EALA yatoye umushinga w’itegeko rikuraho ikoreshwa ry’amashe muri EAC

Abadepite bagize inteko ishinga amategeko y’umuryango wa Afurika y’Iburasirazuba (EALA) bemeje umushinga w’itegeko rikurako ikoreshwa ry’amasashe mu bihugu byose bigize umuryango wa Afurika y’Iburasirazuba (EAC).

Umushinga w’itegeko rikuraho ikoreshwa ry’amasashe muri EAC watanzwe na Hon Hajabakiga Patria uhagarariye u Rwanda muri EALA. Uyu mushinga uteganya ko itegeko niritorwa burundu rizahagarika abatuye mu bihugu bigize EAC gukora, gucuruza no gutumiza mu mahanga ibikoresho byose bikozwe mu masashe.

Hon Hajabakiga asobanura ishingiro ry’uyu mushinga yavuze ko rigamije kurengera ubusugire bw’ibidukikije ndetse anavuga ko hakwiye gukomeza ibiganiro ku buryo n’ibindi bikoresho byose bikoze muri parasitiki byacika muri EAC.

Ibi bikoresho iyo bitwitswe bihumanya ikirere kubera imyuka ihumanya ibikomokaho ishobora no kwangiza ubuzima bw’umuntu,ubutaka, inyamaswa.

Ni kenshi EALA yagiye iganira kuri uyu mushinga ariko ntiwemeze bitewe nuko hari inzego n’ingeri zitandukanye z’abaturage bagombaga kuganirizwa kuri uyu mushinga ngo batange ibitekerezo ku buryo bwo kuwunoza. Kumugoroba wo kuri uyu wa gatatu nibwo aba badepite bawemereje mu nteko yabo iteraniye i Arusha muri Tanzaniya.

Hon Safina Kwekwe, Umuyobozi wa Komisiyo y’ubuhinzi, ubukerarugendo n’umutungo kamere ari na yo yahawe umukoro wo kunoza uyu mushinga w’itegeko yavuze ko baganiriye n’abarebwa n’iri tegeko bo mu bihugu byose bigize EAC cyane cyane abafite inganda zikora ibikoresho bikozwe mu masashe bakabaha ibitekerezo ku buryo bwo kurinoza.

Uganda yashyizeho itegeko ryo guca amasashe muri 2009 ariko ntiryigeze rishyirwa mu bikorwa kugeza n’uyu munsi, Abanyenganda bo muri Kenya bavuga ko amasashe abangamiye ibidukikije ndetse akwiye kuvanwaho ariko bakavuga ko hakwiye kwigwa uburyo abanyenganda batazabihomberamo, abo muri Tanzaniya n’Uburundi bo baravuga ko hakwiye gucika ibikoresho abantu batwaramo ibintu bikoze mu masashe ariko bakavuga ko hari ibikoresho bimwe bikozwe mu masashe bidakwiye gukurwaho.

Abenshi mu baganiriye na Komisiyo yize ikananononsora uyu mushinga bagaragaje ko iri tegeko niritorwa bizabagiraho ingaruka mbi zirimo kubura akazi, guhomba kw’inganda ndetse no kugabanuka kw’imisoro gushobora guteza ihungabana ry’ubukungu, ari na byo byatumye basaba abadepite gutekereza ku buryo iri tegeko ryatorwa habanje kwiga ku buryo bwo gukemura ibyo bibazo.

Nyuma yuko abadepite bemeje uyu mushinga w’itegeko, igikurikiyeho ni ukuwugeza ku bakuru b’ibihugu bigize umuryango wa Afurika y’Iburasirazuba bamara kuwutora (bose) ugahita uba itegeko. Mu giha hagize umwe cyangwa bamwe muri bo batawemeye, uyu mushinga uzasubizwa abadepite bakomeze kuwunoza.

U Rwanda, Bangladesh, Botswana, Israel, n’u Bufaransa ni bimwe mu bihigu ku isi bifite itegeko rikuraho ikoreshwa ry’amasashe.

Yisangize Inshuti.

Ibitekerezo

Tanga Igitekerezo