Ku nshuro ya mbere irushanwa rya Triathlon ryabereye i Kigali .

Rukara Fazili na Uwineza Hanani bishimiye kwegukana irushanwa ry’iyi nshuro.

Abakinnyi 30 b’ibitsina byombi kuri iki cyumweru dusoje bitabiriye irushanwa rya Triathlon rigizwe no gusiganwa ku maguru no kunyonga igare baturutse mu makipe atandukanye hirya no hino mu gihugu.

Aya makipe yitabiriye iri rushanwa arimo ayo mu mujyi wa Kigali, ikipe y’abakozi bakora muri sosiyete ya Solar energy, Akarere ka Karongi, Rubavu na Rwamagana.

Uwineza Hanani wo muri club ya Rubavu , wabaye uwa mbere mu bakobwa bari muri iri rushanwa yavuze ko ibanga yakoresheje ari imyitozo ya buri munsi.

Icyamugoye ni Umuhanda kuko ngo bwari ubwa mbere yitoreje mu muhanda wa Kigali, yavuze ko umuhanda utamenyereye kwitorezamo utamenya ahazamuka n’ahamanuka cyane mu kwiruka niho byari bikaze.

Uyu mukobwa wabaye uwa mbere mu bakobwa yifuza ko yabona abo bahanganye bakomeye kuko usanga kutabona abo bahangana bakomeye bimusubiza inyuma, ngo yifuza guhangana n’abamurusha kugirango arebe ko yatera intabwe yisumbuyeho.

Kubiyanye n’abarushanyijwe mu bagabo, Rukara Fazili ukinira club ya Kigali wegukanye umwanya wa mbere yavuze ko nta cyatunguranye kuko yari abyizeye. Uyu na we yavuze ko abikesha gukora imyitozo, yagerageje gukora neza. Yatangarije itangazamakuru ko Imbogamizi yahuye na yo ari uko badafite ibikoresho bikomeye.

Perezida wa Federation ya Triathlon mu Rwanda Alex Mbaraga yavuze ko muri rusange byagenze neza. Yagaragaje ko iri rushanwa abantu benshi batararimenya cyane dore ko iri rushanwa ari inshuro ya mbere ribereye muri Kigali.

Nkuko byasobanuwe na Perezida wa Federation ya Triathlon mu Rwanda, Alex Mbaraga, mu irushanwa iyo igare rigupfiriyeho ugomba kwirwanaho ,mugenzi wawe iyo ashatse kugufasha ngo ntibyemewe, ugomba kwimenya kugezaho urangije irushanwa, ngo ni kimwe mu biryoshya isiganwa.

Uyu muyobozi yagaragaje ko kuba benshi bafite amagare adakomeye ari kimwe mu mbogamizi amakipe afite kuko ngo ibikoresho birahenze. Ibi ngo nibyo bagiye kugerageza ku bufatanye n’inzego zitandukanye mu gushakisha abaterankunga kugirango baborohereze kubona ibikoresho nyabyo, gutegura amarushanwa mu gihugu no hanze ku bufatanye na minisiteri ifite siporo mu nshingano zayo (MINISPOC).

Hagati aho i Rubavu ku ya 28 Ukwakira 2017 hateganijwe irindi rushanwa rikomeye rya Triathlon. Hazaba hari amasomo y’iminsi 3 ku batoza, nyuma yaho hazabaho umunsi wo gusoza.

Ibi birakorwa mu gihe barimo kwitegura kuzahagararira imikino ya commonwealth izabera muri Australia mu mwaka utaha wa 2018.

Iri rushanwa ryatangijwe n’umuyobozi wungirije w’Umujyi wa Kigali Busabizwa Parfait wagize uruhare rukomeye kugirango uyu mukino utangire mu gihugu. Ubusanzwe irushanwa rya Triathlon rihuza imikino y’uburyo butatu ariyo Koga, gusiganwa ku maguru no kunyonga igare

Christopher Karenzi

Yisangize Inshuti.

Ibitekerezo

Tanga Igitekerezo