RAYON SPORTS FC irakoza imitwe y’intoki ku gikombe cya Shampiyona

3

Umukino w’umunsi wa 26 wa Azam Rwanda Premier League (ARPL) wari wabereye kuri Stade ya Kigali aho Rayon Sport yari yakiriye Kirehe Fc bikarangira iyitsinze ibitego 2-1 bituma kugeza ubu ibura amanota 3 gusa ngo itware igikombe cya shampiyona.

Ni umukino wabonaga ko witabiriwe cyane aho abafana benshi ba Rayon Sport baje kuri uyu munsi intero n’inyikirizo ari igikombe aho hari n’abagaragaye bafite bya bikombe by’ibikorano yewe wabonaga ko bari kwiyumvamo intsinzi kuri uyu munsi.

Umukino waje gutangira ikipe ya Rayon Sport ubona yifitiye ikizere kiri hejuru cyane aho yatangiye yiharira umupira cyane kurusha ikipe ya Kirehe Fc wabonaga ko abasore b’umutoza Sogonya Hamis bari kugorwa cyane n’ikibuga kuburyo guhanahana umupira hagati yabo byabagoraga.

Ikipe ya Rayon Sport mu gice cya mbere yagiye irema uburyo bwashoboraga kubyara ibitego ariko imipira imwe n’imwe rutahizamu Romami Frank wari wagiriwe ikizere cyo kubanzamo uyu munsi yabonye agenda ayipfusha ubusa yewe Shassir na Pierrot nabo hari amahirwe bagiye babona ariko kunyeganyeza inshundura birananirana, ku rundi ruhande Kirehe Fc nyuma y’iminota 20’ y’igice cya mbere yaje gukanguka itangira kunyuzamo nayo ikagerageza gusatira izamu rya ririnzwe na Mutuyimana Evariste ariko ntibigire icyo bitanga.

Igice cya mbere cyaje kurangira impande zombi nta n’imwe ibashije kureba mu izamu ry’iyindi ari 0-0.

Igice cya kabiri cyaje gutangira ubona ko ikipe ya Kirehe Fc igarukanye ingamba nshya n’imikinire itandukanye n’iyo yari yatweretse mu gice cya mbere aho yatangiye guhanahana umupira mu kibuga hagati ari nako isatira izamu rya Rayon Sport.

Bidatinze ku munota wa 54’ ku mupira wari uvuye muri corner waje gusanga aho Kagabo Ismi ahagaze ahita aterekamo igitego gifungura amazamu ku ruhande rwa Kirehe Fc.

Masudi Djuma nyuma y’iminota 2 atsinzwe igitego yaje guhita akora impinduka maze Romami Frank wabonaga ko byamunaniye kuri uyu munsi aha umwanya Moustafa uhagaze neza muri iyi minsi aho yaje no kwigaragaza cyane muri uyu mukino.

Nyuma yaho gato yaje no guhita akuramo Djaber hinjira Nova maze ikipe ya Rayon Sport ihita itangira gukinira cyane mu kibuga cya Kirehe Fc aho ku munota wa 66’ Savio yatsinze igitego cyo kwishyura ku mupira mwiza yari ahawe na Manzi Thierry.

Umutoza Sogonya nawe yahise akora impinduka mu bakinnyi arasimbuza ariko ntibyabuza Rayon Sport kuguma iyirusha kwiharira umukino, aho bigeze ku munota wa 74’ Moustafa yaje kubonera ikipe ya Rayon Sport igitego cya 2 ku burangare bw’abinyuma ba Kirehe Fc.

N’ubundi Rayon Sport nyuma y’iki gitego ntiyahwemye gusatira inashakisha ibitego aho bagiye bahusha uburyo bumwe n’abumwe wabonaga ko bwavamo igitego ariko ntihagira ikindi gitego kiboneka kugeza iminota 90’ y’umukino irangiye bikiri bya bitego 2-1.

Rayon Sport kugeza ubu ikaba yagize amanota 64’ ikaba isabwa gusa amanota 3 kugira ngo ihite yibikaho igikombe cya shampiyona cy’umwaka wa 2016-2017 kuko ubu iri kurusha APR Fc ya 2 amanota 10 yo isigaje imikino 4 ngo isoze imikino yayo yose ya shampiyona mu gihe Rayon Sport isigaje igera kuri 5.

Dore uko abakinnyi kuri uyu munsi bari babanjemo ku mpande zombi:

*Rayon Sports Fc : Mutuyimana Evariste, Nzayisenga Jean D’Amour, Irambona Eric, Manzi Thierry, Mugabo Gabriel, Mugheni Fabrice, Kwizera Pierrot, Imanishimwe Djabel, Nshuti Dominique Savio, Nahimana Shassir, Lomami Franck.

*Kirehe Fc : Mbarushimana Emile, Niyigena Abdoulkarim, Baraka Augustin, Nkurikiye Jackson, Tuyisenge Niyonkuru Vivien, Cyuzuzo Ally, Mutabazi Isaie, Masudi Abdallah, Kagabo Ismi, Ndikumasabo Ibrahim, Shauri Nyarugeta Fiston.

David K. Mugaragu

Yisangize Inshuti.

Ibitekerezo 3

Tanga Igitekerezo