Nyuma yo kunganya na APR FC, Amagaju yajuririye ikarita itukura yahawe umukinnyi wayo

Nyuma yo kunganya na APR FC igitego 1 kuri 1 mu mukino ubanza w’igikombe cy’Amahoro, ikipe ya Amagaju yahise ijuririra ikarita y’umutuku yahawe umukinnyi wayo Yumba Kayite.

Ni ikarita yahawe ku munota wa 67, azira ahanini ikosa yari akoreye kuri Nshuti Innocent ndetse agasa nushaka kumukubita, hari mumvururu zatumye abakinnyi b’amakipe yombi basa nabashyamirana.

Nk’uko bigaragara ku ibaruwa iyi kipe yandikiye ubuyobozi bw’ishyirahamwe ry’umupira w’amaguru mu Rwanda ’FERWAFA’, iyi kipe irasaba ko ikarita yahawe umukinnyi wabo ko yayihanagurwaho ngo kuko abakinnyi b’ikipe ya APR FC ari bo bamwiyenjejeho ndetse ngo bakanamukubita ariko abasifuzi bakabyirengagiza.

Bifuza ko yahita anasubizwa uburenganzira bwe akaba yanakina umukino wo kwishyura uteganyijwe kuwa Kane.

Ikipe ya Amagaju ikaba isaba FERWAFA ko yakemura iki kibazo hifashishijwe amashusho yafashwe kuri uwo mukino kuko wari urimo kunyura kuri televiziyo ya Azam nk’uko babigaragaza mu ibaruwa yabo.

Igihe FERWAFA yakwemeza ko iyi karita ikurwaho byaba bisobanuye ko uyu musore azakina umukino wo kwishyura uteganyijwe ku munsi wo kuwa Kane.

Ibaruwa ikipe ya Amagaju yandikiye FERWAFA

Yisangize Inshuti.

Ibitekerezo

Tanga Igitekerezo