RAYON SPORTS FC ikomeje gusatira igikombe cya Shampiyona itababarira n’izenda kumanuka

4

Umukino w’ikirarane wo ku munsi wa 23 wa shampiyona ARPL ikipe ya Gicumbi FcC yaje kwakiriramo Rayon Sport i Kigali urangiye bayihaye impamba y’ibitego 6-1 itaha yimyiza imoso, aho uku gutsinda itabarira byakomeje kwerekeza habi ikipe ya Gicumbi

Uyu ni umukino w’ikirarane wari kuba warabaye ku munsi wa 23 ariko kuko ikipe ya Rayon Sport yari iri mu mikino ya CAF Confederation Cup umukino uza gusubikwa ntiwabera igihe.

Ni umukino wabonaga ko witabiriwe ku rwego rushimishije aho na bamwe mu bafana ba Rayon Sport bari baje bitwaje igikombe cy’igikorano bashaka kwerekana ko bari gukoza imitwe y’intoki ku gikombe cy’uyu mwaka.

Umukino waje gutangira ubona ko Rayon Sport imenyereye gukinira ku itapi iri kurusha ikipe ya Gicumbi Fc wabonaga ko iri kugorwa cyane n’ikibuga itamenyereye, nyuma y’iminota mike gusa ku munota wa 8’ umusore wo hagati Pierrot yaje guterekamo igitego cya mbere kuri Coup Franc nk’uko abenshi mu bakunzi ba ruhago hano mu Rwanda bamaze kubimenyera kuri we.

Bigeze ku munota wa 14’ w’umukino ku mupira mwiza wavuye kwa D’amour Mayor rutahizamu Frank Romami yaje guterekamo igitego cya 2 neza ku mutwe.

N’ubundi ikipe ya Rayon Sport yakomeje kwiharira umupira yewe inagera cyane imbere y’izamu rya Gicumbi babifashijwemo cyane n’abasore bayo basemababa, ku munota wa 32’ Moustafa wari uhagaze neza kuri uyu mukino yaje guterekamo igitego cya 3.

Igice cya mbere kibura iminota 3 ngo kirangire Muhire Kevin yaje guterekamo igitego cya 4 ku mupira ukomeye umunyezamu wa Gicumbi Fc yarakuyemo awutewe na Moustafa n’uko Kevin ahita asongamo ari nako igice cya mbere cyaje kurangira ari ibitego 4-0.

Igice cya kabiri cyaje gutangira ubona ko ingufu Rayon Sport yakoresheje mu gice cya mbere atarizo igarukanye, ku rundi ruhande umutoza Okoko wa Gicumbi yahise atangira gukora impinduka arasimbuza kugira ngo arebe ko yagabanya umubare w’ibitego yari yatsinzwe mu gice cya mbere ariko n’ubundi ukabona ko abakinnyi be bakomeje no kugorwa n’ikibuga.

Ku munota wa 67’ umutoza Masudi Djuma yaje gukora impinduka yinjizamo Nova mu mwanya wa Kevin wari watonekaye ku mvune yo mu ivi, Nova amaze kugeramo yazanye ingufu nyinshi aho umupira wahise utangira gukinirwa ku ruhande rw’iburyo yafatanyaga na Mayor.

Bigeze ku munota wa 72’ ku mupira Nova Bayama yazamukanye agasiga abinyuma ba Gicumbi yaje kuwugarura neza mu rubuga rw’amahina ahatererwa penaliti awuha Shassir nawe utatindiganije awuterekera neza Romami ahita aterekamo igitego cya 5 ari nacyo cya 2 kuri we muri uyu mukino.

Ku munota wa 88’ nanone Nova wari umeze neza yazamukanye umupira areba Moustafa wari uhagaze neza mu rubuga rw’amahina amuterekera ku kuguru neza nawe acunga uko umuzamu ahagaze ahita aterekamo igitego cya 6 ari nacyo cya kabiri kuri we muri uyu mukino.

Gicumbi Fc yari yakiriye umukino yanze kuviramo aho bigeze ku munota wa 90’ iterekamo igitego cy’impozamarira cyatsinzwe na Rutahizamu wayo Ndayambaje Selman wari winjiye asimbuye ku mupira umunyezamu Ndayishimiye Eric yafashe ntiyawukomeza neza uyu musore ahita awurangirizamo.

Kuri ubu Rayon Sport ikaba ishyizemo ikinyuranyo cy’amanota 10 irusha APR Fc ya 2 iyikurikiye naho Gicumbi Fc ku mwanya wa 15 biyiganisha mu kiciro cya kabiri umwaka utaha.

Inkuru ya David K. Mugaragu

Ifoto : Igihe.com

Yisangize Inshuti.

Ibitekerezo 4

  1. Rayon Sports ikomeje kuzirikana icyo abakunzi bayo dukeneye, turaryohewe nukuri !!!

Tanga Igitekerezo