Donadei yarazaga tukajya kwihisha- Moustapha avuga itandukaniro ry’abatoza bamutoje muri Rayon Sports

Nsengiyumva Moustapha wahoze akina hagati akanasatira mu ikipe ya Rayon Sports, yerekanye itandukaniro ry’abatoza bane bamutoje mu myaka ibiri yayimazemo barimo Masudi, Donadei,Sosthene na Minnaert.

Moustapha aganira na Makuruki yavuze ko yinjiye muri Rayon Sports asangamo umutoza Sostene nyuma hakaza Donadei waje akavangavanga ibintu byose akabagira nk’abasazi, nyuma nibwo Minnaert na Masudi bafashe ikipe.

Ati"Ninjiye muri Rayon Sports itozwa na Sostene(Habimana uzwi nka Lumumba), ni umutoza mwiza kandi twese yaduhaye amahirwe ariko agakunda abakinnyi bakuze ariko natwe yaradukinishaga. Sosthene ni umutoza kandi ukunda kugira inama abakinnyi.

Kuri David Donadei yagize ati"Donadei nawe ntabwo ari umutoza mubi, ariko Donadei ukuntu ameze yari akaze cyane, Donadei twese yaradusaranaga yaba abatoza bamwungirije, yaba abakinnyi, twaramutinyaga ariko ntabwo yari umutoza mubi kuko twese yaduhaye amahirwe. Ntabwo twajyaga tuvugana nawe twabonaga aje abakinnyi b’abana barimo tukajya kwihisha njye na ba Savio "

Donadei yasezeye gutoza Rayon Sports mu Ukwakira 2015 ashinja ubuyobozi bwayo ubwambuzi n’ububeshyi.

Ku mutoza w’umubiligi Ivan Minnaert wafashe iyi kipe mbere y’uko iragizwa Masudi Djuma, Moustapfa yavuze ko atari mubi gusa ngo yari afite ingeso yo kwirukana abakinnyi.

Ati"Minnaert ni umutoza mwiza uzi kureba impano z’abakinnyi, akanatanga amahirwe ku bandi gusa afite ingeso yo kwirukna abakinnyi kuko yumva niba akeneye abakinnyi 18 ari bo agomba kugira gusa. Mu buzima busanzwe twaraganiraga akatugira inama."

Umutoza Minnaert yasezeye muri Rayon Sports muri Gashyantare 2016, ashinja komite y’iyo kipe kudashyira mu bikorwa ibyo yabaga yayisabye gukosora.

Kuri Masudi ati"Masudi we yadufashe nk’umubyeyi kuko uzarebe 90% nta muntu ushobora gufata ikipe yose ngo ayihe amahirwe, biragoye ku mutoza. Buriya ikintu Masudi yakoze twese yaduhereje amahirwe, nta mukinnyi muri Rayon Sports utarabonye amahirwe. Masudi yari umutoza mu buzima busanzwe twafataga nka mukuru wacu, Masudi muratebya nta kibazo nta n’ubwo wamubwira ikintu mutebya ngo abifate nabi."

Masudi yeguye ku butoza bwa Rayon Sports muri uku kwezi kwa Nyakanga avuga ko ari ku mpamvu ze bwite.

Nsengiyumva Moustapha yinjiye muri Rayon Sports mu mwaka w’imikino wa 2015/2016 avuye mu Isonga, akaba yari amaze imyaka ibiri muri Rayon Sports ariko ubu akaba ari umukinnyi wa Police FC kuko yamaze kuyisinyira imyaka ibiri.

Yisangize Inshuti.

Ibitekerezo

Tanga Igitekerezo