RGB nta kibazo ibona mu gutumira Congo muri GMT nubwo icumbikiye abahekuye u Rwanda

Mbanda Jean, umwe mu bakozi b’ikigo gishinzwe imiyoborere myiza mu Rwanda RGB yatangaje ko kuba ishyirahamwe ry’umukino wa Volley Ball ryaratumiye ikipe yo muri Congo mu irushanwa ryo kwibuka abari aba sportif bazize Jenoside yakorewe abatutsi mu 1994, nta kibazo kirimo n’ubwo Congo igicumbikiye abasize bakoze Jenoside.

Irushanwa ryo kwibuka abari aba sportif mu mukino wa Volley Ball, rizatangira kuri uyu wa gatandatu tariki 4Kamena 2016 nyuma y’urugendo ruzaba ku mugoroba wo ku wa gatanu. Amakipe 24 azitabira iri rushanwa azatangira kwishakamo ihiga izindi mu gitondo cyo ku wa gatandatu tariki ya 4 Kamena 2016.

Iri rushanwa rizitabirwa n’imwe mu makipe azaturuka muri Repubulika iharanira Demokalasi ya Kongo (RDC) yitwa BC Espoir mu bagabo.

Mbanda Jean ushinzwe itangazamakuru muri RGB inatera inkunga iri rushanwa, yabajijwe n’itangazamakuru niba gutumira ikipe yo muri Congo muri iri rushanwa kandi icumbiye FDLR igizwe n’abasize bakoze Jenoside ntacyo bitwaye, maze avuga ko icyo ari ikibazo gifite ahandi cyakemurirwa hatari mu mikino kandi ko atari ubwa mbere amakipe yo muri Kongo aza gukina mu Rwanda.

Ati:”Si ubwa mbere amakipe yo muri Kongo atumirwa mu Rwanda, ngira ngo ejo bundi ino habereye amarushanwa y’umupira kandi ni bo batsinze. Rero ibyo by’abari mu mashyamba ntibibareba kuko sibo babashyizemo, bifite ahandi bizakemurirwa nta
mpamvu rero batatumirwa.”


Mbanda Jean ushinzwe itangazamakuru muri RGB.

Umuyobozi w’ishyirahamwe ry’umukino wa Volley Ball mu Rwanda, Nkurunziza Gustave, we yashimangiye ko ahubwo kubatumira ari byo byiza kugira ngo baze bamenye Jenoside bajye babeshyuza abababeshya.

Ati:” Icyo namwongereraho ahubwo kubatumira ni byo byiza kugira ngo baze bamenye Jenoside ahubwo bajye banatanga ubuhamya babeshyuze abahora bababeshya ukuri.”

Iri rushanwa rizatangira kuri uyu wa gatandatu rizitabirwa n’amakipe 24 yo mu bagore no mu bagabo, akaba azaba aturutse mu bihugu 5 birimo Uganda, Kenya, Sudani yepfo, Kongo Kinshasa n’u Rwanda.

Iri rushanwa imyaka ibiri ishize ryegukanwe n’ikipe ya Rayon Sports VC mu bagabo naho mu bagore ryegukanwa na Rwanda Revenue Authority.

Yisangize Inshuti.

Ibitekerezo

Tanga Igitekerezo