APR FC itwaye igikombe cy’Amahoro ishimangira gusohokera u Rwanda mu mikino Nyafurika

Ikipe ya APR FC yegukanye igikombe cy’Amahoro nyuma yo gutsinda Espoir ku mukino wa nyuma igitego 1-0, umukino wabaye kuri uyu wa Kabiri tariki ya 4 Nyakanga 2017.

Ni umukino watangiye ku isaha ya saa 17:30 ubera ku kibuga cya Kigali i Nyamirambo, maze igitego cya Bizimana Djihad cyo ku munota wa 38 ku ruhande rwa APR FC nicyo cyatandukanyije impande zombi maze APR FC itwara igikombe cy’Amahoro ityo.

Igice cya mbere cyihariwe n’ikipe ya APR FC ndetse ubona ko iri hejuru cyane, ndestse abasore bayo barimo umwana ukiri muto Innocent Nshuti, Muhadjiri na Issa bahaye akazi gakomeye ba myugariro ba Espoir, byaje gutuma ku munota wa 38 ku bwo guhuzagurika kwa Adolphe ajya gukura umupira imbere y’izamu akawuhusha Djihadi Bizimana ahita atsinda igitego cya mbere. N’iki gice cyaje kurangira ari 1 cya APR FC ku busa bwa Espoir.

Igice cya kabiri n’ubundi APR FC yagitangiranye imbaraga ishaka gutsinda ibindi bitego kugira ngo ikomeze kwizera intsinzi ariko abasore bayo kureba mu izamu biba ikibazo.

Ku munota wa 54 Issa Bigirimana yasimbuwe na Sekamana Maxime. Ku munota wa 57 Espoir yakoze impinduka 2, Bugingo Samson asimbura Bakundukize Adolphe naho Habyarimana Faustin asimbura Wilondja Albert.

Ku munota wa 77 Nshimiyimana Amran yasimbuwe na Tuyishime Eric Congolais, ari nako ku munota wa 84 APR FC yakoze impinduka za nyuma Onesme Twizerimana yasimbuye Nshuti Innocent.

Ku munota wa 91 Uzabakiriho Hamad yasimbuye Nkurunziza Felicien maze n’umukino urangira ari 1 cya APR FC ku busa bwa Espoir maze APR FC ihita yegukana igikombe.

Gutwara iki gikombe ku ruhande rwa APR FC bihise bishimangira ko iyi kipe ari yo izasohokana na Rayon Sports zihagarariye u Rwanda mu mikino nyafurika umwaka utaha aho APR FC izakina Confederation Cup naho Rayon Sports igakina Champions League.

Twabibutsa ko ikipe ya APR FC yageze ku mukino wa nyuma isezereye Amagaju muri 1/2 ku giteranyo cy’ibitego 6-1, naho Espoir yari yasezereye Rayon Sports ku bitego 2-1.

Dore 11 babanjemo ku mpande zombi

APR FC:Kimenyi Yves (GK), Ngabo Albeert (C), Aimable Nsabimana, Rusheshangoga Michel, Imanishimwe Emmanuel, Amran Nshimiyimana, Yannick Mukunzi, Bizimana Djihad, Issa Bigirimana, Hakizimana Muhadjili na Nshuti Innocent

Espoir:Isingizwe Patrick (GK), Mutunzi Clement, Moninga Wa Lusambo, Mbogo Ally, Wilondja Jacques, Dushimumugenzi Jean, Nkurunziza Felcien, Balola Bao, Renzaho Hussein, Murungura Wilondja Albert, Bakundukize Adolphe

Yisangize Inshuti.

Ibitekerezo

Tanga Igitekerezo