Rayon Sports irerekeza I Rusizi idafite intwaro zayo 4, APR yakira Musanze iri mu manegeka

Mu mpera z’iki cyumweru shampiyona y’icyiciro cya mbere irakomeza, aho imwe mu mikino ikomeye izaba irimo uw’ikipe ya Rayon Sports izajya I rusizi idafite, Xavio, Diarra,Kevin ndetse na Djabel, naho mukeba wayo APR FC ishaka igikombe izakine na Musanze ifite ibyago byo kujya mu cyiciro cya kabiri iramutse idatsinze imikino yayo.

Kuri uyu wa gatandatu tariki 11 Kamena 2016, hateganyijwe imikino ine harimo umwe ukomeye uzahuza ikipe ya 3 n’iya kane ku rutonde rwa shampiyona. Ayo ni Mukura ya kane izakira ikipe ya AS Kigali ya gatatu kuri sitade ya Huye. Umukino ubanza wahuje izi kipe, ikipe ya Mukura yari yasanze AS Kigali iwayo iyitsindirayo ibitego 2-0.

Undi mukino uzaba, ni uwa Etincells FC izakira Bugesera FC kuri sitade Umuganda, naho Kiyovu Sports yakire Sunrise ku kibuga cya Mumena.

Kuri uyu wa gatandatu kandi ikipe ya AS Muhanga izakira Gicumbi FC.

Ku cyumweru tariki ya 12 Kamena 2016, ni bwo hateganyijwe imikino ikomeye irimo amakipe ahanganiye igikombe, aho Rayon Sports izajya I Rusizi gukina n’ikipe ya Espoir iherutse gutsinda Rwamagana ibitego 2-1.

Rayon Sports izajya gukina idafite rutahizamu wayo w’umunya Mali Ismaila Diarra ufite amakarita 2 y’umuhondo ndetse n’abakinnyi 3 bari mu ikipe y’igihugu y’abatarengeje imyaka 20 bari mu Misiri, barimo Nshuti Dominique Savio, Muhire Kevin wari unafite ikarita y’umutuku ndetse na Imanishimwe Djabel.

Rayon Sports yahisemo gukina uyu mukino kugira ngo igabanye ibirarane byari bimaze kuyibana byinshi kuko muri weekend itakinnye umukino wari kuyihuza na Kiyovu Sports kubera aba bakinnyi bari mu ikipe y’igihugu, kuburyo ubu yari imaze kugira ibirarane bibiri.

Undi mukino uteganyijwe kuri iki cyumweru ni uzahuza APR FC na Musanze FC kuri sitade ya Kigali I Nyamirambo. Uyu mukino APR FC izawukina ishaka gukomeza gushimangira umwanya wayo wa mbere ngo ikomeze gusiga mukeba wayo Rayon Sports iyikurukiye banahanganiye igikombe.

Ikipe ya Musanze yo iri mu myanya mibi ishobora kuyijyana mu cyiciro cya kabiri mu gihe yaba igize umukino itsindwa mu gihe Rwamagana Cirty yaba yatsinze imikino yayo isigaye.

Undi mukino uzaba ni aho ikipe ya Rwamagana City izajya I Nyamagabe gusura Amagaju. Aya ni amakipe yose ari mu myanya idashimishije ku buryo iyakora amakosa ishobora kwisanga mu cyiciro cya kabiri. Rwamagana City iherutse gutsindwa na Espoir ibitego 2-1, na ho ikipe y’Amagaju yatsinzwe na APR FC igitego 1-0.

Umukino wasubitswe kuri uyu munsi wa 28 wa shampiyona, ni uwagombaga guhuza ikipe ya FC Marines na Police Fc. Ikipe ya Marines yasabye ko umukino wayo na Police FC wasubikwa kuko ifite abakinnyi 3 mu ikipe y’igihugu y’abatarengeje imyaka 20 ukaba rero wasubitswe nk’uko amategeko abiyemerera.

Imikino yose ku munsi wa 28 wa shampiyona

Kuwa Gatandatu, tariki ya 11 Kamena 2016

• Etincelles FC vs Bugesera FC- Umuganda
• AS Muhanga vs Gicumbi FC- Muhanga
• Mukura VS vs AS Kigali- Huye
• SC Kiyovu vs Sunrise FC- Mumena

Ku Cyumweru, tariki ya 12 Kamena 2016

• Espoir FC vs Rayon Sports FC – Rusizi
• APR FC vs Musanze FC- Nyamirambo
• Amagaju FC vs Rwamagana City- Nyamagabe
• Police FC vs Marines FC – Kicukiro(wasubitswe uzakinwa tariki ya 7/7/2016

Yisangize Inshuti.

Ibitekerezo

Tanga Igitekerezo