byayasinye bibyigaho ariko ntibifate umwanzuro. Aya masezerano avuga ko ibihugu byateye imbere bizatangira guhagarika ikoreshwa rya hydrofluorocarbons bitarenze 2019, mu gihe ibihugu bikiri mu nzira y’amajyambere byo bizabihagarika kuva muri 2024.

U Rwanda rushingiye ku bivugwa muri aya masezerano, rwiyemeje gutangira kuyashyira mu bikorwa muri Mutarama 2017. U Rwanda kandi rusanzwe rwita cyane ku bikorwa birengera ibidukikije kuko n’amasezerano yakuragaho ikoreshwa rya gaze ya chlorofluorocarbon (CFCs) na yo yangiza akayunguruzo k’izuba rwayashyize mu bikorwa mbere y’umwaka umwe ku gihe cyateganyijwe.


Ivugururwa ry’aya masezerano ry’i Kigali ryishimiwe cyane n’abitabiriye iyi nama

Inkuru ku ifungurwa ry’iyi nama: “Ntabwo tugomba kunyurwa n’iterambere ricagase” – Perezida Kagame

Yisangize Inshuti.

Ibitekerezo 1

  1. BURIYA UBWO IBYEMEZO BIFATIWE HANO BIRAHITA BISHYIRWA MUBIKORWA NTAYANDI MANANIZA ! MWIHANGANE GATO GUSA.

Tanga Igitekerezo