Rayon Sports igiye kwitabira irushanwa rizahuriramo ibihangange byo mu karere

Ikipe ya Rayon Sports igiye kwitabira irushanwa rizabera muri Tanzaniya rigahuza amwe mu makipe akomeye yo mu karere ka Afurika yo hagati n’iyuburasirazuba ryateguwe na startimes.

Iri rushanwa rizatangira tariki ya 16 rirangire tariki ya 23 ukuboza uyu mwaka wa 2016 rikazabera mu mujyi wa Dar es Salaam, umunyamabanga akaba n’umuvugizi w’ikipe ya Rayon Sports Gakwaya Olivier yemeje ko bamaze kubona ubutumira bubasaba kuzitabira iyi mikino.

Ati:”Nibyo ni irushanwa rya startimes rizahuza amakipe yo mu bihugu byo mu karere Uganda, Kenya na Tanzaniya buri gihugu kizohereza amakipe 2 hazaza n’ikipe yo muri Mozambique ubwo hiyongereho natwe. Ntabwo turamenyeshwa amakipe azaza icyo batubwiye ni ibihugu bizaza.”

Gakwaya avuga ko iri rushanwa rizabafasha kwitegura imikino ya confederation bagomba gukina bahagarariye u Rwanda mu ntangiriro z’umwaka utaha . Ariko kandi ngo nibitwara neza bazanabona inyungu y’amafaranga ngo kuko iri rushanwa ikipe ebyiri za mbere zizahemba neza ndetse ngo bamaze no kwemeza ko bazaryitabira.

Ati:”Yego tuzaryitabira twamaze kubasubiza tubemerera ko tuzaryitabira, inyungu irimo kuko ikipe ya mbere izafata ibihumbi 50 by’amadorari naho iya kabiri ihabwe ibihumbi 30 by’amadorali.”

Uretse ibi bihembo bizahabwa amakipe yitwaye neza kandi hazanahembwa umunyezamu uzitwara neza ndetse n’umukinnyi uzahiga abandi.

Amakipe yo muri Tanzaniya nka Yanga Africans, Simba na AZAM FC yitezwe kuzagaragara muri iri rushwa naho Kenya byitezweko ishobora kohereza ikipe ya Tusker na Gor Mahia. Muri Uganda ikipe yamaze kwemeza ko yabonye ubutumira kandi ko izanitabira iri rushanwa ni ikipe ya KCCA inasanzwe iterwa inkunga na Startimes.

Yisangize Inshuti.

Ibitekerezo

Tanga Igitekerezo