Mayor’s Cup:Uzafatwa yahashye abakinnyi badakora muri Kigali ashobora kujya yirukanwa mu kazi

1

Muhongerwa Patricia, Visi Meya w’Umujyi wa Kigali ushinzwe imibereho myiza y’abaturage

Umuyobozi wungirije w’umujyi wa Kigali ushinzwe imibereho myiza yihanangirije abantu bazana abakinnyi b’abahashyi mu mikino y’umujyi wa Kigali( Mayors cup) ndetse anatangaza ko umwaka utaha iyi mikino izaba ifite indi sura.

Ejo tariki ya mbere Gicurasi ku munsi w’umurimo nibwo hasojwe imikino ihuza umujyi wa Kigali n’uturere tuwugize, imikino izwi ku izina rya Mayor’s Cup.

Ubwo yasozwaga kuri uyu wa Mbere, umukino wa nyuma mu bagabo mu mupira w’amaguru wahuje akarere ka Gasabo katsinze Kicukiro ibitego 2 - 1.

Mbere yo gutanga ibikombe,Patricie Muhongerwa ari nawe ufite imikino mu nshingano ze mu mujyi wa Kigali yashimiye amakipe yitabiriye aya marushanwa ariko by’umwihariko ashimira amakipe yatwaye ibikombe.

Uyu muyobozi yagaye cyane amakipe yafashwe yakinishije abakinnyi batari abakozi bayo, ibyo yise guhaha. Yavuze ko atari ibintu bikwiye kuko ngo nta kipe yabura abakinnyi ikinisha mu bakozi bayo.

Ati :”Mwabonye abakinnyi beza dufite hano, kuki mwarinze mujya guhaha mwitukisha? Jyewe ku giti cyanjye nigeze gukorana inama n’abakozi bashinzwe iyi mikino ndabihanangiriza ariko biracyakorwa kuzana abahashyi.”



Vice Mayor Patricia Muhongerwa ashyikiriza Kapiteni wa Gasabo igikombe cya Mayor’s Cup 2017

Patricie Muhongerwa kandi yavuze iyi mikino umwaka utaha iziba ifite isura nshya ariko ngo uwo bizamenyekana ko yagize uruhare mu guhaha azahanwa cyangwa atakaze akazi.

Ati:”Iki ni ikintu mvuga nkomeje. Nyewe ku giti cyanjye n’ubuyobozi dukorana mpagarariye ntabwo twakishimiye kandi ntituzigera tukishimira na gato. Ni ukuvuga ngo ababigizemo uruhare tuzagenda buhoro buhoro tubamenya kandi tuzabahana. Umwaka ukurikiraho 2018 Mayors cup izaba ifite indi sura , iyi ni intangiriro… abo bizamenyekana nyabuneka wowe ubifitemo uruhare no kwirukanwa mu kazi uzirukanwa.”

Amakipe yitwaye neza yahawe ibihembo birimo amafaranga ndetse n’imipira yo gukina, iyi mikino yashyizweho ngo ifasha abakozi b’umujyi wa Kigali n’uturere tuwugize gusabana ndetse no gukora siporo.

Yisangize Inshuti.

Ibitekerezo 1

Tanga Igitekerezo