Katawuti yasobanuye iby’amasaluti atera iyo batsinze igitego n’abo ayaterera

Ndikumana Hamad Katawuti umutoza wungirije wa Rayon Sports yatangaje ko amasaluti atera iyo batsinze igitego aba ayaterera umutoza we kuko ngo amwita umusirikare.

Kuva mu gikombe cy’Agaciro Katawuti akunda gukora ikimenyetso cy’isaluti iyo ikipe ye itsinze igitego. Yabikoze bwa mbere ku mukino batsinzeho ikipe ya Police FC muri iki gikombe cy’agaciro akomeza kubikora no ku mikino batsinzemo APR FC .

Katawuti abajijwe n’umunyamakuru wa Flasha FM icyo abikorera yamusubije ko ari umutoza we mukuru Karekezi aba ayiterera .

Ati :”Isaluti mba nyiha umutoza wange ubundi buri gihe nkunda kumwita ko ari umusirikare, kuri Police FC niwe nayihaga ariko I Rubavu ibyishimo byarandetse nyitera kuruhande aho atari.”

Katawuti nk’uko abivuga I Rubavu yateye isaluti areba muri tiribine y’icyubahiro ndetse hari n’abibajije ko aba ari kuyiterera abayobozi. Ibintu byasobanura ibintu byinshi harimo kuba yaba ari gutanga icyubahiro ku bayobozi be cyangwa se yaba ari kwishimira kubayobozi b’ikipe bahanganye.

Ibi ariko ngo ntaho bihuriye ahubwo ibyishimo byatumye abura umutoza we ayitera areba aho abonye. Ati :”Ibyo ntaho bihuriye ahubwo umutoza yagiye ku ruhande sinabimenye kandi sinarindi jyenyine narindi kumwe n’abandi batoza bagenzi banjye kuko niko twari twabipanze ko tubikora nitubona igitego.”

Ndikumana Hamad Katawuti azwiho kuba ari umukunzi wa Rayon Sports bikomeye kuko mu Rwanda ariyo kipe yakiniye gusa. Mu mwaka wa 2006 ubwo yirukanwaga n’ikipe yakiniraga mu Bubiligi yaje mu Rwanda ahitamo kuba ahakina igihe gito bivugwa ko yaba yaranze gukinira APR FC yamwifuzaga inamuha amafaranga menshi ahitamo gukinira Rayon Sports ikipe ye yo mu bwana nyamara yaramuhaga amafaranga macyeya.

Yisangize Inshuti.

Ibitekerezo

Tanga Igitekerezo