Dore gahunda yose ikipe y’igihugu Amavubi izakurikiza mbere yo gucakirana na Tanzania

Umutoza w’ikipe y’igihugu y’u Rwanda, Antoine Hey, yamaze gushyira haze urutonde rw’abakinnyi 22 azatoranyamo 18 agomba kujyana muri Tanzania mu gushaka itike y’irushanwa ry’abakinnyi bakina imbere mu bihugu byabo ’CHAN’, ndetse na gahunda y’iyi kipe yahise itangazwa uko iteye kugeza ku munsi w’umukino.

Irushanwa rya CHAN riteganyijwe umwaka utaha wa 2018 mu ntangiriro z’ukwezi kwa Kabiri rikabera muri Kenya, rikaba rizitabirwa n’amakipe 16.

Nk’uko umutoza w’ikipe y’igihugu Amavubi yabitangarije Itangazamakuru, umwiherero w’ikipe y’igihugu uzatangira ku munsi w’ejo kuwa kabiri tariki ya 4 Nyakanga 2017 ku mugoroba uzabera i Nyamata kuri Golden Tulip nk’ibisanzwe.

Biteganyijwe ko imyitozo izatangira kuwa kuwa Gatatu, kuwa Kane no kuwa Gatnu hakazajya haba imyitozo kabiri ku munsi, iya mu gitondo izajya itangira saa 9:00(saa Tatu) na ho nimugoroba igatangira saa 15:30’(saa Cyenda n’igice).

Imyitozo ya mu gitondo izajya iba ifunguye kuri buri wese ushaka kuyireba ariko iya ni mugoroba nta muntu n’umwe wemerewe kuhakandagira.

Kuwa Gatandatu hateganyijwe umukino wa gishuti hagati y’abakinnyi batoranyijwe n’abasigaye ariko ukaba ari n’igeragezwa kugira ngo umutoza arebe urwego bariho, uyu mukino na wo ntawemerewe kuwureba.

Ku Cyumweru nta myitozo izakorwa bizaba ari akaruhuko.

Imyitozo izakomeza kuwa Mbere no kuwa Kabiri mu cyumweru gitaha(tariki 10 na 11) imyitozo ikorwa mu gitondo na ni mugoroba nk’ibisanzwe iya mu gitondo ifunguye kuri buri wese naho iya ni mugoroba ari ibanga.

Kuwa Gatatu tariki ya 12 hazaba umwitozo umwe wa ni mugoroba uzaba ufunguye kuri buri wese ari nabwo umutoza ashobora kuzatanga ikiganiro n’itangazamakuru ku ikipe azahagurukana yerekeza muri Tanzania.

Kuwa Kane tariki ya 13 nibwo ikipe y’igihugu izahaguruka mu Rwanda yerekeza muri Tanzania aho umukino uzaba kuwa Gatandatu tariki ya 15 Nyakanga, ukazabera Mwanza kuri sitade ya Mwanza.

Amavubi agomba kuzahagurukana abakinnyi 18 berekeza muri Tanzania, bivuze ko 4 bazasigara mu Rwanda ariko nyuma y’umukino ikipe y’igihugu izahita igaruka mu Rwanda n’aba bane bazaba basigaye bazahita basanga abandi mu mwiherero ku munsi wo ku Cyumweru bitegura umukino wo kwishyura uzaba tariki ya 22 Nyakanga 2017 ku kibuga cya Kigali(Stade Regional de Nyamirambo).

Yisangize Inshuti.

Ibitekerezo

Tanga Igitekerezo