Mutuyimana yari umukinnyi wihangana yari indwanyi ku rugamba rw’intsinzi: John Baraza

Umutoza wungirije w’ikipe ya Sofapaka mu gihugu cya Kenya Mutuyimana yahoze akinira yagaragaje agahinda yatewe n’urupfu rw’amarabira rw’uyu munyezamu .

Mutuyimana yitabye Imana mu gitondo cyo kuri uyu wa kabiri azize urupfu rutunguranye bivugwa ko rwatewe n’uburwayi yajyaga agira bufata mu myanya y’ubuhumekero.

Mutuyimana yakiniraga ikipe ya Rayon Sports ariko yakinnye igihe kinini mu ikipe ya Sofapaka muri Kenya.

Umutoza wungirije muri iyi kipe John Baraza yavuze ko bakubiswe n’inkuba bumvise urupfu rw’uyu musore w’imyaka 26.

Baraza yavuze ko bashenguwe n’urupfu rwa Mutuyimana ati :”Twakiriye inkuru ibabaje muri iki gitondo byadushenguye, Mutuyimana yari umukinnyi wihangana mu ikipe yacu yari indwanyi ku rugamba rwo gushaka ntsinzi ntawe wamugereranya.”

Yakomeje agira ati :”Yakundaga Sofapaka yihanganiye ibihe bibi ikipe yacu yanyuzemo mu minsi ishize. Yavuye mu ikipe yacu ubwo twamaraga kuza mu cyiciro cya mbere ariko nyuma agaruka kudufasha igihe twari turi mu makipe arwana no kutamanuka mu cyiciro cya kabiri . Dusabiye umuryango we, inshuti ze ndetse n’abavandimwe be.”

Mutuyimana ni umwe mu bakinnyi bafashije Sofapaka kuzamuka mu cyiciro cya mbere muri Kenya mu mwaka wa 2008/2009 nyuma aza mu Rwanda akinira amakipe nka Kiyovu na Police FC ariko azakongera gusubira muri Kenya mu ikipe ya Sofapaka.

Umuyobozi w’ishyirahamwe ry’umupira w’amaguru mu Rwanda Nzamwita Vinzent De Gaulle nawe yandikiye ibaruwa ubuyobozi bwa Rayon Sports abubwira akababaro yatewe n’urupfu rw’umukinnyi wayo ndetse akaba n’umukinnyi w’Amavubi.

Iyi ni ibaruwa Nzamwita De Gaulle yandikiye Rayon Sports

Komite Olympic y’u Rwanda nayo yanditse ubutumwa bufata mu mugongo abashenguwe n’itabaruka rya Mutuyimana igira iti:”
Komite Olempike y’u Rwanda ibabajwe n’urupfu rutunguranye rw’uwari umunyezamu wa Rayon Sports F.C., Mutuyimana Evariste witabye Imana muri iki gitondo.
Mu izina ry’Umuryango w’abakora n’abakunda siporo mu Rwanda, tuboneyeho umwanya wo kwihanganisha umuryango we, ikipe ya Rayon Sports FC, Ishyirahamwe ry’umupira w’amaguru mu Rwanda (Fédération Rwandaise de Football Association) n’abakunzi ba sport muri rusange.
Perezida wa Rwanda National Olympic and Sports Committee,
Amb. Valens Munyabagisha

Abakinnyi b’umupira w’amaguru mu Rwanda uhereye kuri Haruna Niyonzima kapitene w’ikipe y’igihugu nabo bagaragaje akababaro batewe n’urupfu rwa mugenzi wabo.

Mutuyimana yahamagawe mu ikipe y’igihugu Amavubi inshuro 20 inshuro ya mbere yakiniye Amavubi ni mu mwaka wa 2012 ubwo Algeria yatsindaga u Rwanda ibitego 4-0 mu mikino yo gushaka tike yo kujya mu gikombe cy’Isi.

Yisangize Inshuti.

Ibitekerezo

Tanga Igitekerezo