Umunyarwanda yatwaye igihembo cy’imbwirwaruhame nziza mu Gikoreya

6

Umunyarwanda wiga muri Korea y’Epfo Niyodusaba Adriel yegukanye igihembo cyo kuvuga neza ururimi rw’Igikoreya mu ruhame nyuma yo gutsinda bagenzi be bo mu bindi bihugu bari bahanganye,

Niyodusaba Adriel w’imyaka 19 uvuka mu Karere ka Rutsiro ho mu Ntara y’uburengerazuba, amaze amezi 9 mu gihugu cya Korea y’Amajyepfo aho yagiye gukomereza amasomo yo ku rwego rwa Kaminuza.

Kuri uyu wa Gatanu yegukanye igihembo cy’imbwirwaruhame nziza nyuma yo gutsinda abandi 22 bakomoka mu bihugu bitandukanye byo ku isi nabo bahuriye muri Korea y’Amajyepfo.

Uyu musore warangije amashuri yisumbuye muri Groupe Scolaire Officiel Indatwa n’Inkesha y’ I Butare mu mwaka w’amashuri wa 2015, yemerewe gukomereza amasomo ye muri kaminuza ya YONSEI muri Korea y’Amajyepfo ku nkunga ya Guverinoma ya Korea y’Amajyepfo.

Nkuko bigenda ku banyeshuri bagiye kwiga mu bihugu byo mu mahanga bimwe na bimwe, basabwa kwiga ururimi rw’igihugu bagiye kwigamo kuko ari narwo akenshi amasomo aba azatangwamo.

Niyodusaba Adriel rero ubu yiga ururimi rw’Igikorea muri Kaminuza ya Silla aho yigana n’abandi banyeshuri baturutse mu bihugu birenga 20 by ku isi yose.


Niyodusaba Adriel atanga imbwiraruhame mu rurimi rwa Korea y’Epfo.

Iri rushanwa ry’imbwirwaruhame risanzwe rikorwa buri mwaka hagamijwe kureba uko abanyeshuri b’abanyamahanga bagiye gukomereza amasomo muri Korea y’Epfo bari kumenya ururimi rw’Igikorea.

Mu butumwa yashyize ku rukuta rwe rwa Facebook, Niyodusaba yavuze ko ashimira cyane abarimu bamwigisha ururimi rw’Igikorea ndetse avuga ko byose abikesha kwigira ku bakoze iby’ubutwari.


umuyobozi wa Kaminuza yigisha indimi muri Korea SILLA UNIVERSITY ahemba Niyodusaba

Biteganijwe ko uyu musore nyuma y’umwaka yiga ururimi rw’Igikorea azahabwa amasomo y’imyaka 4 mu bijyanya na Biotechnology.

Yisangize Inshuti.

Ibitekerezo 6

Tanga Igitekerezo