FERWAFA yashyize hanze ibaruwa ndende isobanura ku bivugwa mu matora y’uzayiyobora

4

Nyuma yabyagiye bivugwa mu bitangazamakuru bitandukanye hano mu Rwanda ku matora y’umuyobozi wa FERWAFA ateganyijwe muri Nzeri uyu mwaka, ahanini banengaga imitegurire y’aya matora bavuga ko hari ibyirengagijwe nkana bakica amategeko ya FIFA babishaka. Ishyirahamwe ry’umupira w’amaguru mu Rwanda ribicishije mu itangazo rigaragara ku rubuga rwaryo ryageneye abanyamakuru n’abakunzi ba ruhago muri rusanga ubutumwa nk’uko tugiye kubagezeho iyo baruwa nta na kimwe duhinduyeho.

Itangazo rigenewe abanyamakuru

Hashingiwe ku bimaze iminsi bivugwa hirya no hino mu bitangazamakuru bitandukanye, Ishyirahamwe ry’Umupira w’Amaguru mu Rwanda (FERWAFA) riramenyesha abakunzi ba ruhago ibi bikurikira:

1.Ibivugwa kuri « Code Electoral » ya FIFA:

Nk’uko byakunze kunyura mu bitangazamakuru ko FERWAFA itubahirije ibiteganywa na « Code Electoral » ya FIFA mu gutegura amatora yo muri Nzeli 2017, turamenyesha abakunzi ba ruhago ko ataribyo. Ibiteganywa byose mu gutegura amatora byemejwe n’inteko rusange ya FERWAFA, yabereye i Rubavu kuwa 25 Werurwe 2017, nk’urwego rukuru ruyobora umupira w’amaguru mu Rwanda, uru rwego kandi nta muntu n’umwe ufite ububasha bwo kuruvuguruza, tunabonereho kubamenyesha ko umumaro wa « Code Electoral » ya FIFA ari ugufasha buri gihugu gukora « code » yacyo yihariye igenga amatora (nk’uko bigaragara mu gika cya nyuma cy’intangiriro y’iyo code) bitandukanye cyane n’abakwirakwiza amakuru atariyo avuga ko iyo « code » ya FIFA ikwiye guterurwa igaterekwa muri buri gihugu uko yakabaye ikubahirizwa inyuguti ku nyuguti.

2.Ibivugwa ku Kanama k’Amatora:

Nk’uko byavuzwe mu bitangazamakuru ko Akanama gashinzwe gutegura no kuyobora amatora katemewe kandi ko kadakurikije amategeko, turamenyesha abakunzi ba ruhago ko ataribyo kuko uburyo kagiyeho bwemejwe kandi gatorwa n’abagize Inteko Rusange ya FERWAFA.
Turamenyesha kandi abakunzi ba ruhago ko ibimaze iminsi bivugwa ko aka kanama kagizwe n’abakozi ba leta aho kuba kagizwe n’abayobozi b’amakipe nk’uko bikwirakwizwa hirya no hino. Nta muntu n’umwe uri muri aka kanama nk’umukozi wa leta, uwatorewe kukajyamo wese yatowe nk’umuyobozi w’ikipe, nta numwe wagiye muri aka kanama yitwaje kuba ari mu nzego za leta (ari nabyo bibujijwe).

3.Ibivugwa ku Kanama k’Ubujurire:

Nkuko bivugwa ko amatora yo muri 2017 atemewe kubera ko akanama gashinzwe gutegura amatora ari nako kazakira ubujurire, ibi nabyo turabamenyesha ko ataribyo kuko FERWAFA isanzwe ifite urwego rugize akanama k’ubujurire abanyamuryango bose bajyanamo ubujurire bwose mu gihe baba batishimiye ibyemezo byafashwe n’urwego urwo arirwo rwose ruri munsi y’Inteko Rusange. Ako kanama karahari kandi kazakira ubujurire bwose kazashyikirizwa, bityo turabasaba kudaha agaciro ibyo bindi bivugwa bitandukanye n’ukuri. Tuboneyeho kandi kumenyesha abakunzi ba ruhago ko bamwe mubakwirakwije ibi binyoma, amakipe yabo yamaze kubamagana anatumenyesha ko abakwirakwije ibyo byose babikoze mu mazina yabo bwite atari mu mazina y’amakipe bahagarariye, bityo turabasaba kutabiha agaciro.

Dushimiye buri wese ukomeza kugira uruhare mu kubaka ruhago nyarwanda.
Source: Ferwafa.rw

Yisangize Inshuti.

Ibitekerezo 4

  1. Jye mbona FIFA izageraho natwe ikadukomanyiriza. Naho ibyo kwegura mubyibagirwe ahubwo buriya yatangiye tekinike

Tanga Igitekerezo